JUNIPER ARTICLE
RUALBANLO
(Rualbanlo Sunday 1st Sunday of July, JULY 5, 2015 pualin)
- Evan. P. C. Lalrokima
A awmzia:
Rualbanlo (disable/disability) han tih hian mitdelna (blindness), khawhmuh fiah lo(6/24 aia chhia) (low vision), Bengngawng (hearing impairment), Rilru lama rualbanlo (mental retardation), Rilru natna(mental illness), Phar dam leh (leprosy-cured), leh ruh leh taksaa rualbanlo (locomotor disability) sawina ni ber a. Doctor(certified medical officer) in kawng hrang hranga a en hnua a a chunga kan sawi ang taksa/rilru lama harsatna 40% (zaa sawmli) aia sang an neih chuan RUALBANLO tia pawm a ni, hemi aia hniam te chu rualbanlo an ni ve lo.
Pathian thu atanga thlirna:
Taksa, rilrua fel lo leh dik lo, rualbanlohna hi pian tirh atang renga awm theih a nih rualin pian tirha rualbanlohna awm si lovin vanduai vang emaw chhan eng emaw vangin a hnuah rualbanlohna hi a awm thei bawk. Bible (Thuthlung thar)ah pawh Lal Isua khawvela a len lai niah mitdel te, bengngawng tawngtheilo te, phar te, piangsualte awmin a tidam tih kan hmu. Khawvel hmun hrang hrangah hian pianphunga harsatna nei hi mi tam tak an awm a ni.
Pathianin mihring hi chhan neiin a siam a; Johana 9:3 ah Lal Isuan pian tirh ata mitdel a tihdam khan, kha mitdelna kha Pathian hnathawh a chung a lanna tur a nih thu a sawi kan hmu anih kha. Mitdelna, bengngawnna, rilru lam fel lohna leh pianphunga harsatnate hi a tawngtu tan leh, a tawngtu nu leh pa, u leh nau, pi leh pute tan chuan hriatthiam a har thin hle ang. Nimahsela, Pathian remruatah a tel ve a ni tia zaka indawm kun emaw thinrima Pathian hnena vui mai lovin Pathian ropuina puanchhuahna leh Pathian hnathawh kawng eng emaw ti taka a lanchhuahna tura chung lam remruat a nih hi rina pawm thiam a ngai hle. Exodus 4:11-ah “ Mihring ka hi tu siam nge ni a, tawngtheilo te, bengngawng te, mitvar te, mitdel te pawh hi tu tih nge ni? Kei LALPA hian a ni lo vem ni? tiin Pathianin Mosia hnenah a sawi a. Mihring pianphunga rual kan ban lohna hi pian tirh atang emaw chhan eng emaw vang leh vanduai vang liau liau pawh ni se Pathian remruatna hnuaia awm leh thleng a ni tih hi ringtuten kan hriat fo a tul hle.
Kohhran hian engtin nge hma kan lak ve ang?
Rualbanlote hi kohhran leh khawtlang mipuite hian engtinnge kan thlir a? Engtin nge an chunga rilru kan put thin? Mi tam tak chuan anmahni leh an chanchin zir leh hriat tumna nei lemlovin ngaihdan siam sa kan nei a – mi danglam, mi mak sak, vanduai ve reng, chhawnchhaiha biak chhawhchhi awm lek, min tihlimtu(entertainer) ang leka enin nuihzat enin kan en ngai em? Tunlai tawng takin an chhung leh khatte hmuh phak lohah chuan ‘bawl’ berah kan hmang thin em?
Rualbanlo te hi kan chhungkuaah an awm ve lo a nih chuan hriatthiam pawh a harsa mai thei e. Engpawhnise, khawtlang/Kohhran mipuite hian hengte hi kan hriat reng a pawimawh:
(1) Rualbanlote hi Pathianin duh taka a siamte an ni
(2) Rualbanlote Biak in, puipunna leh khawlaiahte midang ang bawka tel ve turin dikna leh chanvo an nei.
(3) An harsatnaah hmuhsita endawngtu nilovin an mamawh tihsaka phuhru tu, an hmasawnna kawng dap saktu kan ni thei.
(4) ‘Mi ang lo’ tia kan nuihsawh rualin tumah mi ang kan awm lo. Tumah hi kan inang lo, kan hmel, kan rilru puthmang leh tihtheih zawng pawh a inang vek bik lo.
Rualbanlote hmasawnna tur hian sawrkar lam chuan a tih theih ang ang tiin hma a la mek zel a, an chanvo humhalh kawngahte, an zir theihna turte, eizawnna an dap theih tur te, an zin veivahnaa tanpui dan tur leh hmanraw mamawh leh an kalkawng tur thlenga ngaihtuahin dan (Act) bik thlengin a siam a. Rualbanlote an mahni phak tawk theuhah midangte tan phurtir nilova an kea an din ve theihna turin sawrkarin hma a la mek zel a. Hetih lai hian nang leh kei, khawtlang leh kohhran mipui, rualbanlo te chhungte hian engnge kan tih ve tur ni ang? Heti hian rilru siamin ke pen dawn the ang:
(1) An theihna (capabilities) zawnchhuah a, kan rim ngam a kan puih (support) a tul
An tih theihloh hmuh sak aiin an tih theih zawk kha hmuhsak a tul.
