JUNIPER 5th January 2020

JUNIPER 9th February 2020

JUNIPER 2nd February 2020

JUNIPER EDITORIAL - 3rd March 2019

Editorial....

Kohhran hi thlarauah chauh ni lo
thawhlawmah te, buildingah te, bungraw
changtlung leh thil dangah pawh
hmasawn zel tur kan ni a. Kohhran
hmasawnna chu mi mal leh chhungkaw
hmasawnnaah thui tak a innghat a. Kan
kohhran hi member zasarih kan tlinna rei
tawh ngaihtuahin kan pung chak vuai
lova, a chhan ni a an sawi pakhat chu in
leh lo nghet nei kan tam loh vang an ti
thin. Chu chuan kohhran thanna turah
pawh chhungkaw ngel-nghet kan awm
tam a tul zia a tilang awm e.
 Hmasawnna inkhai-pa-diatnaah
chuan mi mal hmasawnna chu a bul thut
niin a lang a. Mi mal tinte hian nasa leh
zuala tan kan lak a ngai tihna a ni. Kohhran
pawl pakhat chuan taimak an inzirtir nasa
hle a. Chu mite pawl chu hnathawka
chhawr tlak tiin hriat lar an lo ni ta. Mahni
biak in saka inhlawhte ngei pawh tur reng
ngai kan ni hian kohhran ang pawha taimak
inzirtir kan mamawh zia a ti lang a. Eng
hna pawh thawk ila, rinawm leh taima taka
thawk tura inzirtirna hi kan uar loh chuan
kan hmasawnna hi a thang muang bik thei
a, chu chu kohhran hian kan tuar thei. Mi
mal hmasawnna zawng zawng hi
kohhranin kan hlawkpui vek lem lova,
chhungkaw tin hmasawnna leh kohhran
hmasawnna suih zawm dan pawh kan
thiam a tul hle.
 Kohhran leh a peng hrang hrangte
hian mahni rawngbawlna zawnah theuh
theihtawpa chaka kal kan duh theuh a.
Kan thahnemngaih luatah mi mal
eizawnna tichhe khawpa hma kan lak loh
nan ruahmanna kan siam thiam fo a tha
a. Sawrkar hnathawk aia eichawp dap
tamna awmkhawm kan nihnate hre
rengin hna thulh lo zawnga hmalak dante
pawh kan ngaihtuah thin a tha khawp mai.
Kohhran kal siam hi a theih chin chinah
chuan harsa deuh zawkte tel ve theihna
tura duan a tha a. Chutih rualin,
rawngbawlna hi inpekna nun a ni tih kan hriat a tha awm e.

Juniper Editorial (13 September 2015)

NAUPANGTE HI:

Bial Sunday School conference chu kan hmang leh mek a ni a, kumtin in kan hmang thin a, kan tihdan pawh a inang deuh ziah a, Naupang intihsiakna hi kan ngaihtuahna la ber tu pawh a ni mai awm e. 

He intihsiakna kumtina kan neih thin hi eng vanga nei ziah nge kan nih tih zawhna hi ilo inzawt ve tawh ngai em? Hun rei tawh tak atangin kan kalpui tawh a, hlawkna eng nge kan hmuh a, rahtha eng nge a chhuah? he thil hi a hlawk lo kan ti lova, a hlawk e pawh kan ti chuang lova, kan ngaihdan tizautuah han tarlan ve a tha awm e.

Intihsiakna hi Local hrang hrangte inelna mai atanga kan siam anih chuan hlawkna a tam lo viauin a rinawm, naupang rilru -ah Local inelna ang chauha kan tuh anih chuan a pawimawh ber leh a laimu, Pathian thu hriatna lama kaihhruaina hi kan thelh der dawn a ni. Intihsiakna kan buatsaih hian naupangte rilruah inelna satliah nilovin, inelna thianhlim, Pathian thu hriat tam duhna leh hriatchian duhna tuh se a duhawm hle mai. Chu chu a hlawhtlinna tur ber pawh niin a lang. 

Chang leh Thu Inchhang kan sawirual thup thup hian Pakhatna ni tur ringawtin em ni kan sawi? Kan sawirual thup thupte kha kan naupang ten an hrethiam ang em? Pathian thu hrilna kawngah midangte puih nan leh midangte hrilhfiahna atang hman nachang an hria ang em?

A hlutna tak kha kan naupangte hian hrethiam se, inelna thianghlim hmangin inel sela, Pathian thu hriatna lamah hmasawn sela kan Conference hi a va hlawhtling dawn em!

