Juniper Editorial (13 September 2015)

NAUPANGTE HI:

Bial Sunday School conference chu kan hmang leh mek a ni a, kumtin in kan hmang thin a, kan tihdan pawh a inang deuh ziah a, Naupang intihsiakna hi kan ngaihtuahna la ber tu pawh a ni mai awm e. 

He intihsiakna kumtina kan neih thin hi eng vanga nei ziah nge kan nih tih zawhna hi ilo inzawt ve tawh ngai em? Hun rei tawh tak atangin kan kalpui tawh a, hlawkna eng nge kan hmuh a, rahtha eng nge a chhuah? he thil hi a hlawk lo kan ti lova, a hlawk e pawh kan ti chuang lova, kan ngaihdan tizautuah han tarlan ve a tha awm e.

Intihsiakna hi Local hrang hrangte inelna mai atanga kan siam anih chuan hlawkna a tam lo viauin a rinawm, naupang rilru -ah Local inelna ang chauha kan tuh anih chuan a pawimawh ber leh a laimu, Pathian thu hriatna lama kaihhruaina hi kan thelh der dawn a ni. Intihsiakna kan buatsaih hian naupangte rilruah inelna satliah nilovin, inelna thianhlim, Pathian thu hriat tam duhna leh hriatchian duhna tuh se a duhawm hle mai. Chu chu a hlawhtlinna tur ber pawh niin a lang. 

Chang leh Thu Inchhang kan sawirual thup thup hian Pakhatna ni tur ringawtin em ni kan sawi? Kan sawirual thup thupte kha kan naupang ten an hrethiam ang em? Pathian thu hrilna kawngah midangte puih nan leh midangte hrilhfiahna atang hman nachang an hria ang em?

A hlutna tak kha kan naupangte hian hrethiam se, inelna thianghlim hmangin inel sela, Pathian thu hriatna lamah hmasawn sela kan Conference hi a va hlawhtling dawn em!

KAN PATHIAN BAWM HI ILA LET ANG U - Upa K. Lalbiakthanga (Juniper Article 13 September 2015)

JUNIPER ARTICLE

KAN PATHIAN BAWM HI ILA LET ANG U1 Chronicles 13:3Upa K. Lalbiakthanga

Israel ten Pathian (Thuthlung) bawm hi an ngaisang em em mai a, Pathian tluk hial a ngaiin, hmun thenkhatah phei chuan Pathian biakin an be hial a ni. He bawm hian koh dan chi hrang chi kua lai a nei a ni.

A lo lanna hmasa chu Exodus 25:10 ah Mosia hnenah Pathianin, a siam dan tur chiang taka a hrilhna hi a ni. A dung 45 inches, a vang lam leh a san lam inang 27 inches ve ve a siam tur a ni a. A chhungah Mana hlumbela dah that (Krista taksa) , Thusawmpek (Pathian thu) te leh Aron-a tiang chawr (Thlaurau thianghlim) te dah a ni.

Israel ten hmahruaitu bera an hman Jordan lui kan dawnah pawh hmanraw pawimawh, Jerico khua an beihna ah pawh hmahruaia an zawn ngat ngat ani a, chuti taka pawimawh si chu, a reh vang vang a, Ebal tlanga dan chhiarna ah lo lang in, ramtiam an lak hnuah, Silo khuaah, inbiakna puaninah alo lang leh a, roreltute hun tawp lam, puithiam Elia-te enkawlna hnuaiah khan alo lang leh a, chumi hnuah Samuela hunlaia, Philistia mite nen an indo khan, Philistia miten an laksak ta a.  Asdot ah te, Gath ah te, Ekron ah te leh Beth semeo ah te an dahin thla sarih lai Philistia ho ramah a awm a, Chumi hnuah Kiriath-Jerim khua, Abinadaba inah kum 20 zet a awm hnuah , Davida lal kum 8 na ah Abinadaba in atrang chuan Lal Davida chuan a han la leh ta a, Jerusalemah ropui takin a luh pui a, puaninah a dah ta a. Chumi hnuah Solomona’n Temple a sak zawh khan hmun thianghlim berah an dah ta a ni.

Heta tang hian, khawnge a awm tih hi hriat a ni ta lova, engvang nge aw? tia kan ngaihtuah in Jeremia 3:16 thu hi alo lang a, chu chu heihi a ni, Lalpa thuthlung bawm an ti tawh ngailo ang a, an rilru ah a lut lovang a, hriatpawh an hrereng tawhlo ang. An thlahlel tawhlo anga an siam leh tawh hek lovang tih hi alo sawi a, “Eng vang nge?” kan tih chuan:

Thuthlung Bawm Thar siam a tum a ni: Heb 10: 15-16 kan en chuan “Chung ni hnuah chuan an hnena ka thuthlun chu an thinlungah ka thupek ka dah ang a, an rilruah ka ziak bawk ang” a lo ti a. Chuti anih chuan nang leh kei hi Thuthlung bawm thar chu kan lo  ni ta anih chu. Bawm chhunga thil chi thum an dah angin,  hriatpuitu pathum - Tui leh Thisen leh Thlarau chu nangmahah dahin a lo awm ta a, Nimahse Lal Saula hunlai khan kan lo ngaihsak hauh lo mai a” a tih ang mai khan heng kan chakna ber hi kan hlamchhiahin Philistia hoin min laksak ve mai ang tih ava hlauhawm em! Kan chakna Pathian bawm hi i la leh teh ang u. 

1. TAWNGTAINA:

Samuela chuan Tawngtai bansan hi “Sual a ni.” a ti tawp mai (1 Sam 12:23)

Ringtute chakna chu tawngtai hi a ni si a, hawh u, tun ai hian tawngtai i uar ang u.

2. INKHAWM: 

Heb 10:25 “Thenkhat tihdan ang a kan inkhawmte bansan lovin” a tih ang hian kan Pathian biak inkhawm  hi ringtu hna a ni a, mahni hna thawk peihlo kan nih chuan Paula’n “Ei pawh ei suh se” a ti a ni. Rawngbawltu chin ngat phei chu tun aia uar zawka inkhawm kan chin ava tha em.

3. THLARAUAH

Thuthlung fate kan lo pian chhuahna atana pawimawh chu Thlarau Thianghlim hi a ni a, kan chakna ber pawh a ni e. Chuvangin “Thlarauva khatin awm rawh u” min ti hial anih kha.

4. LALPA A LAWM:

Nehemia 8:10 “Lalpa Lawmna chu in chakna a ni si a.” tih kan hmu a, Keini hi engah nge kan lawm ve thin le? Paula chuan “Lalpa ah chuan lawm fo rawh u, min lo ti bawk a, Habakuka paw’n “Lalpa-ah chuan ka lawm zel ang” a tih angin ‘Thil’-ah lawm mai lovin Lalpa a lawmna hi kan chakna a nih hriain Lalpa-ah i lawm ang u.

Awle, sawi tur tam tak a awm, kan sawi senglo ni mai teh se. Kan chakna theuh Pathian bawm hi I la leh teh ang u, tiin kan insawm a ni e.

Lalpa’n Malsawm Che U Rawh Se.

********************

JUNIPER VOL. XIX, ISSUE NO. 37; 13th SEPTEMBER, 2015

BETHLEHEM BIAL SUNDAY SCHOOL 

CONFERENCE VAWI 33-NA HMAN MEK A NI

Zirtawpni kalta, Dt. 11.Sept.2015 Zan atang khan Bethlehem Bial Sunday School Conference Vawi-33-na chu Bethlehem Biakinah hman tan a ni. Conference tan zan hian Evan Lalramzauva, Bial SS Director in inkhawm a kaihruai a, Rev. Ramtharpara, Bialtu pastor in Conference hlanna hun a hmang  a ni.

Hemi zan hian Bethlehem Bial chhunga Local Pathum-te intihsakna tan nghal a ni a,  Puitling Sunday  School leh Naupang Sunday School a lian pawl, (Intermediate leh Senior Department) ten Quiz ah inelna an nei a, tin, puitling Sunday School-te lengkhawm zaiin an intihsiak bawk.

Puitling SS Quiz-ah Rev Ellic Hnehzova chu Quiz Master a ni a, Naupang SS a lian pawl-ah Bro. Lawmsangkima chu Quiz Master a ni bawk. Intihsiakna hi hlimawm taka neih a ni a, boruak a nuamin an hlimtlang hle.

Nimin Dt. 12 Sept. 2015, Inrinni nileng khan rorelna neih a ni a, rorel hi Dar 10:30 ah tan a ni a, rorel bakah hian Local tin atangin leh Bial financial Secretary hnen atangin Report bengvarthlak tak tak ngaihthlak a ni bawk.

Rorel thu passed erawh he hun buatsaih lai hian kan hre hman ta lo a ni.

Inrinni zanah Conference hi chhunzawm leh a ni a, Upa K. Lalbiakthanga, Asst. Director, Bial Sunday School in inkhawm kaihruaiin Upa Vanlalbela hnen atangin Thuchah Tawi, Incheina tih thupui hmangin ngaihthlak a ni a, Junior, Intermediate leh Senior Department te thu Inchhang ah intihsiakna an nei a, NPSS a lian pawl-te lengkhawm zaiin an intihsiak bawk.

Vawiin Pathianni Dt. 13. Sept. 2015 Nileng leh zan hian Conference hi chhunzawm leh a ni ang a, intihsiakna hrang hrang neih leh a ni ang. Programme kimchang chu Phek 4-na ah tarlan a ni.

************************

SENIOR DEPARTMENT NOTICE

Senior Department Naupang zawng zawngte vawiin ah kal hma tur a ni a, Dar 9:00 ah NPSS Hall-ah kim vek tur a ni a, Intihsiakna tur Items ennawn a ni ang. Naupang zawng zawngten hei hi ngaihpawimawh tur a ni a, NU leh PA-te pawhin hei hi min ngaihpawimawh puia, kan fate kal hma theih na tura tan min lo lakpui turin kan ngen nghal bawk e. 

PRIMARY DEPARTMENT HRIATTIRNA

Primary Department Naupang zawng zawngte vawiin ah kal hma tur a ni a, dar 9:00 ah hall kawtah kim vek tur a ni. Nu leh paten kan fate kal hma theih na tura tan lo laksak turin zirtirtuten min ngen a ni.

