PE RAWH U TICHUAN PEKIN IN AWM ANG Sis. F.Lalnghinglovi (Juniper Article Dt. 10 May 2015)

JUNIPER ARTICLE

(LAD DAY PUAL)

PE RAWH U TICHUAN PEKIN IN AWM ANG

Sis. F.Lalnghinglovi

    Kan Pathian Lal Isua’n A zirtirte leh Amah ringtute hi kan dam chhunga kan tihtur leh zawm turte fuihna thute thil tam tak min zirtir thin a, A zirtirna zawma pawmtute chu an hlim a, an lawm thin a ni.  Awle, kan thupui khi ngun takin zirin ngaihtuah thin ila, Luka 6:38 ah chuan he thu hi kan hmu, “ Pe rawh u tichuan pekin in awm ang. Bengmuka sawi muka liam zawih zawihin in malchungah an pe ang che u,” Lal Isuan a ti a. Pathian hmangaihna nei chunga thahnemngai taka kan pek chuan A malsawmna kan dawng let leh dawn niin a lang. Thilpek reng reng hi a petu lam tan channa leh hekna a ni ve thei a, thilpek lamah hian kan pianthar a ngai hle.

    Tuiah leh thlarauvah piangthar inti hle mah ila thilpek lama kan pianthar tel si loh chuan a pawi thei. Pathian hnen atang lo chuan malsawmna leh vanneihna hi a dawn theih ngawt loh. Hetiang malsawmna hi chan kan duh chuan, kan thilphal hmasaka, A chanpual tur te, kohhran A taksa siam puitlinna turte ui lo leh hlim taka kan pek fo thin a ngai hmasa, chuti lova Lalpa malsawmna dil fo hi a dik ber lo. Harsatna- chhungkuaah, kan fateah, kan pasalahte a lo awm hian A tihdamna dil fo mi kan nih chuan a tha berlo, A duhzawng kan tih a, kan awm a ngai ve thin a ni. Kohhranah Department hrang hrangte kan awm a, chungte chuan Target te neiin kan pawisa thawh ve theih zat turte min tuk ve thin. A khawntuten a hun taka anlo khawna lo pek thinte hi Lalpa hnena pe thin kan ni. Kan pek tam leh tlemah kan Pathian hi a lawm ber lova, kan neih ang angte lawm tak leh hlim taka kan pekah A lawm mai zawk a ni. Hmeithai thawhlawm pekah Lal Isua a lawm hle ang khan thinlung taka lawm taka kan pekah Lalpa alawm mai thin.
    Piangthar tih chu mi an awm dan tha lo leh mawilo thin kha an duh lova an tlansan thin hi a ni. Dawt sawi hrat tak thin khan thudik tak a sawi tawh thin, mi uikawm tak thin kha a thilphal tawh thin. Lalpaah kan pianthar tawh tak tak chuan kan awmdan tha lo zawng zawng kan kalsan thin a ni. Thilpekah i piangthar tel zel ang aw, “ Pe rawh u tichuan pekin in awm ang ”. A chunga kan sawi angin Pathian hmangaihna leh piantharna tak tak atang lo chuan a harsa hle thin. Mahse Amah avanga nunga hnathawk thei chauh kan nih avangin min petu tan nise. Pe tam chuan a dawng tam ang a, pe tlem chuan a dawng tlem mai dawn a ni. Kan pek ang ang hi keima tan, chhungkaw tan, nangma tan a ni zel. Ni in i hria em? Thilpek lama mi uikawm, nei ngai lo, harsa inti reng mite hi an hrisel thei ngai reng reng lo e, an tih chu. Aw le, Pathian tana thilpek chi hrang hrangah hian chhungkhata Nu L.A.D te kan pawimawh hle mai. Mawhphurhna sang tak, Pathian malsawm dawnna leh damlohna kan kutah hian a awm. Kan pawimawh hle mai, kan pasal ten an hlawh an rawn hawn a, kan faten an hawn bawk a, inchhung an rawn thlena a kalna tur athawhtur peng hrang hranga a tlem emaw, atam emaw; kan lo dah (thun) zel hi kan mawh a ni.
    Vawiin May 10 2015, Pathianni hi kan ni pawimawh tak kan Day a ni a, hemi denchhen hian kan thlen chin atangin hmsawn zel turin i inbuatsaih ang u. Hna ropui leh tangkai tak tak kan thawk a, mite tanpuina lamah te, rawngbawlnaahte hma kan sawn zela a ropui, Buhfai thamah pawh hma lam kan pan a, kohhran enkawlnaah te, Mission rawngbawlna te, General-ahte hna ropui a thawk mek, athain a ropui hle. Tun aia nasa leh tamzawkin hma kan la sawn thei niin alang. Kum 2014 a No 3-5-10 thawh thinin 2015 ah chuan No 1 tala hmasawn turin, Rs. 20-40-80 pe thin ten Rs.10  tala hmasawn thei turin tan inla leh teh ang u. Kan thawh tama kan pek tam poh leh keimahni bawk kan lawm thin a ni. Mi pakhat chuan heti hian a ti a, “ Kum dangah chuan Rs.10 te, No 2 te ka thawh ve mai mai a, mahse tunah chuan ka hrethiam a, a pawimawh zia ka hre ta ” a ti a, Pathianni apiangin Rs 100-200 te a thawh tawh a, hma ava sawn ve, Pathianin a hria ang a malsawmna a dawng leh mai dawn a ni. Kan Pathian hian amah hmangaih a, A zirtirnate zawm a, A duhzawnga awm thinte hi a kalsan ngai lo, A hnena malsawmna A pein a dawn tir mai thin.
    Kan Pathian ngei pawh kha khawvela a len lai khan A hnena thiltihtheihna a pe thin a, chutiang chuan Amah zuitute hi awm ve turin min duh a, min zirtir thin a ni. Kan thupui kha eng nge ni kha, “Pe rawh u pekin in awm ang” tih anih kha mawle. Liam zawih zawiha bengmuk a, sawimuka petute chu Lalpa’n mal min sawm dawn a ni.

PE RAWH U PEKIN IN AWM ANG
L.A.D DAY 10th MAY 2015 HI HLIM TAKIN I HMANG ANG U.
LALPAN MALSAWM RAWH SE, AMEN

*****************