Juniper Editorial (6 September 2015)

Fate Tawiawm...

Sunday School Conference chu kan lo thleng leh dawn ta reng mai a, Sunday School Conference a mite mit la ber leh kan ngaihven ber, kan ‘Main Event’ chu naupang intihsiakna hi ti ila kan sawi sual tam awm love. Conference intihsiakna atan hian zirtirtute an tang ang bawkin naupangte pawh an tang thei hle a, a bikin a te lam, primary leh junior department te phei hi chu an phak ang tawk hian an tangin thahnem an ngai ve thin a, chuti anih avang chuan Conference hi an ngai hlu a, an ngaipawiawm em em thin a ni.

Kan faten an ngaih hlut em em Pathian rawngbawlna ni bawk si hi nu leh pate hian kan hlutpui tawk lo ang tih a hlauhawm a, kan hlutpui chuan kan fate hian nuam an ti a, an phur a, inrintawkna an nei thin a, tin an thiltih kha thiltha a ni tih an hriatna tura phurpuia fuih sauh sauh hi a pawimawh hle a ni.

Naupang thenkhat chu an inkhawmpuiniah thahnemngai takin an theihtawp an chhuah a, mahse tawiawmtu hmel an hmuh ve loh hian hrehawm an ti a, hlulo bik riaua inhriatnate an neih phah thei thin a ni. Kan fate thil tha tih hi chu phurpui thiam ila, hmasawn zel turin leh ti chhunzawm zel tura fuihtu ah tang thin ila a duhawm hle mai.

Thawmhnaw thar neilo mahse an nu leh pate hnen atanga ‘Support’ tha tak an dawn chuan an hlimna a nep chuanglo a ni tih hria ila, nu leh pate hian kan fate thil tha tih hi i tawiawmin theihtawp chhuahin i phurpui hram hram thin ang u. Chu chuan thil thalo tih duhna lak ata a chhanhim thei a ni.

******************** 

Juniper Editorial 30 August 2015

Juniper enkawltute lu tihaitu...

Juniper chanchinbu chu kum 19 lai mai a lo chhuak ve ta a, a bul tan tirh lai ai chuan hmasawnna pawh hmuh tur tam tak a awm ngei ang. Chutihrual chuan chhiartute hriat siloh hian Juniper enkawltute hian harsatna eng eng emaw kan tawk ve neuh neuh a, a langsar ber chu chhuah tur tlem lutuk hi a ni. Article lut a tlem em em mai a, tunkarah eng nge kan chhuah ang? tih ringawt ngaihtuaha kar tluan a rilru sen chang hi a tam ta khawp mai. Voluntary work anih angin a enkawltute pawhin hna dang leh mahni pawimawh khawih tur kan lo nei ve neuh neuh hlawm bawk a, chanchinbu chhuah (journalism) lam zir leh hetiang lama tuimi kan lo ni bik lo bawk nen, lu hai map map chang hi chu a awm ve ta zauh zauh mai.

A buaipuitu nilova chhiartu nih hi chuan lo sawisela, phunchiar maite pawh hi a awl em em a, hetiang sawiselna leh phunchiarna thu te pawh hi kan hrethiam khawp mai. Amaherawhchu duhthlantur dang min pek chuan siloh chuan tih ngaihna awm loh chang hi a tam a ni tih chhiar tuten min lo hriatsak kan duh a ni.

Kan ngen duh chu, kan kohhrana ziakmite leh thuthiam deuhte han tang leh hlek ula, chhuah sen loh min han hlui teh u. Ziakmi mai bakah ziakmi ni lemlo te pawhin inzirna atan hmang ila, a tha emaw tha lo emaw, kohhran leh Pathian pawi sawilo anih chuan rawn thehlut pawp pawp teh u. Lawm takin kan lo chhuah zel ang. 

Juniper enkawltuten in thawhpuina kan mamawh e.

