SUNDAY SIKUL IN MIN NGEN E By. K. Lalfamkima; [JUNIPER Article 26 April 2015]

JUNIPER ARTICLE

 

SUNDAY SIKUL IN MIN NGEN E

By. K. Lalfamkima.

    A hmasain he thupui  “ Sunday sikul in min ngen e,” tih thupui hi ka rilru a awm ang pawn ka rawn siak chhuak thiam kher lovang. Nimahsela, khawngaih a minlo chhiar chhuahsak hram turin ka ngen a che u. Mahni pawh eng ni silo hian ka rawn thlasik mau puah ve pawp mai dawn a; tu pawi mah kan sawi em lovang chu maw!

    Awle, Sunday sikul nge kan ngaih pawimawh zawk kan nitin sikul le? He zawhna pahnih hi khawi zawk hi nge i ngaih pawimawh zawk? A then chuan an pahnih hian an pawimawh ve ve tiin, chhan harsa an ti viau mai thei a ni.

    Sunday sikul NI khan sunday sikul pawimawhna chu kan hotuten an rawn sawi tawh a; a then a zar kan han thai lang ve ang e.
    Sunday sikul pawimawhna hmasaber chu, Vanram kawng min kawhmuhtu pakhat a ni a. Tin, kan nitin nundan mawi min kawhmuhtu leh nungchang tha min zirtir tu ber a ni bawk. Sunday sikul kal ngai miahlo puitling tawh chaun, Biakin a ngaina ngailova, a inkhawm peih bawk hek lo. Thufing chuan heti hian a sawi a,” Naupang chu a kalna kawngah chuan zirtir ula, a upat hun pawhin a thlah lovang”. (Thufingte 22:6)

    Nitin sikul ve thungah chuan Pathian thu lam zirtirna a awm ve lem lova, khawvel finna te, changkanna lam leh hmasawwna lam hawi hlir min zirtir a. Pathian thu nen chuan a in persan nasa em em a ni.

    Chawlh kar khatah ni 1 chaih hi inkhawmna hun a awm a, Sunday sikul phei chu chawlhniah chauh leh nghal. Kum tir atanga vawin thlenga hming ziak (PTSS) chu, kan Biakin bikah chuan, member 337 vel bawr chauh kan nih laiin, a zatve vel 180-200 vel bawr chauh hi inkhawm kan ni tlangpui thin a ni. Pathianni chawhnu ah phei chuan Sunday sikul a awm tawh lova 50-80 vel bawr hi regular takin kan inkhawm thin.

    Hawh teh u, kum tira hming kan dah ringawt khan Vanram min thlen lo maithei a nia. Nitin kan thlen chin atang hian hma i sawn zel ang u khai!! Ei leh bar lamahte, Pathian ngaihsakna lamahte, khawvel hriatna lamahte, taimakna lamahte hian i thang zel ang u khai. A bik takin Pathian biakin kal tamah hian hma i sawn deuh bik ang u. Tin, Pathian Thlarau la dawng lo tan dawng thei turin tan i la zual deuh deuh ang u. Kan thenawm Kohhran hote pawhin thlarau lamah chuan min chho en tawh biklo a nia.

    Engpawh nisela, kan thlen chin atang hian hma i sawn zel ang u (Phil 3:16). Nikum 2014 khan Sunday Sikul vawi engzat nge ka kal ve a, kumin 2015 ah chuan  kan kai kim theih loh pawn kai tam i tum ang u khai!! Inkhawm kan peihlo anih pawhin kan peihlohna tak kha hneh ila kan peih a ni mai!! thil har tak a ni hranpa love.

    Khawvel ah Pathianin tumah taima turin a siam bik lova, tumah pawh thatchhe turin a siam bawk hek lo. Miin an ngaihpawimawh leh tul an tih chu an thawk zel a, mutmawh hnarmawhah an neih chuan an tilo theilo a ni. Chutiang bawkin Sunday Sikul kal leh inkhawm vel hi ngaihlungrun tur vak pawh a ni lo; kal hmiah mai tur a ni. Tin, kan inkhawm anih rau rau chuan a tlai pawl ah tang lo hram ila, a van tha dawn tak em!!

