Ka Zinna Ram - K. Lianthanga; JUNIPER ARTICLE (3rd May 2015)

 

 

 JUNIPER ARTICLE

 

KA ZINNA RAM

- K. Lianthanga

    Awle, he khawvel ka zinna ramah hian, sawi tur chi hrang hrang ka ngah ve tawh khawp mai.  Genesis 47: 8-9 thu kan chhiar chuan Pharoah-a chuan Jakoba hnenah chuan, “Kum engzat nge i nih tawh?” a ti a, Jakoba chuan, Pharoah-a hnenah, “Ka khualzin kum chin chu kum za leh kum sawmthum a ni a, ka dam chhung kumte hi a tlemin a hrehawm a ni.” tiin a chhang a. Kei pawh Lalpa kaihhruaina avangin tunah hian ka khualzin kum chin chu kum 69 (sawmruk leh pakua) ka hmang mek a ni. Tichuan, Jakoba sawi ang khan ka dam chhung hun ka lo hman tawhah hrehawm taka awm chang a awm fo thin a, he lei hi zawng a hrehawm a ni. Lalpa ram ngaih a va na thin em! Mahse, he kan hrehawmna avangte hian a ni Lalpa ram kan ngaih thin ni. Khawvelah hian nuam hlirin awm ta ila, kan Pathian A hming Lal Isua chu kan hrelo maithei a ni.  Hetia hrehawma kan awm thinte hi, Amah Lal Isua kan hnaih zawk theihna tura Lal remruat a lo ni thin a ni.

    Awle, Lalpa min kaihhruaina avang zelin Dt. 31. 3. 15, Thawhlehni khan Rabung lama kan nau, Pastor H. Lalropuia (Mapuia)-te chhungkua N. Vanlaiphai lama transfer an nih avanga hruai turin ka chho ve a. Tichuan a tuk atangin Rabung atanga rawn tlan let pheiin Khawzawl-ah, Khawhai lamah, Biate-ah, E. Lungdar-ah, Mualcheng kal pel zelin N. Vanlaiphaiah kan lut ta a, Pastor Quarters lian leh tha tak maia kan han lut chu Pentecost Kohhran U leh Nauten namen lova min lo lawm kha a nuamin ava ropui em! Rabung lam unau ten an Pastor-te chhungkua an ngaiin an chawimawi hle mai. Mi 40 aia tam zet mai thlahtu, hruaitu an awm thei kha ava ropui em!. Tichuan zankhat kan riak a, a tuk lamah chuan Rabung unaute an haw a, keini kan nau Buanga motor keng zelin Chekkawn lamah, Khawlailung-ah, Mat lui lei, zawh lai bengchheng zet mai rawn tlan pel zelin, Sialsuk-ah ei leh inna neiin kan chawl a, Ruah a sur tan tawh a, tichuan Chamring rawn tlan pel zelin, Maubuang dai kan lut tan tihah chuan ruah a sur tawh lova, rialpawh a tla tawh lova, mahse kan thlen phei hma a rial lo tlate chu kawngsir lehlam lehlamahte chuan an la var thal pheng phung hlawma, a lian thin ngei mai. Buanga’n a motor a tidinga, rial lian zual chu a rawn la a, kei chu motor chhunga awm ka ni a, a lan dante ka lo hmer chhin zela, ka  hmer zawh loh a tam ber a, chung zinga a lian ber chu zung thum beng zet hian ka hmer zo lo a, hetianga rial lian hi ka la hmu ngailo a ni.

    Awle, ka zinna ramah chetsual mai theihnaahte, thlipui, ruahpui leh rial lian lakahte Lalpa’n min humhim avangin Lalpa hnenah lawmthu awm rawh se.

Hei leh chen kumtam min hruaitu,
Ka Lalpa ka tan i va tha em,
Malsawm tinreng ka chhiar seng lo;
Hlim leh lawmna chatuan nun nen.

I tello chuanin mitkhap kar pawh,
Ka nung zo lo ka chau leh thin,
Nang chauh hi i ni ka duh ber leh
Chatuan thlenga ka belh tur chu.

Lalpa’n malsawn rawh se. AMEN.