USHER TURTE

Bial Sunday School Conference a Usher tura ruatte:

1) Bro. Lalmuanzuala

2) Bro. Lalchhuanawma

3) Bro. Lalhlimpuia

4) Mesak Lalnunfela

5) Laltanpuii Ralte

6) Baby VL Hruaitluangi

7) Esther Lalchhanhimi

8) Vanlalhumi

13 September 2015: PATHIANNI CHAWHNU

Chairman : Upa K. Lalbiakthanga

Thuchah Tawi : Rev JH Zahluna

Thupui : Zirna

Intihsiakna

1) Quiz : Beginners, Primary, Junior

2) Zaipawl : A lian pawl & A te pawl

3) Recitation : A lian pawl & A te pawl

13 September 2015: PATHIANNI ZAN

Chairman : Evan Lalramzauva

Thuchah tawi : Rev. Ramtharpara, Bialtu Pastor

Thupui : Fanau Enkawl

Result Puan & Report : Bro. FL Ramchullova, Secretary

Lawmthu Sawi : Bro. K. Liansanga, Asst. Secy.

BIAL SUNDAY SCHOOL DEPARTMENT HRUAITUTE

Director : Evan Lalramzauva

Asst. Director : Upa K. Lalbiakthanga

Secretary : Bro. FL Ramchullova

Asst. Secretary : Bro. K. Liansanga

Treasurer : Bro. Laltlanlawma

Fin.Secretary : Bro. Lalfelkima

Conference Recording Secretary

Bro. JH Lalhuansiama

CITY PYD SPORT

City PYD buatsaihin Dt. 19 September 2015 hian Rajiv Gandhi stadium Mualpui Aizawl ah City pyd sport neih a ni dawn a, Sport hi dar 9:30 ah tan tur a ni a,  Evan F.Lalngaihawma ‘n a hawng ang.

Bethlehem Bial chu Sound System ngaihtuah tura ruat kan ni a, items hrang hranga hmala turin hetiang hian ruat a ni bawk:

*Football - Bro Lalchhuansanga

*Tug of war- Bro Vanlalropeka

*Death ball- Bro James Vanlalhriata

*Mixed relay race- Bro Vanlalpeka Fanai

Bial tel zawng zawngte hnenah participation prize Rs.500 theuh pek a ni ang.

******************

Juniper Editorial (6 September 2015)

Fate Tawiawm...

Sunday School Conference chu kan lo thleng leh dawn ta reng mai a, Sunday School Conference a mite mit la ber leh kan ngaihven ber, kan ‘Main Event’ chu naupang intihsiakna hi ti ila kan sawi sual tam awm love. Conference intihsiakna atan hian zirtirtute an tang ang bawkin naupangte pawh an tang thei hle a, a bikin a te lam, primary leh junior department te phei hi chu an phak ang tawk hian an tangin thahnem an ngai ve thin a, chuti anih avang chuan Conference hi an ngai hlu a, an ngaipawiawm em em thin a ni.

Kan faten an ngaih hlut em em Pathian rawngbawlna ni bawk si hi nu leh pate hian kan hlutpui tawk lo ang tih a hlauhawm a, kan hlutpui chuan kan fate hian nuam an ti a, an phur a, inrintawkna an nei thin a, tin an thiltih kha thiltha a ni tih an hriatna tura phurpuia fuih sauh sauh hi a pawimawh hle a ni.

Naupang thenkhat chu an inkhawmpuiniah thahnemngai takin an theihtawp an chhuah a, mahse tawiawmtu hmel an hmuh ve loh hian hrehawm an ti a, hlulo bik riaua inhriatnate an neih phah thei thin a ni. Kan fate thil tha tih hi chu phurpui thiam ila, hmasawn zel turin leh ti chhunzawm zel tura fuihtu ah tang thin ila a duhawm hle mai.

Thawmhnaw thar neilo mahse an nu leh pate hnen atanga ‘Support’ tha tak an dawn chuan an hlimna a nep chuanglo a ni tih hria ila, nu leh pate hian kan fate thil tha tih hi i tawiawmin theihtawp chhuahin i phurpui hram hram thin ang u. Chu chuan thil thalo tih duhna lak ata a chhanhim thei a ni.

******************** 

Kawr Thar - C. Lalnunfela (Juniper Article 6 September 2015)

JUNIPER ARTICLE

KAWR THAR

C. Lalnunfela

Khawmpui kawrthar nei naupang ho chu hlim em em hian an nu leh pa, unau leh thiante nen chuan an ri laih laih a. Kil khat ah chuan Sangsangi chu ngui hmel takin amah chauhin a thu a, naupang hlim taka infiama in um kawi zawr zawrte chu awh hmel tak hian a lo thlir dauh dauh a. An zirtirtunuin a rawn hmuh chuan, “Sangte, engatinge i va hlimloh hmel ve, khawnge I nu?” a ti a, Sangsangi chuan a chhang lem lo. Mahse a hrethiam nghal mai. Sangsangi chuan inkhawmpui hma khan a nu hnenah kawrthar lei a ngen ve a, mahse a nu dinhmun chu naupangte mahnise a hrethiam em em a, awt ve em em mahse kawrthar nei thei dinhmunah a dinglo tih a nu chuan a hraithiam tir a ni. A pa damlai kha chu nise an fanu hmangaih em em pakhat chauh tan chuan chutiang han tihsak chu thil harsa a ni lutuk lem lo tur. Mahse an pa chuan chatuan ramah a hawsan tawh a, ani, nitina ei chawp dap tak meuh meuh tan chuan a harsa em atin ni. 

Lungngaih ni

Inkhawmpui ni a lo her chhuak a, Sangsangi chu a nu chuan kum hmasa krismas dawna an chhung lamhla deuh tawh tena an nau hak hlui an pek fai taka a suk chu a haktir a, a fanu chu rilru la thianghlim tih takah a nu hnenah chuan, “anu, Krismas-ah chuan kawrthar ka nei ve tawh ang tiraw?” a ti a, “mamte kan dam anga Pathian zarah kawrthar chu I nei em em ang”; “anu, ka mawi em?”; “Ka fanu hi khawvelah a mawi ber mai” a nu chu a hnuk a ulh teuh a, mahse a nu chaklo hmel chu a fanu chuan hmu se a duh silo a, insum hram hram chungin hlim taka inkhawmpuitura a fanu Biakin pana tlan liam ta chu mittui tla zawih zawihin a thlir liam ta kha a ni a.

“Ka tap Lalpa I ram ngai hianin; 

Chatuan Ram leh hmangaihte lenna chu,

Engtikah nge Lungngaih rumna,

Pela mittui tlak a hul ang?”

tih hla chu a rilruah a lo vawng vawng a. Zirtirtunu chuan a hrethiam em em a, Sangsangi chu lainat tih hriat tak hian a kuah ta vawng vawng a.

An nalhlo bik ang

  Ni, incheina hi a pawimawh khawp mai, puitlin tawh fe hnuah pawh hian thil thar leh thawmhnaw thar lawm hi a la rehthei lo chu nih si hi maw. Thuamhnaw pawimawhna hi sawi vek sen pawh a ni lo; a bikin puitling chin tawhah phei chuan kan incheina te hian kan awmna hmun a zirin mahni inrintawkna te min siam sak thei em em a ni. Mahse nu leh pa tam tak hi chu, abikin nu lampang hi an ni zual, kan faten an duha an ngen ngawih ngawih vang pawh nilo, keimahni zawk hian mi zingah an nalhlo bik ang tih hlauin rualawhna tullo tak kan fate tan kan nei a, kan ti thei tih vang hian unau nu, unaupa kan tih kan chheh vela mite hrehawm tih ngawih ngawihna tur a ni ang tih pawh dawn pha manglo hian kan ti leh mai thin. A then chu han in show nan deuh te pawh kan hmang amawni, kan lam te pawh hi Pathian fakin nge kan lama kan thawmhnaw fakna tih pawh hi ngaihtuah tham tak chu a ni. Tute kohhran hmeichhia ang deuha pulpit leh maicham vela an pangpar khawi leh an khawi dan sitail ringawt an rilrua a awm ang hi kan ni palh ang tih a hlauhawm khawp mai. 

Lal Isua incheina

Naupan laia khawmpui apianga thawmhnaw thar nei thin te pawh kha engteh ualah an inha chhuak lemlo chu nih hi maw. Keini lam hi chu kan la ziaawm viau a, khawmpui pawh nilo, thawhlawm khawntu nih avanga thawhlawm khawn dawn apianga kawrthar ngaih ziahna Kohhranah te phei hi chuan a neilo deuh tan chuan a va hrehawm dawn rua em. Chutih lai chuan lei leh vana ropuina zawng zawng neitu, kan Pathian erawh kha chu chhandamna kawngka min hawnsak tura leia a lo kal khan, hmun tlawm ber a rawn thlang chu a nih si kha; kan rawngbawl dan  leh kan Lal Isua Ideology hi chu inpersan tak a ni. Kross lera an khenbeh dawn pawh khan a chapal bun kha a pan tawh lutuk a, a hnuai a pawp hial tawh tih, ‘Khengbettu kutbawr chu’ tih ziaktu khan a sawi tak a sin. Neihloh tur kan ti chu a ni lo e; mahse hringnun hi incheina ringawt a ni lo, NUN a ni zawk kan ti mai a ni.

JUNIPER VOL. XIX, ISSUE NO. 36; 6th SEPTEMBER, 2015

BIAL SUNDAY SCHOOL CONFERENCE ZIRTAWP ZAN ATANGIN HMANG DAWN

Bethlehem Bial Sunday School conference chu tunkar Dt. 11 Sept. 2015, Zirtawp zan lo awm tur  atang hian hman tan a ni ang.

Conference-ah hian naupang Sunday School Tan intihsiakna hrang hrang buatsaih a ni dawn a, puitling Sunday School pawh Quiz leh Lengkhawm Zaiin an intihsiak ang. Thuchah tawi mi hrang hrang hnen atangin ngaihthlak a ni bawk ang a, ruat bik ten Thupui pawimawh tak tak hmangin thuchah an sawi thin dawn a ni.