    Nitin School (Sikul) kan kalve lai chuan, tlai kan hlau thin em em a, kan tlai vaih chuan pawnah nisa hnuaiah min din tir reng thin a, a chang leh beng pawtin vawi 100 te min suk tir thin, a hrehawm thei em em a, a zahthlak bawk nen, hetianga min hrem ngat chuan a tuk atang chuan kan tlai ngam tawh thin lo.

    Biakinah chuan kan tlai pawhin inhrem a awm ve lova, chutah kan lo tlai anih pawhin kan zak chuang lem lova, kan la uang zawk mah emaw a ni a, kan fate nitin sikulah tlai thin turin kan duh em le? Tumahin ka duh kher lovang. Chutiang bawk chuan biakinah pawh hian dar nawn hmain inkhawm tur chu luh hman hram hram tum thin ang u khai. Lohtheihloh thil bikte anih chuan a hriatthiam theih deuh a, chuti lova, a tlai thangte tlai reng mai zawng inkhawm pawh a zahawm lo thin a ni. Kan Pathian hi tlai ngailo Pathian a ni si a.

    Tin, kawng dangah, Pathian faka zai leh lam lamah hian hma kan sawn a ngai khawpin ka hria. Nikum khan Pathian faka vawi khatmah lam lote kan awm maithei, tin, lo lam tawha tun kuma lam zawm lem lote pawh kan awm maithei. A tam thei ang ber lam tum ila, miin a thinlung zawng zawnga Pathian a fak chuan a lam lo theilo a ni. Thenkhat  chuan, “Lam kher a ngailo, heti pawh hian ka hlim tho alawm.” a ti maithei, mahsela, Pathian in, “Ani hi chu lam ngailo turin ka ruat a, ani zawk hi chu lam tam deuh turin ka ruat” a tih hmel lem lo a ni. Chuvangin, rilrua a thawh deuh lem loh pawn lam tawp mai ang u. Hawh u, i hel nuai ve hrim hrim ang u hmiang. Kan Pathian engtiklai pawha minlo hmu reng thintu chuan a malsawmna in min vur mai dawn alo ni, tichuan a thlarau thianghlim kan dawng ang a, lam kan chak reng tawh mai dawn a ni.

    Lal Davida meuh pawh kha Pathian fakin an lam tak tak chu, a nupui pawn a zahpui a, “Kan lal chu a chhiahlawh lamnaah avan lam nasa bung bung vele” a ti a. A nupui Mikali chu chuta tang chuan a ching der mai a ni.

    Miin Pathian thlarau a dawn takzet chuan a lam lo theilo a ni. Pathian thlarau dawng si lam ve ngailo kan awm em le?
Lalpa leh a thlarau zahpuitu chu Makali ang hian a hrem mai thin tih pawh kan hmu a ni.

    Thawhlawm lamah :- Thawhlawm kan thawh hian kohhran leh Department. chuan a tam apiang chu kan duh teh meuh mai, mahse kan phal ang tawk anih chuan Pathian in a pawm vek mai. Thawh tam tura kan induh viau lai hian a thawhtu tur rilru ah a tawngsang mawh khawp mai.

    Engpawhnisela, Pathian thlaraua mi a khah phawt chuan, thawh tam tura in hrilh vak hi a ngai hran lo, a rilruah tih ngei tur a ni tih a hria a; a thawh mai thin a ni. Pathian thlarau ah awm vek ila chuan financial campaign te pawh hi a ngailo hial maithei a ni.

    A tawp bera ka sawi duh pakhat chu, thawhlawm kan thawh tam emaw, a tlem emaw, a thar tha tur a ni tih hi. Kan Pathian tan hian cheng sawm (Rs. 10) emaw cheng sawmhnih (Rs. 20) emaw a aia tam emaw a thler deuh leh hlui bal deuhte hi i thawh lo ngam ang u. Pathian pawh hian a thar deuh deuhte pawh hi a duh ve tho ania. Dawra kan hman theih manglohte hi kan thawh leh nawlh thin.

