A TAK CHU KHAWIAH NGE? Upa K. Lalbiakthanga (Juiper Article, 2 August 2015)

JUNIPER ARTICLE

A TAK CHU KHAWIAH NGE?

Upa K. Lalbiakthanga

Awle, kan chang thlanin min duh dan chuan thlarau leh tihtakzeta chibai buk turin min duh a, he thu hmang hian a tak chu khawiah nge tih ka thinlungah zawhna a lo lut a, in sawi chawhchawrawi teh ang.

Kan khawvel hun hman mekah hian a tak leh a lem hi hriat hran a har em em tawh mai a, a lem apiang hi a mawiin min hip hneh zawk ta em ni? tih mai tur a ni ta in ka hria. Dawr bungrua pawh hi a lem a mawi zawk a, mahse a tlo lo zawk si. Kan nitin nun hona ah lah hian a lem hian min chiah hneh zawk ta a ang hle mai. A TAK CHU KHAWIAH NGE?

Thlarau lamah nise, harhna kan chan thin pawh hi a tak ai chuan a phuan sosangah kan tuihal a, harhna kan chan zin aiin a tak hmuh tur kan tlem si. “Thlarau chuan thutakah a hruai lut ang che u,” a tih lai hian khawvel mite tih ang tih ve zel theihnaah min hruai lut zawk em ni? tih mai a va awl em!

Pangpar tak anga rim chhuah thei nun kan neih a va tha em! A lem chuan zu a nei lova, khuai leh phengphehlepte pawhin an bawm ngailo. Pangpar tak anga rimtuina chhuaka mite hnaih ngam nun kan neih a va tul em. A TAK CHU KHAWIAH NGE?

Pathian thuah lah, Hebrai 5:12 a kan hmuh ang maiin “A hun ngaihtuah chuan zirtirtu ni tawh hial awm hi A, AW, B-te chu zirtir in ngai leh ta maw” a tih ang mai kan ni a, thlarau leh tihtakzeta ti tu Lalpa’n a zawng si a, rah lawh tur a hmulo ang tih a hlauhawm e. Mite ngaiha mawia Amah biak hi a pawm ang em? A TAK CHU KHAWIAH NGE?

Kan thlarau chante hi infiah thin ila, mite tan malsawmna a ni nge mahni lawmna mai kan zawng zawk le. “Thutak lamah an beng an chhu ngawng ang a, thawnthu lamah an peng ang.” tih kan hmu a, thlarau par kan tlan a, hlim taka hun kan hmang zo hi fiamthuah kan lut leh a, Ephesi 5:4 kan en chuan fiamthu pawh tih loh a that thu kan hmu a, a taka rawngbawlna chuan, tuarna a keng tel a, mite tana malsawmna pawh a keng tel a ni. Rawngbawltute kan harh a hun tawh lo maw! A TAK CHU KHAWIAH NGE?

Khawvelah hian mi nun beidawng an vei huai huai a, Lalpa lam hawi thei lova sualin a man beh an va tam em! Sual phuarna hruite hlih saka hnehchhiahna tuarte chhuahtira, riltamte eitur pe a, hmangaih taka rawngbawlsak a, an pemahte hriak leh wine-te leih a, kan sa chunga kan chuantir theih nan kan hlimnate hian tlawmna nun min hruai thleng sela, chutianga rawngbawl tur chuan thlarau leh tihtakzeta Pa chibai buktu Lalpa’n a zawng a ni. A TAK CHU KHAWIAH NGE?

Tlawmna hi Thuthlung Thar rawngbawlna kawngpui a ni a, tlawmna nun nena rawngbawltu kan duh a, mahse keini lahin tlawm har kan ti leh si. A tak taka rawngbawl a lo tul hunah chhuanlam kan zawng a, fakna leh chawimawina khum reng chunga rawngbawl kan duh a,a langsar leh a hahdam china rawngbawla, Pharisai-te tawngtai ang maia tlang bum chauh em ni kan thawh tih a va awl thin em! A  TAK CHU KHAWIAH NGE?

Kan thupuiah “Pathian chu thlarau a ni a, a chibai buktute’n thlarau leh tihtakzetin chibai an buk tur a ni” a ti a, thlarau leh kan peih tawkin chibai kan buk zawk a ni lo maw? Thlarau leh tihtakzeta chibai min buk tura min diltu hi kan hringnun duhthlanna rilru hi a thih a ngai a ni. Thi theilo Pathian kha a thih angai angin kan mihrinna thi theilo hi a thih a ngai a ni. Chutah chiah chuan thlarau leh tihtakzetin rawng kan bawl thei zawk dawn a ni. A TAK CHU KHAWIAH NGE?

*******************