Conference intihsiakna atan hian inbuatsaihna pawh ngawrh taka kalchhohpui a ni a, Bethlehem NPSS-te chuan nimin Inrinni Nileng kha inbuatsaihna hun atan an hmang a ni.

PROGRAMME

ZIRTAWP ZAN

Chairman : Evan Lalramzauva, Director

Conf. Hlanna : Rev. Ramtharpara, Bialtu Pastor

Intihsiakna : a) Quiz, PTSS, Senior, Intermediate.

 b) Lengkhawm Zai: PTSS

INRINNI CHHUN

ROREL : Dar 10:30

Report : 1) Local Tin atangin

 2) Bial Financial Secretary

INRINNI ZAN

Chairman : Upa K. Lalbiakthanga. Asst. Director

Thuchah tawi : Upa Vanlalbela, Bethlehem (10Mins)

Thupui : Incheina

Intihsiakna : a) Thuinchhang: Junior, Inter, Senior

 b) Lengkhawm Zai, NPSS A lian pawl.

THAWHLAWM KHAWN DAN TUR

Zirtawp Zan : Bial SS Pual

Inrinni Zan : Bial SS Pual

Pathianni Chawhma : Bial Mission Pual

Pathianni Chawhnu : A thlengtu Pual

Pathainni Zan : CBC Pual

************************

PASS THAR

Bro. Oliver Lalthlenglina chuan Mizoram University atangin Master of Library and Information Science chu First Class ah a pass.

Sis. Lalnunmawii pawhin  Master of Sociology First Division-ah a pass thar bawk.

Hlawhtling tharte an hlawhtlinna-ah Juniper Editorial Board chuan kan lawmpui hle a, an kalzelna turah duhsakna sang ber kan hlan nghal e.

USHER TURTE

Bial Sunday School Conference a Usher turin heng mite hi ruat an ni:

1) Bro. Lalmuanzuala

2) Bro. Lalchhuanawma

3) Bro. Lalhlimpuia

4) Mesak Lalnunfela

5) Laltanpuii Ralte

6) Baby VL Hruaitluangi

7) Esther Lalchhanhimi

8) Vanlalhumi

Usher tura ruat zawng zawngten mahni chanvo ngaipawimawh a, Conference tan zan atanga kim taka kal vek turin hruaituen min ngenin min hriattir a ni e.

***********************

Juniper Editorial 30 August 2015

Juniper enkawltute lu tihaitu...

Juniper chanchinbu chu kum 19 lai mai a lo chhuak ve ta a, a bul tan tirh lai ai chuan hmasawnna pawh hmuh tur tam tak a awm ngei ang. Chutihrual chuan chhiartute hriat siloh hian Juniper enkawltute hian harsatna eng eng emaw kan tawk ve neuh neuh a, a langsar ber chu chhuah tur tlem lutuk hi a ni. Article lut a tlem em em mai a, tunkarah eng nge kan chhuah ang? tih ringawt ngaihtuaha kar tluan a rilru sen chang hi a tam ta khawp mai. Voluntary work anih angin a enkawltute pawhin hna dang leh mahni pawimawh khawih tur kan lo nei ve neuh neuh hlawm bawk a, chanchinbu chhuah (journalism) lam zir leh hetiang lama tuimi kan lo ni bik lo bawk nen, lu hai map map chang hi chu a awm ve ta zauh zauh mai.

A buaipuitu nilova chhiartu nih hi chuan lo sawisela, phunchiar maite pawh hi a awl em em a, hetiang sawiselna leh phunchiarna thu te pawh hi kan hrethiam khawp mai. Amaherawhchu duhthlantur dang min pek chuan siloh chuan tih ngaihna awm loh chang hi a tam a ni tih chhiar tuten min lo hriatsak kan duh a ni.

Kan ngen duh chu, kan kohhrana ziakmite leh thuthiam deuhte han tang leh hlek ula, chhuah sen loh min han hlui teh u. Ziakmi mai bakah ziakmi ni lemlo te pawhin inzirna atan hmang ila, a tha emaw tha lo emaw, kohhran leh Pathian pawi sawilo anih chuan rawn thehlut pawp pawp teh u. Lawm takin kan lo chhuah zel ang. 

Juniper enkawltuten in thawhpuina kan mamawh e.

********************

At A NGAI - Rev. KVL Hmangaihkima (Juniper Article 30 August 2015

JUNIPER ARTICLE

AT A NGAIRev. K. V. L Hmangaihkima

At a ngai  a ni tih hian a tum chu i a em mai tih nawn kher pawh ngai lova mi a sate ang a awm ve tur tihna a ni lova. Entirnan mihringah hian zak thei leh zak lo thei an awm a, a hun leh a hmun azira a tul anga zak chung chuang pawha zak lo thei ho hi mi fel, mipui chunglam a lengte an ni zawk a ni. Chutiang ang chuan mi a ni lo, mahse at ngaih hun a a tul anga a ngam tihna a ni. At a ngaihna chhan chu hetang hian han sawifiah ila. Khawvel finna leh Pathian finna  a awm a, chung finna te chu a indo reng a, khawvel finnaah cuan chapona leh uanna te, midang tana harsatna te, indona te, amah siamtu Pathian theihnghilhnate a thlen thin a ni (Deut 32:15). Chuvangin Pathian hian khawvel finna aia finna leh thiltihtheihna chungnung neitu a nih zia tih lan a tum thung a, khawvel finna chu ka ti boral ang a, remhre remhriatna chu ka paih thla ang a ti a ni. (I Kor. 1:19-20)

Tichuan Pathian finna leh khawvel finnate chu indo tlat mai an ni a, mahse indonaah chuan tiat  leh tiat, thiltihtheihna inang leh hmanrua pawh intluk nei an nih chuan a chak lo zawk pawhin chhuanlam tur a nei thin a, a chak lohna chu vanduaina angah chauhte ngaiin a rilru a tlawm tel thin lo a ni. Chuvangin Pathian chuan khawvel finna tih mualpho a tum danah chuan kawvelin chhuanlam tur a neih hi a remti lo a ni. Chuvangin tiat leh tiat inbei anga lan tum lovin, a lan danah chuan a chan chhe zawk chang ngei ngei tur anga ngaih theih turin hmanrua ho te te a hmang lui tlat thin a ni. Khawvel finna atanga chhut chuan thil ni thei lo, thil ho, hmanrua a hman tur awm ang chi ah pawh ngaih loh thilte hmangin khawvel finna leh theihnate chu tih tlawm a tumin a titlawm thin a ni. 

Tichuan khawvel finna chuan anmahni hnehna hmanrua chu an han en a, ho an ti a, mak tihna an nei bawk a, chuvangin an finna leh theihna aia chungnung a awm a ni tih leh an pathian aia chak Pathian a awm a ni tih an lo hriat phah ta thin a ni. Chuvang alawm khawvel finna tih mualphona tur a Pathian hmanrua atan a min pek apiang hi hmang hreh lo turin i a ngam ang u. Mahni inngaihlu a, chhang pawh nei si lo ai chuan, tuma ngaihsan loh chhiahhlawh nei chu a tha zawk tih a ni (Thufingte 12:9). 

Chuvangin Pathian hman theih a awm tur leh hman tlak ni tur chuan, kawvel finna te, a chankang leh a mawi leh a tunlaite kalsan fo a ngai a. Kan neih ve theih rengte nei lova kan awmte a ngai fo bawk a. Mi mamawh angte kan mamawh ve tho va, a mamawh hlei hleite pawh kan ni a. Tin, thenawmte pawhin an nei a, an pum a nat phah si lo. Kan tana tih ve mai awlsam lutuk tur ten min hual vel a, mahse kan tisa mamawh apiangte hi kan thlarau lam nun tan hrisello tak a nih theih thin si avangin, mi a leh changkang pawh thlir phak lo ang maiin kan kalsan a ngai si thin a ni.

Chuvangin kan at vang leh mawl bik vang ni hauh silo hian mi aho tih kan hlawh fo thin a ni. Mahse he khawvel finna te hi Pathian ngaih chuan atna a ni si a. Chuvangin Pathian ngaiha mi fing ni turin khawvel ngaihah hian i a ngam zel mai ang u. Lalpa chuan mi fingte ngaihtuahna chu a thlawn a ni tih a hria, tih ziak a nih kha (I Kor 3:18-20). Kohhran hian sum leh mi thiam kan mamawh, khawvel hnam hrang hrang huapa rawngbawl kan nih avangin mizo tawng chauh nilo tawng dang pawh hmang thei lehkhathiam leh hma thlir nei thiamte kan mamawh em em a ni. Mahse Pathian hman theih leh a hmanrua iai lo nih a ngai si.

Kohhran hote hian hmun lo ram leh building thate, zirna sikulte, damdawiinte kan mamawh. Tin, biakin thate pawh kan mamawh em em a ni. Khaw tina biakin chhe pawl neih ziah hi a zahthlak. Mi ten thil tisualtute anga min sawichhiat kawngah pawh, kan thil tih thatte an hmuh avanga Pathian an chawimawi theih nan, khawvel mit hmuhah hian kan inpholan ve hi a ngai a ni. (I Pet 2:12). Mahse Israel ten Gideon-a hova midian ho leh Amalek hote do hneh nan belruak leh meichher leh tawtawrawt an keng ngam ang khawn kan hmsawnna hian Pathian hmanruate min iai tir lo se la, Lalpa pek ang apiang hi i inbel ngam zel ang u tih hi kan thunawn ni reng rawh se.

Rawngbawl hna hi eizawnna chi khat anga ngai lovin, Pathian min kohna chin thleng phak turin rawngbawl ila, kan kianga hnam dangte tih dan leh chin dan it-na hmangin in ti chhe lo ila, Lalpa min dahna apiangah lungawina nen hmalam thlir ila kan thlen china lungawi thiam chungin hmalam pan zelna chang erawh hria ila a tha. Hlawh hmutlakin thawk ila, ram nuamlo leh hrehawmte chu chenna tlak a siam turin i thawk ang u.