    I thil leina dawrah pawisa hlui bal deuh thler lehnghal an kir che i duh miah lo ang khan Pathian tan chuan a thar tha deuh kha i theh chhuak ang u hmiang, thar deuh deuh thawh lamah pawh hma i sawn zel ang u, a dang kan nei thlawt lo anih ngawt loh chuan thar tha deuh deuh thawh i tum tawh ang u tih thu hi SUNDAY SIKUL IN MIN NGEN E.

    Lalpa’n a thu mal min sawm sak rawh se. Amen

********************

Juniper Editorial: 26 April 2015

 JUNIPER EDITORIAL

Hmasawn na tha...

    Khawvel a changkan ang zelin hmanrua pawh a changkang chho ve zel a, he changkanna hian PYD member-te leh kohhran mipui pawh min kalpel chuang lo. Hmanraw changkang leh tha pui pui a lo chhuak a, a thei apiang leh thei chiahlote pawhin neih ve zel kan duh a, tunaliah pawh Mobile Phone changkang leh tha tak tak a lo chhuak teuh ta mai. Eng anga changkang pawh nise kan hman thiam chuan loh chuan awmze neilo, hman tlak loh a ni tho tho thin.
    Chutiang chiah chuan tunlaiah chuan chhungkaw tam takin mahni inah Computer kan hung fer fur ta mai a, hengte hi eng atan nge kan hman tih hi mahni theuhin han chhut teh ang. Games khelhna atan em ni kan hman tam ber? Nge ni a Movie leh video en nante, hla ngaihthlak nan chauh em ni kan hman?? chutiang atan chauha kan hmang anih chuan kan computer khan tangkaina a nei tlem hle tihna a ni.
    Local Executive Meeting chuan Juniper Editor tur a ngaihtuah a, computer thiam, pagemaker khawih thei tur rawt tur a nei tlem hle mai. Local PYD-te kan tan tlan a ngai a, kan bungraw neih te hi a tangkai thei ang berin hman tum tlang ila, kohhran tana mi tangkai kan lo ni thei dawn a ni. Hetiang thil harsa lutuk lo ang chi phei hi chu mahni pawha in zir mai theih thil a ni a, tin, a thiamsate pawh rawn ngam a pawimawh hle mai.
    Hetiang zela kan kal chhoh  chuan nakin lawkah Juniper Editor tur kan haihchham mai ang tih a hlauhawm a, computer a hnathawh ngai a awm in Kohhran in chhawr tur a nei lo mai dawn a ni.
    Inti changkang tak chung si leh, hmanraw tha leh changkang tak tak kawl fur si hian, hmantlak loh leh chhawr tlak loh kan ni mai ang tih a hlauhawm hle a ni.

********************

JUNIPER; 26th APRIL, 2015 : VOL. XIX, ISSUE NO. 17

LOCAL PYD EXECUTIVE MEETING NEIH A NI.

(Juniper editorial board tih danglam hret a ni)

Ni 21 April 2015, Thawhlehni zan khan Local PYD Executive Committee chuan PYD President Bro. C. Lalrammawia te inah meeting pawimawh tak a nei a, PYD tana thu pawimawh tak tak a rel bakah Local PYD Sport neih zawh tak thlirletna hun a hmang bawk.
Committee thurel pawimawh zualte:-

1) Juniper Joint Editor Bro. Jacky Lalruatmawia  phatna  rawn thlen chu ngaihtuah a ni a, a dilna angin pawm sak a ni. Hemi rual hian Juniper Editorial Board chungchang chu sawi ho nghal a ni a, ngaihdan hrang hrang ngaihthlak anih hnu ah, Editorial Board chu tih len hret niise tia rel a ni a, Joint Editor atan Bro. Lalhriatpuia leh Bro. John Sangzuala te chu ruat nghal an ni.

2) Music Sub-Committee in Local Zaipawl Assistant Conductor atana Bro. TC Vanlalruata ruat belh an rawn dilna chu ngaihtuah a ni a, an dilna ang hian Bro. TC Vanlalruata chu Local PYD Assistant Conductor atan ruat belh a ni.