********************

Juniper Editorial 23 August 2015

JUNIPER EDITORIAL

Kei leh ka thenawmpa chu mi hrang kan ni a, kan inthenawmna hi kan in hnaih nachan chu a ni mai a,mahsela in kawm ngeih tak kan ni, ani nen chuan kawng tam takah kan in ang lo khawp mai, duh zawng leh lawm zawng  pawh a dang. Ani chuan zing taka thawha Vanglaini chhiar nuam a ti, kei chuan tlai lam chhuak chanchinbu ka chhiar thung. Nimahsela, in anna kan nei a ni, Vanram kai kan tum ve ve a ni. Kohhran hrang, tum in ang kan lo ni a, biakin in ang lo tak ah kan inkhawm thin a, kan inzirtirna pawh a in ang lo khawp mai. Ka thenawmpa chu a awmna kohhran ah chuan a hlim em em a, an Kohhran an hlim chang te hian chhim ve tur hian min sawm thin a, kei pawn lo inkhawm ve tur pawhin ka sawm fo reng a ni. Mahse kan in tawiawm a rem tlat lo a ni. Ka thenawmpa nena Pathian faka zaia lam hi ka suangtuah fo thin, ani pawhin a chak ka beisei thin, “Engatinge thenawm in hnaih tak si hi Pathian thu hian min then tlat thin le” tiin ka in ngaihtuah chang a tam. Indona puangin ka thenawmpa ka do dawn em ni ang, chutiangin remruatna siamin hma la chho ila enge a hrin chuang ang, ka thenawmpa hlawkna hi ka tan chuan hlawkna a ni. Pathian thu sawipui dawn ila, ani chuan tha takin minlo ngaithla mai a, kei erawh chu hre ve tawka ka in ngaih avangin a thu sawi ngaihthlak chu ka tum lo hrim hrim a, ka thu sawi zawm tura ka duh lai hian a thu sawi chu engah mah ka ngai lo thung. Ka hriat hi hre ve se ka ti em em thin a, anin hriat a nei ve lo emaw tih mai tur khawpin, ka zawm turs leh ka tih tur aimah hian ka thenawmpa zawm tur leh tih tur chu ka thupui zawk a, ka Van kawng ai mahin ka thenawmpa van kawng chu ka buaipui ta zawk a, ka dik lohna aimahin ka thenawmpa diklohna chu ka hmu lian ta zawk a. Mahse ka thenawmpa chuan Hmangaihnain min lo dawh char char zawk hi a lo ni a...

JUNIPER EDITORIAL Dt. 16 August 2015

JUNIPER EDITORIAL

Intihhmuh..

Mizote hi intihhmuh ching tak leh mite tih chu tih ve tur emaw tih ching tak hnam kan ni a, nunze nghet lo lanna kawng khat pawh a ni reng a ni.

Damdawiah pawh thenawmnu in a ngeih chu ngeih ve tur emaw ti tlatte, eizawnna ah pawh miin a hlawkpui chu hlawkpui ve tura inngaih ngawtna te kan nei lian hle. Hei hi   chhia leh tha hriatna thiang hman tlem vang ti ila kan sawi sual tam awm love. 

Pathianin mihring a siam hian a hrang hlak vekin min siam a, hmel leh pianphung bakah rilru puthmang, mizia leh nunchang thlengin inang reng kan awm lo. Chumi anih avang chun kan nun kan hman dan pawh mite ang nilovin mahni in hrechiang hmasain kan tana tha tur leh hlawk tur chu ngaihtuah zawk tur a ni. Mahni inhriatchian hi thil har tak a ni a, amaherawh chu kan tum ngei ngei tur erawh a ni thung.  Eizawnna kawngah a ni emaw, thlarau nunah a ni emaw, nitin nun hmanna ah a ni emaw, mite hlawkpui ang kha ka hlawkpui ve kherlo thei a, ka hlawkpui tur chu keimahin ka ngaihtuah chhuak tur a ni. Kan taksa Pathianin a duan dan pawh a inan loh avangin mite dampui ang kha ka dampui ve kherlo thei a, ka taksa mil tur hre turin doctor ka rawn a ngai a ni.

Miten an tih avanga tih ve ringawt hi ka tan a tha em? Ka tan a tul ve em? tih hi inzawt hmasa thin ila, kan tan a tul ve lemlo a, kan hlawkpui ve dawn lemlo anih chuan mite tih vanga tih ve kher kha a tulna a awm chuang lovang.  Chutiang pumpelh tur chuan mahni kan inhriatchian a, rawn tur dik kan rawn a pawimawh hle.

Juniper Editorial, 2 August 2015

JUNIPER EDITORIAL

Crusade hi...

Tunlaiah Zoram khawvel chu harhna leh a behbawmin a tuam vel a, kalna lam apiangah leh hawina lam apiangah harhna leh hlimna boruak hlir maiin a khat a tih theih awm e, Kohhran hrang hrangte an hlim em em a, zantin mai inkhawm neiin hun engemaw chen an lo kal ta a, kohhran hlim leh thlarau chang sang inti Pentecost kohhran-te kan hawi kan hawi mai zawk hi a fuh ber lo a ni. 