Rawngbawltu nihna tur dik tak chu duhlohna lam a kaih theih hi  a ni. Kan rilru a lang leh kan duh dan chinah te, kan peih tawk ang chiaha kan thawh hian nang chuan i mawhphurhna tlak ta huai niin i in ngai mai thei, mahse rah a chhuah em? A rah a tha em? tih hi a  pawimawh! Thusawi hlawhtling leh hlawhtlinglo chu a ngaithlatute ngaihdanah a innghat thin. Rawngbawltu hlawhtling ni tur chuan Pathian thawhpui nih a ngai. Pathian thawhpui tlak ni tur chuan hmanrua min  pek apiang leh min hunna chin zela lungawi thei khawvel ngaiha at a ngai a ni.

JUNIPER VOL. XIX, ISSUE NO.35; 30th AUGUST, 2015

NPSS TEN REHEARSAL NEI DAWN

Naupang Sunday School Department chuan September ni 11-13, chhunga hman tur Bial Sunday School Conference lo awm turah nasa takin an inbuatsaih chho mek a,  intihsiakna items chi hrang hrang - chang, thuinchhang, zaipawl, malzai, recitation leh lengkhawm zai-te an zir chho mup mup reng a, Pathianni a an zir mai bakah zing leh tlaiahte pawh inbuatsaihna hi an kalpui chho zel a ni. 

Inbuatsaihna kawng khat atan zanin Pathianni inkhawmah Dress Rehearsal an nei dawn a, hemi tur pawh hian an inbuatsaih nasa tawh hle a ni. Dress Rehearsal hi kum dangah pawh lo neih tawh thin a ni a, naupangin an hlawk phahin, conference hun tak taka an zam chhe lutuk tur pawh nasa takin a chhawk zangkhai thin a ni.

Kan fate hun hman hi nu leh paten kan tawiawm tam a tha hle mai. Kan fate’n tawiawmtu hmel an hmuh ve loh hian an rilru a hrehawm a, rilru nuamlo in, ngaihsak loh bik ang hialin an ingnai thei a ni. Tin, nasa taka kan tawiawm hian phurna nasa tak an neih phah thei a, tin, amahniah inrintawkna nasa tak a pe thei bawk a ni. 

***********************

LOCAL PYD EXECUTIVE MEETING NEIH A NI.

Pathianni kalta 23 August 2015, chawhma inkhawm ban khan Local PYD Ececutive Committee chuan naupang Sunday School Hall-ah Meeting a nei a, rorel tlangpuite chu-

*. Lalliana Group Assistant Leader Bro. K. Malsawmtluanga chuan phai lamah a zirna a chhunzawm dawn avangin, Lalliana group Asst. Leader post chungchang hi ngaihtuah a ni a, kum chawhnu lam a ni tawh a, hmalakna hun a tam vak tawh loh avangin Asst. Leader post hi hnawh khah loh mai nise. Leader leh OB ten hmui mai se tiin thuthlukna siam a ni.

* Thlamuantu Chanchinbu semtu Bro. K. Malsawmtluanga a hman dawn tak loh avangin a aiawh turin Bro. Lalhmingsanga chu ruat a ni.

************************

LOCAL ZAIPAWL NEWS

Evan C. Mangthangvunga te inneihna a sak tur hla zir chhunzawm zel a ni a, a hun a hnaih tawk avangin hla zir pawh a tam thei ang ber koh a ni ang.

Vawiin Pathianni chawhma inkhawm ban hian Biakinah hla zir koh nghal a ni a, Zaipawl member-te kim taka kal vek turin Hruaituten min ngen a ni. Hla zirna hun a tam loh avangin Member-ten hla zir hi ngaipawimawh ila, kan kohhran hmel lanna anih avangin thahnemngai takin hla i zir tang tang ang u.

LOCAL ZAIPAWL NEWS

Evan C. Mangthangvunga te inneihna a sak tur hla zir chhunzawm zel a ni a, a hun a hnaih tawk avangin hla zir pawh a tam thei ang ber koh a ni ang.

Vawiin Pathianni chawhma inkhawm ban hian Biakinah hla zir koh nghal a ni a, Zaipawl member-te kim taka kal vek turin Hruaituten min ngen a ni. Hla zirna hun a tam loh avangin Member-ten hla zir hi ngaipawimawh ila, kan kohhran hmel lanna anih avangin thahnemngai takin hla i zir tang tang ang u.

PRAISE & WORSHIP HUN HMANG

Bethlehem Bial Zaipawl chuan kar kalta Ningani, Dt. 27, August 2015 khan Bethlehem Kohhran Biakinah Praise  & Worship hun hlimawm tak an hmang. He hunah hian Zaiho leh infuihtharna an nei a, kal ten hlawkthlak an tiin, hlawhtling an ti hle.

********************

AIZAWL CITY PYD COORDINATION COMMITTEE THUREL:

Ni 22 August 2015 a Aizawl city PYD Co-ordination committee meeting thurel tlangpuite:

1) 2015 Social work day kan hman dan thlirletna neih a ni a. A tha thawkhat hle in kan hria a. Hmasawnna tur erawh a awm nual in kan hria.

2) Rajiv Gandhi stadium Mualpui Aizawl ah Dt 19th Sept 2015  a City pyd sport neih tur chu dar 9:30 ah tan tur a ni a, hawng turin Evan F.Lalngaihawma ruat a ni.

Sound lo ngaihtuah turin Bethlehem bial ruat an ni. Stadium enkawltu JE lo be turin bro MS Dawngliana ruat a ni.        Items tina i/c ruat te chu 6 Sept hma in lo inhmukhawm se tih a ni. “Items tina Leader tur te-

*Football - Bro Lalchhuansanga

*Tug of war- Bro Vanlalropeka

*Death ball- Bro James Vanlalhriata

*Mixed relay race- Bro Vanlalpeka Fanai

Bial tel zawng zawngte hnenah participation prize Rs.500 theuh pek tur a ni.

HRIAT TUR PAWIMAWH

1) Bial tinin refreshment intum tur 

2) Bial tinin football 1 ken theuh tur

3) Incharge ten hmanraw tul dang chu an ngaihtuah ang

4) Bial tinin silpaulin leh thirzai ken nise, daihlim a awm loh avangin mahni inzar chawp a ngai.

5) Mahni bial member theuh te control nise, hlim leh inpawh tlang taka kan hman theih nan.

6) Budget la pe lo ten sport hma ngeiin pek nise.

7) A hun taka tan thei turin kal hma nise.

8) A tam thei ang ber kan kal theih nan bial hruaitu ten hmalak nise.

*************************

NAUPANG PUAL...

BIBLE HRIAT NAN

* Bible a mihring upa ber chu Mathusela a ni a, kum 969 a dam. (Gen.5:27)

* Bible ah hian mi 2 thi ve lo an awm, Enoka leh Elija. Enoka hi Mathusela pa a ni.(Gen 5:25, 2 Lalte 2:11)

* Bible a mihring sang ber chu Goliatha a ni a, Feet 9 leh a chanve a sang a ni. (1 Samuela 17:33)

* “Christian” tih thumal hi Bible-ah vawi 3 chiah a lang. (Tirhkohte Thiltih 11:26, 1 Peter 4:16, Tirhkohte Thiltih 26:28)

* Bible-ah hian Sabengtung tawngthei chanchin a inziak!! 

(Numbers 22:28...)

***********************

Juniper Editorial 23 August 2015

JUNIPER EDITORIAL

Kei leh ka thenawmpa chu mi hrang kan ni a, kan inthenawmna hi kan in hnaih nachan chu a ni mai a,mahsela in kawm ngeih tak kan ni, ani nen chuan kawng tam takah kan in ang lo khawp mai, duh zawng leh lawm zawng  pawh a dang. Ani chuan zing taka thawha Vanglaini chhiar nuam a ti, kei chuan tlai lam chhuak chanchinbu ka chhiar thung. Nimahsela, in anna kan nei a ni, Vanram kai kan tum ve ve a ni. Kohhran hrang, tum in ang kan lo ni a, biakin in ang lo tak ah kan inkhawm thin a, kan inzirtirna pawh a in ang lo khawp mai. Ka thenawmpa chu a awmna kohhran ah chuan a hlim em em a, an Kohhran an hlim chang te hian chhim ve tur hian min sawm thin a, kei pawn lo inkhawm ve tur pawhin ka sawm fo reng a ni. Mahse kan in tawiawm a rem tlat lo a ni. Ka thenawmpa nena Pathian faka zaia lam hi ka suangtuah fo thin, ani pawhin a chak ka beisei thin, “Engatinge thenawm in hnaih tak si hi Pathian thu hian min then tlat thin le” tiin ka in ngaihtuah chang a tam. Indona puangin ka thenawmpa ka do dawn em ni ang, chutiangin remruatna siamin hma la chho ila enge a hrin chuang ang, ka thenawmpa hlawkna hi ka tan chuan hlawkna a ni. Pathian thu sawipui dawn ila, ani chuan tha takin minlo ngaithla mai a, kei erawh chu hre ve tawka ka in ngaih avangin a thu sawi ngaihthlak chu ka tum lo hrim hrim a, ka thu sawi zawm tura ka duh lai hian a thu sawi chu engah mah ka ngai lo thung. Ka hriat hi hre ve se ka ti em em thin a, anin hriat a nei ve lo emaw tih mai tur khawpin, ka zawm turs leh ka tih tur aimah hian ka thenawmpa zawm tur leh tih tur chu ka thupui zawk a, ka Van kawng ai mahin ka thenawmpa van kawng chu ka buaipui ta zawk a, ka dik lohna aimahin ka thenawmpa diklohna chu ka hmu lian ta zawk a. Mahse ka thenawmpa chuan Hmangaihnain min lo dawh char char zawk hi a lo ni a...

