INKHAWM KALPHUNG
Rev. JH Za Hluna
Kohhran a lo zahawm nan te, Kohhran chu mimal aia a ropui zawk zia a lan zel theih nan te, Kohhranah chuan muk tak leh puithu zawk, rau tak bawk sia Pathian dan thute zawm a nih zel theih nan te inkhawm dan kalphung zahawm tak a awm a. Pentecost Thlarau mite zingah Kohhran aia mahni rau chan dah lian zawk leh, mahni duh dan chu Kohhran kaldan tur emaw ti khawpa Thlarau chapo chang kan tam hle thin. Chuvang chuan Kohhran inkhawm dan kalphung hi kan zira, chumi mil tura mahni kan inher rem a pawimawh. Keimahni milin Kohhran hi kaih her kan tum tur a ni lo va, kohhran milin keimahni kan inher rem zawk tur a ni. Hei tak hi UPC Kohhran kan buai fona chhan bulpui a ni.
Kohhran inkhawmah chuan Chairman hi hna pawimawh tak chelhtu a ni. Chairmanin kaihruai lova tu tu te’n emaw lamtual atang te, mahni thuthmun atangtea inkhawm an rawn kaihhruai hian Kohhran zahawmna a bo va, inkhawm a deldul a, thenkhat tan ninawm a lo ni thin a ni. Hlasak hun te, tawngtai hun te, thuchah ngaihthlak hun te hi chairmanin vawn tlat tur a ni. A duh duhina ‘chumi hla chu i sa leh ang u’ an tih mai mai theih khawpa chairman hi zahawm lova awm tur a ni lo. Hla pawh hi chairmanin Kohhran boruak ena thlan a tha ber. Mahni tuipui zawng leh lung tileng zawng ni lo, kohhran boruak a zira kan tuipui ngei tur thlan mai tur a ni. Tute’n emaw an mahni mimal boruak atangin emaw, an chhungkaw boruak atang emawa an thinlunga hla lo lang an thlan thin hian, an boruak tawn ang tawng velo mipui tan tuipui a har thin a ni. Kan kaihhruaina hian mipui a huapzo ngei tur a ni.
Tantu hna hi hna pawimawh tak a ni leh a. tantu hi inkhawm Pathian hnena hlan tura ruat an ni a, chuvangin hun hmasa lama koh thin an ni. Tunlaiin tantu hi kan hriat sual nasa ta hle mai, tantu te’n thusawitu hmasa emaw an inti niin a lang. tantu nihna changute te hi inbuatsaih chiama sermon thlak ve ringawt tur an ni lo. Tantu chuan Pathian Thu sawi fiah ngai lova fiah sa Bible chang chhiar a tawngtai mai tur a ni. Chairman leh tantu tun chuan Pathian Thu tha leh fiah sa, Sam le Thufingte atang te leh fakna hlabu lam te leh, Isua zirtirna fiah leh lang tlang ho hi chhiar thin tur a ni. Zawlnei te thuril pui pui leh hun lo la awm tur chanchinte hi , sawifiahna hun a awm loh avangin Chairman leh tantu dinhmun atanga chhiar chi an ni lo tih hriat a tha.
Thuhriltu hi Inkhawm hun chanve aia tam mah pek kan nih thin avangin fimkhur a ngai hle. Thuhriltu tamtak chuan kan thusawi hunte hi kan huatzawng te beih nan te, mahni chhungkaw chanchin sawi nan te, kohhran rorelna a kan tel vel lohna thil sawina remchangah te hman kan chang fo thin. Thuhrlitu chu inkhawm hote Pathian thutaka chawmtu tura ruat an nih avangin tawngtaina nen uluk taka inbuatsaih tur a ni. Pathian Thu hi a nihna taka sawi a pawimawh a, mahni dinhmun tinghet tur emaw, kan huat zawngte inhmuh chhuah nan leh an chan tichhe zawng tura kaihlek tur a nillo.
Pathian Thu awih lo tute chu eng anga hausa leh mihrinna lam a zahawm pawh ni se, Pulpit tlang atangin thiam chantir ringawt tur a ni lo. Milian leh mite ber pawh a tha chu tha, a dik chu dik leh a dik lo leh tha lo na na na chu thalo leh dik lo kan tingam tur a ni a, an dik lohnaah thiam loh kan chantir mai tur a ni. Pathian Thu sawituin mahni duhna leh chakna tihpuitlin tuma rei pui pui sawi ringawt tur a ni lo. Pathian kohhran ho mamawh leh phak tawk zela ngaithlatute zah taka thusawi a pawimawh. Thuhrilru thenkhat hian kan chezia leh tawngka chhuakah mipui lam zah lohna leh deuna lama ngaih theihin thu kan sawi lek lek thin a, hei hi a tha lo. Kan thusawi ngaithlatute hi kan hnuai chhiah tur a ni lova, an rawngbawltu, an hnuaia awm kan ni tih hi kan inhre reng tur a ni. Thuhriltuah pawh, a engah pawh hian ‘THLARAU DAWTHEI” a awm theih thin avangin, thlarau dawtheiah kan tang tur a ni lo. Pathian min pek chin zel kan sawi hi a pawimawh hle a ni. Tin, tute tihdan emaw, an fiamthu thawh dan emaw chena copya thusawi hi mite’n an ei vak lo. Xerox copy ai chuan Original nge nge hi mite’n an duh zawk thin a ni. A bik takin tirhkoh zingah rawngbawltu hnungzuia kal tawh thinte’n an zui thina te an copy duh viau a. Inzui ta na na na chu eng emaw laia tihdan in lak mai hi chu a awl hle thin a. Chezia leh thusawi dan hmang inchhun satliah hi chu a pawi lo, tawngkam hman dan leh fiamthu chena a ngai ang diak diaka kharchhawn hi chu a mi den a na lo duh deuh.
Khuangpu leh hla chang sawitu hi tun dinhmunah chuan Kohhran inkhawma chanvo pawimawh tak a tling ta. Tawngtaina leh inhlanna uluk tak neia hla hruai leh hla chang sawi hi thil pawimawh tak a ni. Mipui lam tui leh tui loh ngaihsak lek lova mahni tuina kalpui mai tur a ni lo va, tui loh na na na chuan hlate hi laknawn kher pawh a ngai lo. Hla sak a ni emaw, Pathian Thusawi a ni emaw,ning rawih khawpa tih hi a tha lem lo, a tlangpuiin kham lo lam zel hi a tha zawk.
Kohhran hi tunlai atan mai a ni lova, Lalpa lokal leh hma zawnga awma, Krista mo ni tura vana lak chhoh tur a nih avangin duhthawh tak te, hmahmawh tak tea kalpui rum rum tur a ni lo. Vawi hnih khat hla thlan sual avanga tawp mai tur a ni lo va, tu emaw rau avanga nung a ni hek lo. Zion Pathian khawpui, a mite himna tura Lalpa ruat leh din a nih avangin zahawm tak leh tha tak, rau tak leh fimkhur takin a kal zel dawn a ni. Pathian Thlarau hruaiin, kan zavaia tuna hlawk leh hlimawm thei ang bera kalpui tur a ni.
LALPAN kan zavai atan malsawm rawh se, AMEN
No comments:
Post a Comment