Hetia Kohhranin Crusade a han buatsaih pawh hi boruak thlir chuan tih awm tak pawh a ni a, a lawmawm hle a ni. Mi kohhran an hlim a, an zai mup mup laia, thlarau hmahruaitu kohhran inti zawk kan reh duk mai hi a fuhlo a, a zialo hle zawk a ni. 

Crusade hi kohhran memberten hmang tangkai ila, intuaithar nan leh insiamthar nan hmang tlang ila, Kohhran dangte awh khawp leh entawn tur leh, kaihruai thei turin kohhran hian tan i la teh ang u. 

Ral atanga lo sawisel mai lovin, an kal fuhlohna lai leh an tihdiklohte a lo awm anih pawhin kaihruai thei turte, kawng dik kawh hmuh thei tur leh zirtir thei turin i inbuatsaih tlang ang u. Kawng tha zawk leh dik zawk kan kawhhmuh thei anih siloh chuan sawisel ringawt leh phunnawi ringawt te hian sawtna a nei silova.

Mitinte’n thlarauvah hlawkna chang ila, chaute pawhin chakna thar an lo neih a, hnung tawlh tawhte pawhin hmalam an lo pan a, sual simlo ten an lo sim a, chhandamna an lo channa hun nise a duhawm hle mai.

Juniper Editorial, 26 July 2015

 JUNIPER EDITORIAL

Eng angin nge miten min hriatreng ang??

 
Kan kohhran tana mi hmasa leh thlarau hmahruaitu leh Bethlehem Veng hming phuahtu Pu Zikpuia chu kan lo chan ta reng mai. A uiawmin mite thinlungah pawh nasa takin hmun a chang thar leh tih kan hre theuh awm e. Mihring lama thlir chuan dinhmun sang leh chhuan tur engmah a nei bik chuang lo, amaerawhchu mite thinlungah hna nasa takin a thawk a, a vuina hun pawh minaran leh mi tam zawk chan phak loh, programme danglam bik leh ropui takin YMA Hall ah buatsaih a ni a, a phu hle a ni tih chu mitin ngaihdan a ni.

Engvanga chuti taka ropui bik chu nge anih tak? A dam laia a thiltih leh Pathian taka a inpekna vang chauh a ni. Khawvel ropuina chhuan tur neilo mahse, a neih rohlu Pathian’in a chawimawi ve thung a ni.

Mitin hi he khawvel atanga la kalchhuak vek tur kan ni a, kan kalve hunah miten eng angin nge min ngaih ang a? Engtin nge min hriatreng ang?A hriltu tur chu midangte bula kan nundan leh mite tana kan inpekna leh Pathian tana kan thawh danin ala hril dawn a ni. Chawimawi leh ropui taka invui liam chu mitinten duh vek mah ila, kan damlaia kan nundan in a zir miau loh chuan duh eng ang mah ila, kan dawng pha dawn chuang lova, Pu Zikpuia pawh a boral tak avanga ropui nilovin a damlaia a inpekna leh a thiltih avanga ropui a ni zawk.

“Tun hun” hi kan thilneiha hluber a ni a, kan nakin hun hril tur leh kan hun liamtawh siamtha thei om chhun a ni, chuvangin tun hun hi hmang tha ila tichuan miten tha takin min hrereng dawn a ni.

Juniper Editorial 12 July 2015

Tanpuitu..

Tunlaiin thalai zingah mahni nunnla la a, inthat tam tak an awm tih kan hria a, Mizoram ah pawh heti zat an awm chuan khawvel pumah phei chuan tam tak an awm ang tih a rin theih mai awm e.

Mahni inthatte hi an khawngaihthlak a, rilru na leh rilru hah avanga inthatte phei hi chu an lainatawm lehzual takzet a ni. Depression neih hi thil har tak a ni lem lo a, tihdam erawh har leh buaithlak tak a ni. Miin depression a neih tawh chuan a khawvel hi a thim a, a hmalam hunah beiseina reng reng a nei tawh ngai lova, chu beidawnna chuan a vawrtawp a thlen chuan mahni nunna hial pawh an la ta mai thin a ni.

Kristian tan chuan Depression neih hi thil awm lo tak ni mahse, a thleng ve miau bawk si a, chuvangchuan mitin hian eng emaw chenah mawhphurhna kan nei a ni. Kan vela mite, kan thiante hian a rukin Depression an lo nei reng em?? An rilru hahna pawh hrilh ngamlohna kan ni em? An rilru hahna chhawk zangkhaitu nge kan niha tih zualsak tu.