Inkhawm Kalphung - Rev. JH Zahluna (Juniper Article 23 August 2015

 INKHAWM KALPHUNG

Rev. JH Za Hluna

Kohhran a lo zahawm nan te, Kohhran chu mimal aia a ropui zawk zia a lan zel theih nan te, Kohhranah chuan muk tak leh puithu zawk, rau tak bawk sia Pathian dan thute zawm a nih zel theih nan te inkhawm dan kalphung zahawm tak a awm a. Pentecost Thlarau mite zingah Kohhran aia mahni rau chan dah lian zawk leh, mahni duh dan chu Kohhran kaldan tur emaw ti khawpa Thlarau chapo chang kan tam hle thin. Chuvang chuan Kohhran inkhawm dan kalphung hi kan zira, chumi mil tura mahni kan inher rem a pawimawh. Keimahni milin Kohhran hi kaih her kan tum tur a ni lo va, kohhran milin keimahni kan inher rem zawk tur a ni. Hei tak hi UPC Kohhran kan buai fona chhan bulpui a ni.

Kohhran inkhawmah chuan Chairman hi hna pawimawh tak chelhtu a ni. Chairmanin kaihruai lova tu tu te’n emaw lamtual atang te, mahni thuthmun atangtea inkhawm an rawn kaihhruai hian Kohhran zahawmna a bo va, inkhawm a deldul a, thenkhat tan ninawm a lo ni thin a ni. Hlasak hun te, tawngtai hun te, thuchah ngaihthlak hun te hi chairmanin vawn tlat tur a ni. A duh duhina ‘chumi hla chu i sa leh ang u’ an tih mai mai theih khawpa chairman hi zahawm lova awm tur a ni lo. Hla pawh hi chairmanin Kohhran boruak ena thlan a tha ber. Mahni tuipui zawng leh lung tileng zawng ni lo, kohhran boruak a zira kan tuipui ngei tur thlan mai tur a ni. Tute’n emaw an mahni mimal boruak atangin emaw, an chhungkaw boruak atang emawa an thinlunga hla lo lang an thlan thin hian, an boruak tawn ang tawng velo mipui tan tuipui a har thin a ni. Kan kaihhruaina hian mipui a huapzo ngei tur a ni.

Tantu hna hi hna pawimawh tak a ni leh a. tantu hi inkhawm Pathian hnena hlan tura ruat an ni a, chuvangin hun hmasa lama koh thin an ni. Tunlaiin tantu hi kan hriat sual nasa ta hle mai, tantu te’n thusawitu hmasa emaw an inti niin a lang. tantu nihna changute te hi inbuatsaih chiama sermon thlak ve ringawt tur an ni lo. Tantu chuan Pathian Thu sawi fiah ngai lova fiah sa Bible chang chhiar a tawngtai mai tur a ni. Chairman leh tantu tun chuan Pathian Thu tha leh fiah sa,  Sam le Thufingte atang te leh fakna hlabu lam te leh, Isua zirtirna fiah leh lang tlang  ho hi chhiar thin tur a ni. Zawlnei te thuril pui pui leh hun lo la awm tur chanchinte hi , sawifiahna hun a awm loh avangin Chairman leh tantu dinhmun atanga chhiar chi an ni lo tih hriat a tha.

Thuhriltu hi Inkhawm hun chanve aia tam mah pek kan nih thin avangin fimkhur a ngai hle. Thuhriltu tamtak chuan kan thusawi hunte hi kan huatzawng te beih nan te, mahni chhungkaw chanchin sawi nan te, kohhran rorelna a kan tel vel lohna thil sawina remchangah te hman kan chang fo thin. Thuhrlitu chu inkhawm hote Pathian thutaka chawmtu tura ruat an nih avangin tawngtaina nen uluk taka inbuatsaih tur a ni. Pathian Thu hi a nihna taka sawi a pawimawh a, mahni dinhmun tinghet tur emaw, kan huat zawngte inhmuh chhuah nan leh an chan tichhe zawng tura kaihlek tur a nillo.

Pathian Thu awih lo tute chu eng anga hausa leh mihrinna lam a zahawm pawh ni se, Pulpit tlang atangin thiam chantir ringawt tur a ni lo. Milian leh mite ber pawh a tha chu tha, a dik chu dik leh a dik lo leh tha lo na na na chu thalo leh dik lo kan tingam tur a ni a, an dik lohnaah thiam loh kan chantir mai tur a ni. Pathian Thu sawituin mahni duhna leh chakna tihpuitlin tuma rei pui pui sawi ringawt tur a ni lo. Pathian kohhran ho mamawh leh phak tawk zela ngaithlatute zah taka thusawi a pawimawh. Thuhrilru thenkhat hian kan chezia leh tawngka chhuakah mipui lam zah lohna leh deuna lama ngaih theihin thu kan sawi lek lek thin a, hei hi a tha lo. Kan thusawi ngaithlatute hi kan hnuai chhiah tur a ni lova, an rawngbawltu, an hnuaia awm kan ni tih hi kan inhre reng tur a ni. Thuhriltuah pawh, a engah pawh hian ‘THLARAU DAWTHEI” a awm theih thin avangin, thlarau dawtheiah kan tang tur a ni lo. Pathian min pek chin zel kan sawi hi a pawimawh hle a ni. Tin, tute tihdan emaw, an fiamthu thawh dan emaw chena copya thusawi hi mite’n an ei vak lo. Xerox copy ai chuan Original nge nge hi mite’n an duh zawk thin a ni. A bik takin tirhkoh zingah rawngbawltu hnungzuia kal tawh thinte’n an zui thina te an copy duh viau a. Inzui ta na  na na chu eng emaw laia tihdan in lak mai hi chu a awl hle thin a. Chezia leh thusawi dan hmang inchhun satliah hi chu a pawi lo, tawngkam hman dan leh fiamthu chena a ngai ang diak diaka kharchhawn hi chu a mi den a na lo duh deuh.

Khuangpu leh hla chang sawitu hi tun dinhmunah chuan Kohhran inkhawma chanvo pawimawh tak a tling ta. Tawngtaina leh inhlanna uluk tak neia hla hruai leh hla chang sawi hi thil pawimawh tak a ni. Mipui lam tui leh tui loh ngaihsak lek lova mahni tuina kalpui mai tur a ni lo va, tui loh na na na chuan hlate hi laknawn kher pawh a ngai lo. Hla sak a ni emaw, Pathian Thusawi a ni emaw,ning rawih khawpa tih hi a tha lem lo, a tlangpuiin kham lo lam zel hi a tha zawk.

Kohhran hi tunlai atan mai a ni lova, Lalpa lokal leh hma zawnga awma, Krista mo ni tura vana lak chhoh tur a nih avangin duhthawh tak te, hmahmawh tak tea kalpui rum rum tur a ni lo. Vawi hnih khat hla thlan sual avanga tawp mai tur a ni lo va, tu emaw rau avanga nung a ni hek lo. Zion Pathian khawpui, a mite himna tura Lalpa ruat leh din a nih avangin zahawm tak leh tha tak, rau tak leh fimkhur takin a kal zel dawn a ni. Pathian Thlarau hruaiin, kan zavaia tuna hlawk leh hlimawm thei ang bera kalpui tur a ni.

LALPAN kan zavai atan malsawm rawh se, AMEN

JUNIPER VOL. XIX, ISSUE NO. 34; 23rd AUGUST, 2015

REVIVAL CRUSADE HLAWHTLING TAK NEIH A NI

Bethlehem Kohhran huaihawtin August 3 atang khan Revival Crusade hlawhtling tak buatsaih a ni a, kohhran member-ten an hlut in an hlawkpui tlang hle a ni. Crusade programme hi vawiin thleng hian la hman chhunzawm zel tur a ni a, ruahman lawk dan chuan zanin thleng hi a awh ang.

Crusade chhung hian speaker, mi hrang hrang hnen atangin Pathian thu tha tak tak ngaihthlak a ni a, inkhawm a nuamin thu ngaihthlak a nuam a, Pathian faka zai leh lam pawh a nuamin a hlimawm thei hle a ni.

Tluang takin Programme hman a ni nachungin kohhran chhungkuaah chhiat tawk an awm avanga programe a khaihlak hlek tih loh chu tluang takin crusade hi neih a ni a, mi tam takin an hlawkpui hle a ni.

BETHLEHEM BIAL PYD MEETING ROREL TLANGPUITE

* Thla tin PYD inkhawm hmasa berah Evan H. Lalbiakzauva, AED, PYD Missionary pualin tawngtaina neih thin tur a ni.

* Dt 24 August 2015 hian Aizawl East District Kumpuan Sub-Committee ten Bethlehem Biakinah an nei dawn a ni. (Crusade chhunzawm anih chuan inkhawm hi Hermon-ah neih a ni ang)

* Dt. 6-8 November 2015 chhunga Lunglei Rahsi Bial in Bethlehem Bial tlawh an rawn dilna chu pawm a ni.

* City PYD Sport 19 September 2015 a neih turah hetiang hian ruahmanna siam a ni-

Football - Bethlehem Local atangin mi 11 thlan chhuah a ni ang.

Relay Race - Sis. Lalremruati & Jacob Lalhriatrenga

Death Ball - Hmeichhia 8

Tug of War - A kalte atangin

* Bial PYD Huapin T-shirt siam a ni anga, a rawng atan a pawl tak thlan ngal a ni.

*******************

** RAWNGBAWLIN CHHUAK

Evan Robert Lalrinsanga chu Serchhip DInthar Bial, Bungtlang khua a District Revival Crusade hman mekah Speaker ah tangin rawng a bawl mek a, amah tawiawm hian Bro. John Lalnunpuia, Bro. Lalrinchhana Royte, Bro. Vanlalringa leh Bro. Lalfakzuala-ten an  zui a ni.

PYD COMMITTEE KOHNA

Vawiin Pathianni chawhma inkhawm ban hian Local PYD Executive Committee pawimawh tak koh a ni a, member-ten ngaipawimawha, kim taka kal vek turin hruaituten min ngen a ni e. A hmun chu chiang zawka inhriattir leh tur a ni ang.

BIAL PYD T-SHIRT SIAM DAWN

Bethlehem Bial PYD chuan bial huapin T-Shirt mawi tak mai, a pawl tak rawngin a siam dawn a, hemi atan hian Local PYD OB ten PYD member tinte hnenah survey an rawn nei dawn a, member tinten lo order theuh turin Bial Hruaituten min ngem a ni. T-Shirt hi City PYD Sport 19 September 2015 a neih tura hak hman tura ruahman a ni. A man hi Rs. 300/- aia to lo tur a ni ang.