3) Local PYD Kumpuan Sub-Committee ten anmahni puala Thalai inkhawm zana inkhawm neih an dilna chu pawmsak an ni a, a hun atan 25May 2015 chu ruat nghal a ni. Tin, an dilna angin hemi zana thawhlawm hi Local PYD Kumpuan Sub-Committee pual atan dah nghal a ni.

 

*******************

NUPA TUAK THAR

Challianzika group Leader leh Naupang Sunday School zirtirtu ni lai Bro. Lalduhzuala leh Sis. Lalnunsangi te chu ni 24 April 2015, Zirtawpni khan Bethlehem UPC kohhran biakinah Kohhran dan thianghlimin an innei. Nupa tuak thar te Juniper Editorial Board chuan kan lawmpui takzet a, fanau maltluan chawia dam chhunga nupa hlim tak ni turin duhsakna sang ber kan hlan e. 

 *******************

RT PHUNGA GROUP

RT.Phunga group chuan vawiin chawhma inkhawm banah hian Bro. TC Vanlalruata te inah Local PYD Sport a group champion an nihna chu lawm an tum a, member zawng zawng te bakah Local PYD OB, group tin OB te leh  lawmpuitu a duh apiangte he hunah hian tel turin min sawm a ni. 

 ************************

NPSS ZIRTIRTU THAR

Bethlehem Local Church Board meeting chuan Naupang Sunday School zirtirtu atan Bro. John Sangzuala chu a ruat thar a, ani hian vawiin atang hian zirtirtu hna hi a thawk tan ang.

 ************************

GATE SIAM DAWN

Pastor quarters himna leh zahawm zawk nan Local Church Board thurel angin Pastor quarters pan pheina ah gate siam a ni dawn a, remchang hmasa ber atanga thawh tan tur a ni ang.

  ************************

CHAWNGHEI TAWNGTAI NEI DAWN

Vawiin Pathianni tlai dar 5 hian Local PYD Kumpuan Sub-Committee hmalaknain Biakin-ah chaw nghei tawngtai hun hman a ni dawn a, PYD member mai bakah kohhran mipui a thei apiangte tel theuh turin hruaituten min sawm a ni. 

 ************************

SENIOR DEPT. NOTICE

Senior Department zirlai zawng zawng ten vawin chawhma inkhawmah Bible ken vek tur a ni a, tin, zirlaibu la neilo ten zirlaibu man kengin lei theih a ni a, zirlaibu la tawh, a man la pelo te pawhin a rang lamin a man pek tur a ni.

 ************************

  

Editorial 12th April

 

 

PYD-te LEH SPORTS

   
    Kum dang ang bawkin Pathian kaihhruaina zarah Local PYD Sports kan hmang leh ta reng mai a. Kan hlimin kan lawm a, kan phur tlang bawk a, heihi a that viau lai hian hun tha min petu Lal Isua hi kan hlim luatah hian kan ngaihtuah chang lovang tih erawh a hlauhawm hle mai!

    Kohhran hminga hun kan hman reng rengin eng program pawh nisela thil dang zawng aiin Lal Isua hi Number 1 a kan dah fo hi a tul khawp mai. Mi thenkhatte chuan heihi an theihnghilh thin a, Kohhran thiltih hi thil sual tihnan chance an la a, infiamnaahte lungawilohnate an thlen chawk thin a. A pawi hle a ni.

    Intihsiakna-a pakhatna nih tum vek kan ni hlawm a, kan theihtawka nasa in kan tang hlawm hle a ni tih pawh a hriat reng mai. Kan tan luatah hian mi pawi kan sawi palh ang tih erawh thil hlauhawm tak a ni. Kan tana thil ho hmel tak nisi, midangte tan chuan huatthla la tak hi a awm ve theih thin avangin kan tawngkamah kan fimkhur tlan a tha hle thin a ni.

    PYDte hi inpawhtak kan ni hlawm a, a chhunga chen pawh a nuam viau mai. Amaherawhchu, midangte zahawmna ti nep vek thei khawpa innel/infiam thin erawh chin hauh loh tur a ni. Biak In chhung nisilo-a activities lian tham (blanket suk, Sports, hnatlang,etc) a awm hian PYD member thenkhatte hian kan zolo leh tlat thin. A pawi hle mai!
   