Mahni theuh kan inenchian a ngai hle mai. Miten an harsatna kan bula an sawia, lo uanpui emaw, lo nuihsan mai hi thil chindan thalo tak a ni a, chutiang tih ching mi kan nih chuan kan bulah miin a harsatna a sawi ngam ngai dawnlo a ni.

Miten an harsatna min hrilh hian kan puihna tam tak an phut kher lo a, kan ngaihthlaksak a, kan tawrhpuina kan lantir hi rilru hah hnem nan leh nunna chhan nan a tawk em em a ni.

******************

Juniper Editorial (5 July 2015)

JUNIPER EDITORIAL

Mi tana malsawmna...

Mizo ten rualbanlo kan tihte hi sap ho leh hnam changkang zawkte chuan an lo ngaihsakin, an hamthatna turte an lo ngaihtuah nasa em em a, tin, mi changkang apiangin anmahni support a, tanpui nachang an hre thin. 

Hnam naupang tih takah Mizo-te hi chuan rualbanlote hmuhsit leh diriam mai kan chin lohna hi ala rei lemlo hle a, thenkhat mawl fal leh zirtirna dawng tlem deuh chuan hmuhsit a, chhaih nawmnah mai ching tawk pawh an la awm nawk mai.

Hnampui leh fing zawk chuan an koh danah pawh an fimkhur a, an duhsak em em a, ‘Disabled’ ti a an koh pawh thlak tumin ‘Differently Abled’ - ‘Theih dan danglam bik’ tiin an lo sawi zawk thin a ni.

Rualbanlote enkawl dan leh hmuhsit leh chhawnchhaih chungchangah pawh Mizo-te hian hma kan sawn nasa hle a, mi changkang, hawizau deuh chin leh zirtirna dawng tha chin hi chuan hmuhsit leh chhawnchhaih ai chuan anmahni theih ang ang a support an lo ching ta zawk a, a lawmawm hle mai.

Kan Kohhran pawhin hetiang kawnga hma kan la a, An Puala Sunday-te kan han nei thei hi a lawmawm a, hei hian rah tha chhuah sela, chu chuan kan kohhran hmel mawia mai aiin kan Mihringpui, Pathianin duh leh hmangaih taka a siamte tan hian nun hahdam leh thlamuanthlak a siam ang a, an tan khawvel hi a lo nuam sawt dawn a lo ni.

An taksa leh rilru a harsatna nasa tak an tawh hi an tan chuan a hrehawm tawk a, an hrehawmna tizualtu ni lovin a chhawk zangkhai tu nih i tum theuh zawk ang u.

*********************************

Juniper Editorial 21 June 2015

 JUNIPER EDITORIAL

Thianghlimna...

Kan hriat theuh angin kan kohhran chuan “Thianghlimna” lamah hma nasa takin a la a, a ropuiin a tha hle mai. Amaherawh chu ‘thianghlim’ erawh chu thil har berte zinga mi a ni si. Hruaitute pawhin theih tawp chhuangin kumpuan tih hlawhtlinna turin hma an la a, thianghlimna committee te dinin an phak tawkin tan pawh an la nasa hle mai. Nimin maiah pawh Seminar te neiin Bial chhung mite tan Tobacco leh a kaihhnawih lam zirhona neih a ni a, khang programte kha a hmunah khan a tawp mai ang tih a hlauhawm, khang kan programme buatsaihte khan kohhran mipuite hi thleng phak ve se, a kal ve lote pawhin engtin emaw tala hlawkna an chan ve theih a duhawm hle mai. Kha programme ah khan tel satliah mai lova, midangte zirtir chhawng thei kan nih a pawimawh hle a ni. Vaihlo do na lama thawkten min zirtir reng thei dawn lova, tin kohhran mipui zawng zawngte pawh an rawn zirtir vek senglo a, chuvangin zuk leh hmuam la ti lo,naupang zawkte leh kha huna kal velo te pawhin zirtirna an dawn ve hi a pawimawh a, a hlawhtlinna tak tak tur zawk pawh niin a lang.

    Zuk leh hmuam ti tawh sa inngheitir tum vak hi a tha a, nghei phah pawh tam tak an awm tawh a, a lawmawm khawp mai, mahse chu aia pawimawh zawk ni a lang chu a la ti velo leh naupang zawkte ti miahlo tura zirtir hi a ni, chu chuan zuk leh hmuama kan kohhran hmalam hun hi nasa takin a hril dawn a ni. Sap thufing pawhin “Bul tan that chu a chanve zo ang a ni.” a lo tih thin kha.