TANPUINA KHAWN DAWN

Naktuk, Pathianni zan inkhawmah hian Thingsulthliah Bial, Sesawng Vengpui Biakin sak tanpuina tur chu puan pawt pharhin khawn a ni dawn a, kohhran member tinte tanpuina pe tur hian lo inring lawk a, phal ang tawk tawk pe tura sawm kan ni e.

***************

JUNIPER EDITORIAL Dt. 16 August 2015

JUNIPER EDITORIAL

Intihhmuh..

Mizote hi intihhmuh ching tak leh mite tih chu tih ve tur emaw tih ching tak hnam kan ni a, nunze nghet lo lanna kawng khat pawh a ni reng a ni.

Damdawiah pawh thenawmnu in a ngeih chu ngeih ve tur emaw ti tlatte, eizawnna ah pawh miin a hlawkpui chu hlawkpui ve tura inngaih ngawtna te kan nei lian hle. Hei hi   chhia leh tha hriatna thiang hman tlem vang ti ila kan sawi sual tam awm love. 

Pathianin mihring a siam hian a hrang hlak vekin min siam a, hmel leh pianphung bakah rilru puthmang, mizia leh nunchang thlengin inang reng kan awm lo. Chumi anih avang chun kan nun kan hman dan pawh mite ang nilovin mahni in hrechiang hmasain kan tana tha tur leh hlawk tur chu ngaihtuah zawk tur a ni. Mahni inhriatchian hi thil har tak a ni a, amaherawh chu kan tum ngei ngei tur erawh a ni thung.  Eizawnna kawngah a ni emaw, thlarau nunah a ni emaw, nitin nun hmanna ah a ni emaw, mite hlawkpui ang kha ka hlawkpui ve kherlo thei a, ka hlawkpui tur chu keimahin ka ngaihtuah chhuak tur a ni. Kan taksa Pathianin a duan dan pawh a inan loh avangin mite dampui ang kha ka dampui ve kherlo thei a, ka taksa mil tur hre turin doctor ka rawn a ngai a ni.

Miten an tih avanga tih ve ringawt hi ka tan a tha em? Ka tan a tul ve em? tih hi inzawt hmasa thin ila, kan tan a tul ve lemlo a, kan hlawkpui ve dawn lemlo anih chuan mite tih vanga tih ve kher kha a tulna a awm chuang lovang.  Chutiang pumpelh tur chuan mahni kan inhriatchian a, rawn tur dik kan rawn a pawimawh hle.

Thuthlung Kha Rawn Pawisa Ang Che - K. Lalfamkima Juniper 16 August 2015 Article

JUNIPER ARTICLE

THUTHLUNG KHA RAWN PAWISA ANG CHE

(Sam 74:20)
K. Lalfamkima

Khawnge kan ar mit tet khuan ve awl awl mai teh ang.
Ka hriatna leh ka thiamna erawh a tlem tih hrereng maih ila, a tlem avanga puang chhuah lo ringawt erawh ka ui ve ting bawk si a, ka hriat ang ang kan tiri ve ngawt mai teh ang. Thinlung leh tihtakzet erawh chuan min lo chhiar chhuah sak hram dawn nia.

DAVIDA CHUNGCHANG THU:
David-a leh Jonathan-ate khan an dam chhung atan thian rinawm ni turin thu an thlung a; Jonathan-a khan David-a chu engtikah emaw lal ala ni dawn tih a hre reng a, chuvang chuan a hnenah, a thlahte lo la awm zel turte chunga zahngai turin a ngen lawk a ni.

Jonathan-a thih hnuah pawh David-a chuan an inkara thuthlung kha a hre reng a, mahse Jonathan-a fate emaw Saul-a fate emaw an la dam leh dam lohte an awmna chinte a hre lova, lal Saul-a chhiahhlawh lo ni tawh mi pakhat Ziiba chu a kova, “Lal Saul-a chhungkaw zinga la dam hriat i nei em? an la awm chuan an chunga Pathian ngilneihna lantir ka duh a ni” a ti a. Ani chuan, “Pakhat ka hria, a la dam a, chumi chu Mephibosetha, Jonathan-a fapa a ni a, a ke pawh a bai nghe nghe,” a ti a. Davida chuan, “Khawiah nge a awm?” a ti a, Ziiba chuan, “Heta tanga hla vak lo Lo-dibar-ah Amiela fapa Makira inah a awm.” a ti a. Tichuan Davida chuan a rang thei ang bera Mephibosetha chu a hnena hruai turin mi a tir a, mahse Mephibosetha chuan a hlauva, a pu lal Saul-a khan Davida chu thah tumin vawi tam tak a bei tih a hre reng si a. Tunah hian chu phuba chu a la ve mai ang tih a hlau hle mai a, mahse David-a chuan “Hlau suh, tihnat che ka tum reng reng lo. Puih theihna che ka nei dah law’ maw tiin ka inah hian ka ko zawk che a ni. Hmanah khan i pa hnenah i fate chungah thatna ka lantir ang tiin ka lo tiam tawh a, chu chu ka la vawng reng a ni. I pu lal Saul-a ram lo ni thinte kha ka pe let leh vek ang che a, chubakah ka hnenah lal inah hian khawsa ve la ka duh a ni” a ti a.

Mephibosetha chuan mak a ti lutuk a, leiah a bawkkhup a, “Aw lalber, chutianga thatna zozai chu ka chungah engtin nge i lantir theih zawk le a ti a.” Davida chuan, Ziba chu a kova, “I pu tupa Mephibosetha hnenah hian a ram lo ni tawh zawng zawng kha ka pe let leh a, nang leh i faten a ram chu enkawl sak ula, a ni hi chu ka hnenah a khawsa ve ang.” a ti a. Chuta tang chuan Ziba leh a chhungkuate leh a chhiahhlawh mi sawmhnihte chuan Mephibosetha ram chu an enkawl a, buh leh bal an ching a, Mephibosetha erawh chu lal David-a inah chuan a khawsa ta thung a. David-a fapate ang maiin a khawsa ve ta a ni.

Khawevel sawrkar hrang hrang hian an thenawm ramte leh ram dang nena an insumdawn tawnna tur atan emaw ramri chungchangah emaw an mi leh sa an mante emaw inthlengin thu chi hrang hrang an thlung thin a, chuta a bawh pelh leh a tisualte chu nasa takin an bei mai thin a ni. Chutiang bawkin Pathian hian kan hnena thuthlung min pek hi rinawm taka zawm turin leh a thuthlunga dingnghet turin min ko a ni. Lal David-a pawh hian a thian a kawmngeih em em leh a thurualpui ber mai lal Saul-a fapa Jonathan-a nena an thuthlun chu hrereng in Jonathan-a fapa la dam chhun Mephibosetha, ke bai lehnghal chu lal Inah, lal dawhkan kil ve turin a dam chhung zawng awm tura lal Davida’n a ti ang hian keini pawh hian kan thuthlung tuiah leh thlaraua kan pianthar hi a van pawimawh dawn tak em! Tuiah chauh kan pian a, thlaraua kan pian leh siloh chuan awmzia a va awm dawnlo tak em! Tui Baptisma ringawt hi a pawimawh a ni lova, tuiah leh thlarauah a ni kan piantharna tur chu. Chaw kan ei hian chawhmeh kan ei tel zel thin a, kan lo puar ta ang hian tuiah leh thlarauah kan pianthar a ngai a ni. Tui leh thlarau hi inkawp tlat a ni a, chuvangin a pawimawh hle a ni. Lal ISua’n a zirtirte hnenah a thawhleh khan a inlar a, vana a lawn dawn khan thu a thlung a - ‘Lal Isuan a chhang a, “Tih tak meuhin tih tak meuhin ka hrilh a che, mi tupawh tuiah leh thlarauah an pian loh chuan Pathian ram an lut thei lo ang.” - Johana 3:5 tih kan hmu a ni.

“Thuthlung kha rawn pawisa ang che, lei hmun thim laite chu nunrawnna awmna in a khat si a” Sam 74:20

Lalpa’n a thu chhiar tute mal min sawm theuh rawh se. AMEN.

Juniper VOL. XIX, ISSUE NO. 33; 16th AUGUST, 2015

UPC(NEI) IN TUILIAN TUARTE TAN TANPUINA PE

General Administrative Committee-in tun hnaia tuilian avanga harsatna tawktu  kohhran mite chu a theih anga tanpui nise a tih angin a hmuna tlawha tanpuina pe turin Rev. Lalmalsawma Sailo, General Superintendent leh Rev.  Zohmingthanzama, General Treasurer  te chuan August 12, Nilaini khan Aizawl chhuahsanin Chandel District, Chakpikarong- an pan a, Chandel District hruaitute nen atul ang anga bawhzuiin hun an hmang ang. Ruahman dan chuan August 15, Zirtawpni hian Aizawl panin an kirleh dawn a ni.

He tanpuina atan hian Gen.Supdt. Relief Fund atangin Chakpikarong, Chandel Dist. tanpuinan cheng nuaikhat an pe dawn a, Chakpikarong-a Relief Camp pathum - Rungchang UPC compound, Ravlon village leh Beula Village-te tan cheng singkhat theuh an pe bawk ang. Chakpikarong hi meeting hmasaah cheng singnga a tanpui ni se tih pass a ni tawh a, mahse rin aia chhiatna a thlen nasat avangin tanpuina tur sum hi pun belh a ni. 

Tin, Myanmar-rama Mizo awmte leh kohhran mite tanpuina tur atan pawh cheng Nuaikhat pek tura pass a ni tawh a, a theih anga rangin Myanmar lam pawh hi tanpuina hna thawh a ni ang. Sum leh pai, thuamhnaw leh ei leh in tur bakah an mamawh hrang hrangte tanpuina tur atan August thla chhung hian kohhran mi leh a duh a piangten mahni remchan dan ang angin District Office tinah tanpuina hi pek luh ni se tiin UPC (NEI) Headquarters chuan mitinte a sawm a ni. Tin, UPC International Headquarters, America- hnen atangin tuilian tuarte tan tanpuina tur donation pawh dil a ni ang.