    He Sports kan hman hian kan inkarah inpawhna thianghlim leh Krista taksa tihfamkimna kawnga thawhhona tha min siam ta se, Pathian Biak In ngaina  ngailo te’n hlawkna lo chhar chhuak se. Kan Thlarau nun hi a tha zawngin nghawng tel ngei bawk se duhthusam ber chu a ni!

DRAMA CHAN THU - H.Laldanmawia

Tha rum ngai lo, member sawm rual velin cheng sing tel thawh chhuah theihna tur inhlawhna tha tak Doordarshan-a Drama chan chu Pathian leh U Chullova hmachhuanin 2013-2014 PYD President Mafela kaihhruainain kan han dil ve rawih a. Vanneihthlak takin kumin 2015 hian kan dilna chu phalsak kan nih thu kan dawng hlauh mai a. President thar A-Mawia, a thawnthu ziaktu  RST-A  leh, film lama tawn hriat nei tha tak Peka Zote-te hoin Drama chang tur chuan kan inbuatsaih ta a. Hun a tep-têr avangin zan li vel chiah zirna hun a awm a. Zan tin zan dar 12:00 vel thleng ngawrh taka kan zir hnuah Cameraman a hman loh tur thu kan dawng a. Kar thum zet min pawhfânsak hnuah Ni 28.3.2015 khan uluk takin kan chang zo thei ta a ni.

   Upa C.Damvea-te pindan chungnungah rilru hmun khat puin kan inkhung khawm a, RST-A  leh Peka’n a pawimawh zual min hrilh pahin huphurh lutuk lo turin min fuih a. A bak zawng chu (anni hi an hman tawh loh avangin) kan remhriat dan danin kan zir chho ta a. Kan zir chhung aia ngaihdan kan sawi tam zawk zan a awm a; a upa deuh ber ka nih avang leh intifing ber ka nih avangin ka sawi hnem ber a. Chuvangin ‘inti Director-a’  min ti a. Kei inti Director-a nen kan vai chuan A changtu leh Director kan innih chhawk vek a. Kan zir rei tual tuala kan la thutak lo tulh tulh a, kan ho tial tial bawk a. Zan khat phei chu Buanga of Bairabi-in Bethlehem-a a rawn awm tirh atanga a lo thup tâng tâng thin a zia a chhuah pek a, kan ho zo vek a, kan nui ral vel ta mai mai a ni ber. Director tak tak chu ni ila an vaiin ka ban vek ang.

    Sena, Chhuanawma, Niropuia leh Duha-te thianho an zeiin an thiam chak hle a. Sena ‘inla starring’ em em te, Niropuia rui der hmel, rui tak tak ang zet te, Chhuanawma ‘inlak zei tum’ lutuk leh mimawl lema chang Duha inhmehziate kha sawia fiah chi a ni lo, hmuha fiah chi a ni.  Pu  A-Mawia leh Pi A-Thawmi-te nupa an inhmeh hle laiin Pu Amawia vangin an ti tha ngun hle a. Chan tak taknaah pawh hun heh ber an ni. Pu  A-Mawia hi a hmelthat phek phuk ang a lo ni lo, Camera a ngam lo tlat.  An fanu Mary Zothansangi kan zingah chuan a zei ber a, a unaupa Patea pawh rin aiin a lo zei daih.

    PYD budget khawntu A-Faka chu a part a inhmeh em avangin a hranpaa inzir a ngai ve lo va, a ze pangngai leh awm dan hi a tling tawk a; tlangval fel tak lema chang Buanga pawh chutiang tho a ni.  Nupuii huphurh hmel lutuk leh lai hmel kha mitthlaah a reh thei lo, a khawngaihthlak zawk hial a ni. Khati chunga a tihlawhtling thei kha midang zawng aiin fak a phuin ka hria. Kan nupa, Nantei nen kha chuan a bu ang thlap kan ni a, mahse sap lâma lâma a ngai kher kher kha chu nilenga Blanket suk ai pawhin ka hreh zawk a, mahse lâm a ngai miau si a. Khawvel eng ka hmuh tirh atanga a vawi khat nan Pathian faka lâm hlei thei lo kei misual hi PYD sum tuak nan ka thiam ang tawka ang turin sap lâm ngatin ka lâm a nih chu! Ka rei....ka ziah zawng pawh hian engtin emaw ni ka awm.