    Bul kan tan that phawt chuan kan hmalam hun hi a eng hle dawn a, kan thil beih mekah pawh hian nasa takin hlawhtlinna kan hmu ngei ang.

 

*********************

Juniper Editorial (Dt. 14 June 2015)

JUNIPER EDITORIAL

Thawhrimna leh Malsawmna:

    Ringtu nih leh thawhrim hi a inhmeh a, ringtu tha inti si, thatchhe tak leh hnathawh aia thlarau par tlan duh zawk zel hi a awm theih khawp mai a, chuvangin ringtute pawh inbihchiah a, inenlet kan mamawh tlang theuh a ni.
    Kan Bible pawhin, Rinna chu thiltih tel lo chuan THI anih thu min hrilh a, chuvangchuan kan rinna tihlawhtling turin thil kan tih a ngai a ni. Mi harsa tak, eitur neilo awm ta se, a inah va kalin, eitur emaw a leina tur emaw va pe lovin awmhmunah tawngtai sak vak ta ringawt ila, kha kan tawngtaisak na khan awmzia a nei tlem hle ang. Chu ai chuan a tan tawngtaiin, a inah kalin eitur va pe bawk ta ila, kan rinna chu nung a lo ni ang a, Pathian duh dan angin midang tan malsawmna kan lo ni thei dawn bawk a lo ni.
    Midang tana tawgtai hi a tha teh meuh mai. Tih theih dang a awm tawh loh hnuah phei chuan a aia hlu a awm chuang lo. Amaherawhchu a taka lantir theih hunah hi chuan mahni che chhuak chuang si lova, tawngtaina ringawt hi chuan kawngro a su tam vakin a rinawm loh a ni.
    Kan thiltihna kawng engkimah kan theihtawp kan chhuah hi mihringte tih makmawh a ni a, kan tih theih bak chin erawh Pathian kuta dah bak tihtheih kan nei tawh lo. Mahni theih tawp pawh chhuah tum lo a, Pathian kuta dah tawp hi a dik berin a lang lo. Entirnan:- Lekha zirlai chuan a tum ber chu exam a hlawhtlinna chan a ni a, chumi tur chuan amah a inbuatsaih a ngai a, lehkha a zir a ngai a ni. Mahse, lehkha zir lovin tawngtai ta ringawt se, exam-ah chuan a hlawhtlin a rinawm loh a ni.
    Chuvangchuan, kawng engkimah, theihtawp kan chhuah a, kan tawngtai bawk hian Malsawmna chu kan chang zawk thin a lo ni.

***********************

Juniper Editorial 7 June 2015

JUNIPER EDITORIAL

KRISTIAN DAN DIK

    Mizo mipui za a tam zawk fe te hi chu kristianah kan inchhal a, India mipuite leh ram dang mite pawhin Kristian state ti hialin min hre thin. Heti taka kristian tamna state ah hian rorelna dik a awm em? Mihring kan thlamuangin kan inhmangaih tlang em? In sawisel leh in elrelna a bo em? Mirethei an tlemin mite tana inpe leh mite harsatna a pui thin vek kan ni em? A chhanna chu sawi ngailo in kan hre nghal vek mai awm e.
    Han ngaihtuah mai hi chuan a chunga kan tarlante khi chu awm lo vek mai awm hian a lang a, a chhan chu a tam zawk Kristian kan ni miau si a. Kristian chu Isua Krista ringtu, Isua hnung zuitu leh a duhzawng titute hi an ni si a, chutiang mi chuan mi elrel leh sawisel, mite tana harsatna thlen hi chu a tih loh atan mawi a ni bawk si. Mite tana harsatna thlentu, mite rilru tina thintu, mite sualna hmuthei tak, an insiamthatna tura engmah tichuang silo hi Kristian dik a ni thei dawn em ni!
    Kristian, thlarau mi tak inti chung si hian miten an bula an awm duh loh, an kawm chak loh leh an bula  thil tih an hreh deuh hi kan lo ni reng thei mai awm e.
    Kristian dik tak chu Biakin chhung nilo, Biakin pawna a nungchang leh awmdan-ah a lang thin a, mite tana a thiltih-ah a langchhuak bawk thin.
    Kristian luangchhuak lo hi thil inhmehlo tawpkhawk a ni a, kan zui ber leh kan Kristian chhan kan Lal Isua meuh pawh kha, mite tana inpe zo vekin a thihni thlengin a nun a hmang anih kha.
 Chuvangchuan Kristian luangchhuak lo nih leh mite tana harsatna leh hrehawmna thlentu nih hi Kristian dik tak tan a inhmehlo tih hi i hrereng ang u.