**BIBLE ZIRHONA NEI

Kar hmasa thawhleh zan khan Bethlehem Bial P.Y.D Kumpuan Sub-Committee hmalaknain Bible zirhona Bethlehem NPSS Hall-ah neih a ni a, Resource Person atan Evan. Lalchhuanmawia Sailo hman a ni a member kalten an hlawkpui hle niin kan hria.

**BIBLE ZIRHONA NEI

Kar hmasa thawhleh zan khan Bethlehem Bial P.Y.D Kumpuan Sub-Committee hmalaknain Bible zirhona Bethlehem NPSS Hall-ah neih a ni a, Resource Person atan Evan. Lalchhuanmawia Sailo hman a ni a member kalten an hlawkpui hle niin kan hria.

**Zonet Cable Tv. ah Programme lei dawn

General Media Cell (PenNet) chuan October thla atanga chhuah tan turin Zonet Zawlbuk channel-ah darkar khat programme-a lei dawn ta. 

General Media Cell-chuan Channel/Programme neih dan tur hi kum hmasa lam atang khan a ngaihtuah tawh a, kohhran rorelna sang Executive Board-hnenah thlenin board-in uluk takin a ngaihtuah a, ruahmanna tha tak siamin General Media hmalak turin dah a, a theih anga anga bawhzui a ni a. Zonet zawlbuk channel-ah darkar khat Programme kan nei ve thei dawn ta. 

A tul anga bawhzui leh hmalak kalmek niin agreement pawh karleh lam hian sign-tura inbiakfel a ni tawh a. He programme-hi October thla atanga chhuah tan tur niin hian kartin Inrinni zan dar 8:00 -9:00pm inkarah kohhran rawngbawlna chanchin thar, fak hla, Sermon leh kohhran information-pawimawh tihchhuah thin a ni ang. General Office-ah hian Studio tur buatsaih mek a ni a, hmanraw mamawh leh thil tul hrang hrang lakkhawm mek a ni a, Programme-pawh hei aia tam zawk lei tura hmalak chhoh mek a ni a. LPS lam pawh dawr mek an ni bawk. 

** AED Thianghlimna Committee

Aug. 7 Zirtawpni khan District Thianghlimna Committee neih a ni a, an thurel tlangpuite chu :

1. Sawm bikte pual Seminar neih ni se, a hmun atan District Committee room-ah ni se tih a ni. He hunah hian Sawrkar lam atangin Resource Person sawm tura tih niin a hun tur chu Resource Person-turte remchan hunah a ni ang.

2. Thianghlimna chungchangah Talk Show neih ni se, a kalpui dan tur chungchanga lo ruahman turin Rev R.Lianzama ruat a ni.

3. A hnuaia mi ang hian Thianghlimna lam hawi Intihsiakna buatsaih ni se tih a ni.

a) Essay Writing: Word 700-1000

b) Tobacco Sam (Recitation): Word 70-100

c) Hla Inphuah siak: Thuawn awm lo Chang 4 leh Thunawn awm Chang 3, Tonic Solfa awm ngei ni se. November 2015-chhungin District Thianghlimna Committee-hnenah thehluh tur a ni. Lawmman atan : 1-na: Rs 2,500; 2-na: Rs. 1,500; 3-na: Rs. 1,000. Result hi December 2015-ah puan tur  a ni ang.

******************

Juniper Editorial, 2 August 2015

JUNIPER EDITORIAL

Crusade hi...

Tunlaiah Zoram khawvel chu harhna leh a behbawmin a tuam vel a, kalna lam apiangah leh hawina lam apiangah harhna leh hlimna boruak hlir maiin a khat a tih theih awm e, Kohhran hrang hrangte an hlim em em a, zantin mai inkhawm neiin hun engemaw chen an lo kal ta a, kohhran hlim leh thlarau chang sang inti Pentecost kohhran-te kan hawi kan hawi mai zawk hi a fuh ber lo a ni. 

Hetia Kohhranin Crusade a han buatsaih pawh hi boruak thlir chuan tih awm tak pawh a ni a, a lawmawm hle a ni. Mi kohhran an hlim a, an zai mup mup laia, thlarau hmahruaitu kohhran inti zawk kan reh duk mai hi a fuhlo a, a zialo hle zawk a ni. 

Crusade hi kohhran memberten hmang tangkai ila, intuaithar nan leh insiamthar nan hmang tlang ila, Kohhran dangte awh khawp leh entawn tur leh, kaihruai thei turin kohhran hian tan i la teh ang u. 

Ral atanga lo sawisel mai lovin, an kal fuhlohna lai leh an tihdiklohte a lo awm anih pawhin kaihruai thei turte, kawng dik kawh hmuh thei tur leh zirtir thei turin i inbuatsaih tlang ang u. Kawng tha zawk leh dik zawk kan kawhhmuh thei anih siloh chuan sawisel ringawt leh phunnawi ringawt te hian sawtna a nei silova.

Mitinte’n thlarauvah hlawkna chang ila, chaute pawhin chakna thar an lo neih a, hnung tawlh tawhte pawhin hmalam an lo pan a, sual simlo ten an lo sim a, chhandamna an lo channa hun nise a duhawm hle mai.

A TAK CHU KHAWIAH NGE? Upa K. Lalbiakthanga (Juiper Article, 2 August 2015)

JUNIPER ARTICLE

A TAK CHU KHAWIAH NGE?

Upa K. Lalbiakthanga

Awle, kan chang thlanin min duh dan chuan thlarau leh tihtakzeta chibai buk turin min duh a, he thu hmang hian a tak chu khawiah nge tih ka thinlungah zawhna a lo lut a, in sawi chawhchawrawi teh ang.

Kan khawvel hun hman mekah hian a tak leh a lem hi hriat hran a har em em tawh mai a, a lem apiang hi a mawiin min hip hneh zawk ta em ni? tih mai tur a ni ta in ka hria. Dawr bungrua pawh hi a lem a mawi zawk a, mahse a tlo lo zawk si. Kan nitin nun hona ah lah hian a lem hian min chiah hneh zawk ta a ang hle mai. A TAK CHU KHAWIAH NGE?

Thlarau lamah nise, harhna kan chan thin pawh hi a tak ai chuan a phuan sosangah kan tuihal a, harhna kan chan zin aiin a tak hmuh tur kan tlem si. “Thlarau chuan thutakah a hruai lut ang che u,” a tih lai hian khawvel mite tih ang tih ve zel theihnaah min hruai lut zawk em ni? tih mai a va awl em!

Pangpar tak anga rim chhuah thei nun kan neih a va tha em! A lem chuan zu a nei lova, khuai leh phengphehlepte pawhin an bawm ngailo. Pangpar tak anga rimtuina chhuaka mite hnaih ngam nun kan neih a va tul em. A TAK CHU KHAWIAH NGE?

Pathian thuah lah, Hebrai 5:12 a kan hmuh ang maiin “A hun ngaihtuah chuan zirtirtu ni tawh hial awm hi A, AW, B-te chu zirtir in ngai leh ta maw” a tih ang mai kan ni a, thlarau leh tihtakzeta ti tu Lalpa’n a zawng si a, rah lawh tur a hmulo ang tih a hlauhawm e. Mite ngaiha mawia Amah biak hi a pawm ang em? A TAK CHU KHAWIAH NGE?

Kan thlarau chante hi infiah thin ila, mite tan malsawmna a ni nge mahni lawmna mai kan zawng zawk le. “Thutak lamah an beng an chhu ngawng ang a, thawnthu lamah an peng ang.” tih kan hmu a, thlarau par kan tlan a, hlim taka hun kan hmang zo hi fiamthuah kan lut leh a, Ephesi 5:4 kan en chuan fiamthu pawh tih loh a that thu kan hmu a, a taka rawngbawlna chuan, tuarna a keng tel a, mite tana malsawmna pawh a keng tel a ni. Rawngbawltute kan harh a hun tawh lo maw! A TAK CHU KHAWIAH NGE?

Khawvelah hian mi nun beidawng an vei huai huai a, Lalpa lam hawi thei lova sualin a man beh an va tam em! Sual phuarna hruite hlih saka hnehchhiahna tuarte chhuahtira, riltamte eitur pe a, hmangaih taka rawngbawlsak a, an pemahte hriak leh wine-te leih a, kan sa chunga kan chuantir theih nan kan hlimnate hian tlawmna nun min hruai thleng sela, chutianga rawngbawl tur chuan thlarau leh tihtakzeta Pa chibai buktu Lalpa’n a zawng a ni. A TAK CHU KHAWIAH NGE?

Tlawmna hi Thuthlung Thar rawngbawlna kawngpui a ni a, tlawmna nun nena rawngbawltu kan duh a, mahse keini lahin tlawm har kan ti leh si. A tak taka rawngbawl a lo tul hunah chhuanlam kan zawng a, fakna leh chawimawina khum reng chunga rawngbawl kan duh a,a langsar leh a hahdam china rawngbawla, Pharisai-te tawngtai ang maia tlang bum chauh em ni kan thawh tih a va awl thin em! A  TAK CHU KHAWIAH NGE?

Kan thupuiah “Pathian chu thlarau a ni a, a chibai buktute’n thlarau leh tihtakzetin chibai an buk tur a ni” a ti a, thlarau leh kan peih tawkin chibai kan buk zawk a ni lo maw? Thlarau leh tihtakzeta chibai min buk tura min diltu hi kan hringnun duhthlanna rilru hi a thih a ngai a ni. Thi theilo Pathian kha a thih angai angin kan mihrinna thi theilo hi a thih a ngai a ni. Chutah chiah chuan thlarau leh tihtakzetin rawng kan bawl thei zawk dawn a ni. A TAK CHU KHAWIAH NGE?