(2) Kan tu fate emaw a tuartute hian zak mai lovin kan nihna kan pawm thlap a tul a. Zah avanga Biak in leh puipunna hmuna kal loh, hruai tam lohah tlak lovin Hmasawn tura ke penin mi dangte nun ang zawm ve turin kan pui tur a ni.
(3) Hmasawn thei an ni tih kan pawm a chu lamah chuan fuiha tanpui tur.
(4) An chanvo (rights) humhalhpuitu nih tur
(5) Kan zingah thlamuang taka na tel theih nan thinlung, tawngka leh cheziaah anmahni kan tel tir a pawimawh
(6) Sum leh pai, kan kut, kan ke, kan tawngkam leh theihna hrang hrangin an tan malsawmna kan ni thei. Vawi khat mai ni lo vawi tam tak malsawmna nih hi a tha lehzual em!
(7) Keimahniin tihtheih kan nei tam lo anih pawhin sawrkar lama an hamthatna awm te kawhhmuha haichhuahpuitu kan ni thei.
(8) Kohhranah tam zawka an tal theihnan kawng kan hawn a pawimawh: Entirnan – Biak in leh quarters sakah ‘ramp’ (wheel chair-a kalna) siam sak te, Sunday school zirna kawngah mitdel leh khawhmuh fiahlo te tana zir ve tur siam te, bengngawng leh tawngtheilote hriat thiam ve tur zirbu buatsaih sak te, thalai thiltih nikhua leh a hlimawm lam programme-ah an tel ve theihna tura hun siam thiam te, Pathian chhandamna mamawh tho an nih avangin an taksa mai bakah an thlarau chhanhim a nih theih nana a theih ang kawng kawnga hmalak dan dap chhuahte, sunday school intihsiak thlenga ngaihngam tak leh lungsi taka an phak tawk an chhuah ve theihna tur atana intihsiakna boruak rit lutuk paih te thlengin kan siam thiam a pawimawh hle.
Heng bakah pawh hian kohhran leh chhungkua dinhmun a zirin rualbanlote enkawl leh dawmkanna tur, an tana kawng sialsakna leh an tana ke penna tur tam tak a la awm thei ang.
Kan hmaa mihuai kalte kha!
Beidawng suh! I taksaah rualbanlohna a awm maw? I chhung leh khat, i u leh nau, i tu leh fate zingah rualbanlo an awm maw? Eng ngatinge zaka i kimki deuh em ni? He dinhmuna ding hi mi tam tak an awm a, huaisen taka hmachhawntute chuan khawvel hi an hneh thin asin! Khawvel milar sawi zinga hmaih hauh loh tur Helen Keller kha mitdel bengngawng a ni a. Nimahsela, lehkhabu 14 lai ziakin article tam tak a ziak bawk. Scientist ropui Stephen Hawkins hi a puitlin hnuah rualbanlo a ni. Kum 21 a tlin hnu lawk 1963 khan natna khirh tak, hriatna thazam khawih chhe chi ALS (Amytrotic Lateral Sclerosis) a vei a. A natna avangin wheelchair-a nawr ngai a lo ni ta a, computer hmang chauha tawngthei a ni zawm leh bawk a. Mahse, khawl hmanga tawngin lecture pek a thulh chuang hauh lo! Khawvel scientist ropui berte zinga mi niin a lehkhabu ‘A brief History of Time” chu science khawvelah ngaihsan hlawh tak a ni. Greek miffing leh hla phuah thiam, epic poem ropui berte zinga mi The Iliad and The Odyssey phuahtu Homer kha mitdel a ni asin.
Chumai a la ni lo, English poet lar John Milton pawh kha kum 43 a nih hnuah a mit a del a, hla phuah leh thuziah a bansan chuang hauh lo. ‘Paradise lost’ pawh hi a mitdel hnua a ziah a ni. German hlaphuahtu ropui Beethoven pawh kha kum 28 anihin a beng a ngawng a, mahse hla phuah a thulh chuang hauh lo. Kristian hla tha leh sak hlawh tak tak ‘Ni ai pawhin I eng zawk e’, ‘Aw sualthim lungngaihthlak tak hian’, ‘ Isua hnenah ka him ang’ tihte phuahtu Fanny J Crossby hi thla 2 mi lek a nih laia mit del a ni a. Nikhua a lo hriat hnuah pawh a mitdel vangin vawi khatmah a vui lo. Kristian hla 9,000 zet a phuah asin!
Tlangkawmna:
Genesis 1:31 ah chuan ‘Pathianin a thil siam tha a ti hle si a..’ tih kan hmuh angin rualbanlote hi Pathian siam leh dinte an ni. Pathianin duhtaka a dinte hi hmuhsita nuihsawh emaw hi ringtu nihna nen a inhmeh lo. Rualbanlohna hi thenawm leh midangte ta a ni bik lo va, nang leh kei hi zan khar thilah pawh rualbanlo kan ni thei, kan zavaia ta a ni. Hawh u, kan mawhphurhna hre thar ila, an tan ke penin an tan malsawmna nih i tum zel ang u khai; ‘heng mite ber chunga ti chu ka chunga ti in ni’ titu Lal Isua zuitute kan nih hi!
**************************
No comments:
Post a Comment