***************

JUNIPER EDITORIAL: 22 February 2015: VOL XIX ISSUE NO: 8

Thuziak tura insawmna

    Aw ka thu chhuak chuan min hneh viauin lang thin mahse, aw a chhuah rual rualin a thamral leh mai thin a. Chutihlaiin Thuziak erawh chuan kum tam tak mai nilovin dam chhung mai bakah thih hnu thlenga kan awm tawh loh hnu thlengin a daih thung a ni!
    Chanchin Tha hril tur chuan Thuziak kan mamawh hmasaber a. Chu Thuziak-a chu kan Nunna Bu ‘Pathian Lehkhabu Thianghlim’ hi a ni ti ila kan sawi sual tam lovang. Kan hma a mi thianghlim kaltate vawiin ni thlenga an chanchin kan chhiar theihna chhan pawh Thuziak vang a ni a. Kan zingah tel ve lovin an hmel leh an aw-ka te hre lo mah ila an Thuziak  chuan kan thinlung chhung ril ber thlengin a fangchhuak thin a. Chutah chuan Pathian Thlarauvah hlimna leh lawmnate kan lo chan ve phah thei ta thin a ni.
    Krista chu Kohhran Lu anih avangin awm hrang thei a ni lova, a inzawm tlat angai ang bawk hian Kohhran tinung tur chuan Pathian thu aw-kaa kan sawi chhuah mai bakah Thu Ziaka kan dahthat a tul ve bawk thin a ni. Thuziak chuan kan thinlung chhunga kan vei leh tha ni-a kan hriatte sawi chhuahna hun tha min siam a, midangte hnena kan sawichhuah theihloh leh kan sawichhuah ngamlohte tarlanna hun tha min siam thin a. Chuvangin Pathian Kohhrante kan chak lehzual zel theihna turin Thuziak lamah tan ila sauh sauh ang u.
    Kan Kohhran kan lo hmasawn a, rinna kawngah chak thar lehzualna kan neih zel theihna turin Kohhran member tinte ziak mi tha tak takte, kan tualchhung chanchinbu-ah hian in thuziakte (Article) lo thehlut turin kan insawm thar leh bawk a ni. He khawvelah hian lo awm tawhlo pawh nila i Thuziak erawh chu a awm reng ang.

Editorial Juniper 31 May 2015

JUNIPER EDITORIAL

Naupangte hian zirtirna tha dawn hi an mamawh em em a, kan zirtirna pek kawngah pawh hian fimkhur a ngai hle mai. Nakin lawka kan ram leh kohhran hruaitu turte an nih avang hian keini puitlingte hian kan zirtirna pek kawngah hian kan uluk hle a ngai. “Naupang chu a kalna awm kawngah chuan zirtir ula, a upat hun pawhin a thlah lovang” tih Bible-a kan hmuh ang hian an chet dan phung, an hawiher leh mizia thleng hian kawngdik kan kawhhmuh a tul hle mai. Naupang rilru hi a thianghlim hle mai a,  lehkhaphek var tak ang a ni a, chu lehkha phek var thianghlim takah chuan puitlingte hi a ziak tu turte chu kan ni. Chuvangin chawl lova kawngdik kan hrilh mawlh mawlh a ngai a ni. 

    Naupang than lenna zel turah leh kaihhruai danah chhungkuaa inzirtirna tha dawn hi rahbi hmasa ber a ni a, chhungkaw tinte hian mahni fate leh naupang theuh enkawlna hna hi nu leh pate hian mawhphurhna lian tak kan nei theuh a, chuvangin nu leh pa ten tan ila zel ang u.

    Tin,  kohhran anga kan  nun ho naah hian kan fimkhur a ngai hle mai. Kan tawngkam hman danahte ,kan BIak-in nungchangte, kan thusawi leh awmdanah te hian entawntlaka kan awm hram hram hi a pawimawh hle mai. BIakin-a kan kal dawnte hian Bible leh Hla bu ken nachangte hi hria ila, hla hriltu kuta kan han innghat ringawt mai te hi chu a zia lo lam a ni. Tin, thalai thenkhat ten inkhawmlaia mobile phone kheuh neuh neuh an chingte hi sim atan a tha hle mai. Chuvangin,kan nun dan zawng zawngte hi naupangte rawn zawh tur a ni tih kan hriat a, kawng engkimah kan fimkhur theuh hi puiltling zawkte mawhphurhna a ni tih hi i hrethar theuh ang u.