*******************

JUNIPER 2 August 2015, Issue 31

SUNDAY SCHOOL SPECIAL PROGRAMME HMANG DAWN

District Sunday School Kumpuan hmalakin, “Kan fate i chhanhim ang u” tih thupui chu hlawhtling taka kalpui anih theih nan Bethlehem Bial Sunday School Department pawhin Vawiin  Dt. 2.8.2015, Pathianni chawhma inkhawmah hian Special Programme a buatsaih a ni dawn a, Programme pawh hetiang hian duan a ni:-
Chairman : Director, Puitling Sunday School
Hla sak ho : Nangma thil ropuite an sawi
Tawngtai rual :
      1) Sunday School kal theilote an kal theih nan.
      2) Ruihhlo bawiha tang ten Isua an hmuha, am sim theihnan.
      3) Kan faten thlarauva siamtharna Lalpan dawn tir turin.
Hminglamna leh thawhlawm khawnna
Solo & Zaipawl : A theih chuan
Thusawi : Bial Board ruat atangin
Bible chhiar tur : 
Exodus 10:9, Sam 127:3-5, Ephesi 6:1-2
Report : Secretary
Hla sak ho : Isu i thu ka ngaihtuahin
Banna
He mi huna thu sawi tur hian heng mite hi ruat an ni:
Bethlehem : 
PTSS - Evan Lalramzauva
NPSS - Bro. Laltlanlawma
Bethlehem Vengthlang : 
PTSS - Upa K. Lalbiakthanga
NPSS - Bro. K. Liansanga
Hermon : 
PTSS - Bro. Lalfelkima
NPSS - Bro. F.L Ramchullova

****************

CRUSADE PUAL TAWNGTAI RUAL

Vawiin Dt. 2 August 2015, Pathianni tlai dar 5:00 ah hian PYD Kumpuan Committee hmalakna in Biakin-ah Crusade puala tawngtairual hun buatsaih a ni dawn a, PYD member zawng zawngte leh a duh apiang tel vek turin hruaituten min ngen a ni. Tawngtairual hi chaw ngheia neih tura buatsaih a ni a, amaerawh chu chaw nghei thei lote pawh inthlahrung hauh lovin, chaw ei hma a tel vek turin hruaituten min sawm takzet zet a ni.Hruaituah Bro. K. Vanlalhlimawma a ni ang a, hunserh hmang turin Sis. Vanlalhlimpuii ruat a ni bawk.

**************

CRUSADE NEI DAWN

Bethlehem Kohhran Buaisaihin tunkar lo awm tur kar tluan hian Bethlehem Biakin-ah Crusade buatsaih a ni dawn a, kohhran memberte leh a mamawh leh duh apiang tan Pathian thu a intuaitharna leh insiam tharna hun tha tak a ni dawn a ni. Crusade chhung hian zantin inkhawmna neih a ni ang a, speaker bik awm lovin, mi hrang hrang hnen atangin Pathian thungaihthlak a ni ang. Kohhran mipuiten ngaipawimawh ila, hlawkna chan theuh i tum ang u.

PYD COMMITTEE KOHNA

Vawiin Pathianni Chawhnu Inkhawm banah hian NPSS Hall-ah Local PYD OB leh Group leh Sub-Committee OB zawng zawngte Joint Meeting pawimawh tak koh a ni a, a tel tur chin zawng zawngte kim taka kal vek tura hriattir kan ni e.

RT PHUNGA GROUP NEWS

RT Phunga Group chuan kar kalta thawhleh zan khan sahbawn tui siamin an hnatlang a, Ningani zan khan an zuarchhuak leh bawk a ni. An thil zawrh  lo leisaktu zawng zawngte chungah an lawm hle a, a la leilote pawh an zawrh leh hunah lo dawr vek turin an sawm nghal a ni. Sahbawn tui hi remchang hmasabera siama, zawrh leh an tum a ni.

LAD COMMITTEE MEMBER HRIATTIRNA

Vawiin Pathianni chawhma inkhawm ban hian Biakin-ah LAD Executive Meeting  pawimawh tak koh a ni a, hei hi kohna ah ngaiin kim taka Committee Member-te chu kal vek tura ngen leh hriattir kan ni e.

*****************

GENERAL NEWS

Hruaitute Programme : Rev. Lalmalsawma Sailo, General Supdt. chuan Chhimtuipui District Board July 29, Nilainia neih chu a telpui a, District chhunga Licence Holder-te puala Seminar July 30, Ningania neihah resources person-ah tangin hun a hmang nghal a ni.

Licence Holder te pual Seminar: July 30, Ningani khan Chhimtuipui District Hqrs. Kohhran Biak In, New Saihaah Chhimtuipui District chhunga Licence Holder, Pastor, Evangelist, Bible Women-te pualin Seminar hlawhtling taka neih a  ni. Rev. Lalmalsawma Sailo, General Superintendent buatsaih - Practical Ministry,  Constitution , Doctrine leh Financial chungchang zir ho a ni a, training naa kalten an hlawkpui hle.

Hla inphuahsiak leh Article in ziah siak: General Sunday School Department kumpuan bawhzuinan "Kan fate i chhanhim ang u" tih thupuia hmangin Hla inphuahsiak leh Article in ziah siak buatsaih a ni dawn a, a duh apiang tan tel theih a ni ang. Kumin December 2015 ral hmain General Sunday School hruaitute hnenah thehluh tur a ni. (Rev. R. Laichhingpuia, UPC General Hqrs Office, Mualpui Salem veng, Aizawl P.o -796005 ah emaw    (r_chhingpuia@yahoo.co.in). Lawmman atan pakhatnain Rs. 2,000/- leh citation, pahnihnain Rs. 1,500/- leh citation, pathumnain Rs. 1,000/- leh Citation a ni ang.

General Account Audit : July 28-31 chhung hian General Headquarters Administration hnuaia Account hrang hrang te, Department hrang hrang leh Institutions, Offset Press, Book stall account-te 1st half year audit-a ni. Auditors te hi Rev. Rosanga Kawlni, Rev. C. Lalrammuana, leh Rev. Ralkapkunga khiangte,  te an ni.

General Missions Department : July 20, Thawh\anni khan General Director room-ah meeting an nei a, meeting hi mawhphuhna la thar Rev. R. Lalhawia, General Missions Director chuan a kaihruai.

Meeting-ah hian Partner In Misssion (PIM) bawhzui zel dan tur bakah Missionary-te'n Station-an chhuahsan chungchanga ruahmanna siam a ni. General Missions Department Conference-2015, meeting -in a pass angin Chakma Missions Field-kaldan chungchanga a thudah Chhimtuipui District-hnena hlan anih dan tur chungchangte ngaihtuah.

Churachandpur District NEWS

Kohhran thar pali : Kumin 2015, January - July thla chhungin hmun hrang hrangah Kohhran thar  pali din a ni a, chungte chu:- 1. Rawvakawt,(Parbung Section) ah - Bialtu Pastor Jehova Lalnunsang rawngbawlna a\angin.  2. Bualmual(Pangzawl Section)-ah Saipum Local rawngbawlna atangin. 3. Ngurte khuaah Rev. Haungama rawngbawlna atangin. Chongchin, Lentlang Section-ah District Missions Department in tirhkoh a rawihna hmunah te kohhran thar hi din a ni. An vaiin member thar hi 70 vel an ni.

District Board thurel tlangpui : July 21-23 chhung khan Half Yearly District Board neih a ni a, board member-te an kal kim a ni. Rev. Paosei, Dist. Supdt. chuan meeting hi a kaihruai. Thurel tlangpui: District Board member zawng zawng ten mahni bial chhung ni lovah August thla chhung hian Financial Campaign neih turin ruahmanna an siam a, District hruaitu te pawh an fehchhuak ang. October thla hi District chhunga Rammut Thlaah puan a ni a, Rammutna tur atan hian hmun pali thlan a ni a, chungte chu : Chawngchin, Rovakawt, Bungpi, Ngurte ah te neih tur a ni. Rovakawt leh Chawngchin hmunah hian Biakin saa Work Camp neih nghal tur a ni ang.   

Aizawl East District NEWS

Revival Crusade nei mek: Bazar Bial Missions Department-huaihawtin District Hqrs. Biak In-ah July 24, Zirtawp zan a\ang khan revival Crusade neih a ni a. He Crusade-ah hian Speaker-ah Sis. Lalhmangaihzuali B/W,  Tlangnuam Veng hman niin, tihdam rawngbawlna a nei nghal bawk. Crusade hi July 26, Pathianni thleng neih tura ruahman ni mahse July 27- Aug. 2, Pathianni thleng chhunzawm leh tura tih a ni. He Crusade kaltlang hian thlarau thianghlim dawngthar engemaw zat awm tawhin Aug.2, Pathianni hian Bro.Lalthawhmawia te chhungkuain Pathian chawimawina an nei dawn a ni. Bazar Local-ah pawh Aug. 3-9. chhung hian Evan R. Vanchhunga, Speaker-a hmangin Revival Crusade hi an hmang bawk dawn a ni. Bazar local-ah hian Aug. 1, Inrinni hian Evan.R.Vanchhunga te chhungkua hian Pathian chawimawina an nei ang a, Speaker-ah Rev Pc.Lalnghakliana, District Supdt. hman a ni ang.

LAD Kum chanve Board: District LAD chuan Aug. 4, Thawhlehni hian District Committee room-ah Kum chanve District Board an nei dawn a. He hunah hian Bial leh Official atanga Agenda lut hrang hrang te an ngaihtuah ang.

Thianghlimna Committee: July 29, Nilaini khan District Thianghlimna Committee chuan Committee neiin Meeting hmasa in alo rel tawh bawhzui dan tur ngaihtuah a ni a, Bial \ul bikah Seminar neih ni se a lo tih tawh chu June 20, Inrinni khan Bethlehem Bial-ah neih tawh a ni a, Aug. 8, Inrinni hian Mualpui Salem Bial-ah neih leh tur a ni a, programme tur pawh siam nghal a ni.

Missions Department : July 30, Ningani khan District Missions Executive Meeting District Office-ah neih a ni a, Serchhip Bial, Sialhau hmunah rawngbawl turin Evan. F. Liberty-a (Zuangtui) chu August leh September chhunga rawngbawlna nei turin ruat a ni. Evan.F. Liberty-a hian Aug. 3, Thawhtanni hian Missions Director hnenah Joining report-a pe ang. Rev HL Dawngliana, Missions Director nilai chu District Secretary-a akal tak avangin Missions Department OB ten a thlah nan Rs 2,000/- hlan ni se an lo tih chu Executive Meeting hian a pawmpui bawk a ni.

****************