*****************************

Juniper Editorial Dt. 17 May 2015

 JUNIPER EDITORIAL

Thlarau nazawng...

    Kan Pathian thu ah hian Thlarau nazawng a awm thu leh zirtirna dik lo a awm tih thu chiang tak in kan hmu a. Chuvang chuan zirtirna diklo leh Thlarau nazawng ni awm hi enge kan ngaihtuah a ngai. Chutih rual erawh chuan thlarau dik leh diklo kan tehna tur chu ngun taka kan ngaihven a ngai, mahni rindan dan a lo sawi ve ngawt chi chu a ni hauh lo ang.
   
    Zirtirna diklo pawh a awm ngei a, Tirhkoh Paula te ngei pawh khan Vana Vantirhkoh te ngei pawh in zirtirna dang Pentecost ni a kohhrante tih dan nilo kha chu rawn hrilh che u pawh nise lo awih suh u a tih kha. Tunlaiah kohhran thenkhatte an hlim in an bei nasa khawp mai. Lalpa hi Isua a ni tih ringlo te leh awih lo tute chu eng thlarau pawh nise awih loh a, rin loh nachang te pawh kohhran te hian kan hriat a tul khawp mai. Thlarau nazawng hre tur leh zirtirna diklo hre tur in thuthlung fate pawh kan inbuatsaih a, kan insiamthar a ngai. Anih loh chuan kan rinna te a lo derthawng in kan lo buai mai ang tih a hlauhawm tak meuh meuh a ni.
   
    Engpawhnise, sawisel mai lova kan theih ang ang a Pathian thu dik leh thlarau dik tak hrilh hriat hi kan mawhphurhna a ni tih kan hriat a ngai tak meuh meuh. Kan Pathian hi  a thuthlungah lo chuan a lo kal dawn lova, a fa ni lo chuan a Vanram an luah thei dawn lo tih hi kohhran ho te hian kan vawn tlat a ngai a ni. Pathian hnenah tawngtai chunga kan rinna kan sawh ngheh sauh sauh a pawimawh e.

JUNIPER Editorial Dt. 10 May 2015

 JUNIPER EDITORIAL

Kawng thlan fuh a pawimawh..

Zirna kawnga mel lung pawimawh tak HSLC leh HSSLC result chu MBSE chuan a tichhuak leh ta a, kan kohhran atang pawhin hlawhtlinna chang engemaw zat an awm a, a lawmawm hle mai. Chutihrual chiah chuan hlawhtlinna changte ko -ah hian duhthlanna lian tak mai, siam harsa tak, siam fuhloh a nghawng pawi tak nei thei, siam fuh erawh chuan  damchhung hlawhtlinna thlen thei khawpa pawimawh chu a awm a, fimkhur tak leh thui tak dawn chunga duhthlanna siam a pawimawh hle mai.

Zirlaite mai bakah hian nu leh pate pawhin mawhphurhna pawimawh tak an nei a, kan faten duhthlanna dik an siam theihna tura fuih leh hrilhhriat hi kan tih makmawh a ni. Mi thenkhatin “chumi chu a tha” an tih vang mai kan fate chutiang kawnga kal tir ve  ta ngawtte, kan fate mizia leh tuina lo lam deuh zawhtir daih pawh hi thil awm thei tak a ni a, mi tam tak tihsual fo na pawh a ni reng a ni.

Mihring reng reng chu, a tuina leh a duhzawng tak a tih chuan hlawhtlinna pawh a chang awlsam a, teirei peihna leh tumruhna a nei thin. Chuvang chuan zir zawm tur leh an nu leh pate pawhin duhthlanna an siam dawn hunah an tuina leh nakin thleng pawha hlawhtlinna pe thei ngei tur an thlan thiam a pawimawh hle a ni. Hemi tur hian mithiam zawk leh tawn hriat lo nei tawhte zawh ngam pawh a finthlak hle awm e.

Tunlai chhanah eizawnna a harsa tawh a, lehkhathiam an tam tawh bawk si a, “Mainstream’ lutuk lo deuh a kal pawh hi a finthlak hun a awm chawk a ni tih hre tel bawk ila a tha awm e.