    Rin aiin a tak taka han chan chu a lo hautak a, Drama chu “I mawhphurhna kha hlen rawh” tih thupui hmanga minutes 25 awh tur a ni a. Kan lo zir lawk fe chung pawhin chhun dar 12:00 vel atanga tanin zan dar 9:00 velah kan zo thei hram a ni. Cameraman-in a duh uluk hle a, ka ‘intih Director-na’ hnuaiah kha chuan lo puitlin ta ila chuan kan hmel tih loh hi chu a en tlak hauh lo ang le. Chhuanawma-te hi chuan ramthim ai chuan Bollywood-a chhuk theih dan tur an vei tawh zawk mai thei a ni.

    Cameraman  Pu Aldrin-a leh a naute an fel khawp mai a, kan nulate fel an tiin an fak hle a, kan thik hman tep a ni. Pu Dama-te inah hlir kan zir avangin kan tibuaiin kan tihautak hle a, min ning hmel an lantir miah lo nia...  Drama channa tura In kan biak lawk min phalsak vektu, remchan zawkna avanga kan hman leh tak loh Pi Liani te leh Pi Kaimawii te, kan biak chawp chuk chuk Nu Nguri-te leh Pi Nuseni te, an awm loh laia an In kan lo risk sak U Thuampuii te, a tla chawpa kan hman leh zanriah siam nana kan hman Upa K.Biakthanga te, (an fanu A-Thawmi anga thahnemngaih nachang hre rual, tleirawl ni lo, nula senior ni bawk si lo, nula ngawih ngawih ni si hi PYD hian nei teuh ila aw...!)  Part neih ve miah lova min ho ziahtu Secretary Muana te, he thu ziaka hming lang zawng zawng leh kan ziah hmaih palh a awm chuan chung mite....a....Pathian chungah leh engkimah hian kan lawm  a ni e. Drama hi April 14 ah a chhuah theih kan beisei

=====================================================================



   

12th APRIL, 2015:VOL. XIX, ISSUE NO. 15 ; BETHLEHEM PYD ;

 SENIOR DEPT. HRIATTIRNA

Senior Department zirlai naupang zawng zawngte vawiin Dt.12/4 Pathianni hian Sunday School Zirlaibu la neilovin Rs.40 kengin kal tur a ni a. Tin, a leina man tur nei remchang lo tan bat theih a ni ang. Zirlaibu la nei remchang ve lote pawhin Bible tal keng ngei tura ngen leh hriattir kan ni.

T-SHIRT TLANGZARH

Challianzika Group-te chuan Local PYD Sports denchhana an siam Group T-Shirt chu Dt.10/4 Zirtawpni zan hmang khan tlangzarhna hun hman a ni.

REVIVAL HMAN MEK A NI

Dt. 6/4 Thawhtanni hmang khan Upa V. Laizika, Bethlehem Vengthlang chuan Pathian Chawimawina a nei a.Speaker atan Evan. R. Vanchhunga chu rawih niin kar tluanin Revival Program hman chhunzawm a ni a. Ruahman lawk danah chuan zaninah hian a tiak ang. Kohhran memberte a thei theiin i tawiawm theuh ang u.
 

RUAT THAR

Local Church Board Committee chuan Bro. Vanlalzawmliana chu Building Committee Secretary atan a ruat thar.

=========================================================================

UPC (NEI) GENERAL CONFERENCE VAWI 47 NA HMAN MEK A NI

United Pentecostal Church of North East India khawmpui lian ber General Conference-vawi 47na chu April 9, Ninga zan khan High School Field, New Saiha-ah tan a ni ta a. He inkhawmpuiah hian General Supdt. ni lai Rev. V.L Dika Sailo, July 07-a Pension-mai tur thlahna neih nghal a ni bawk ang. Thupui atan hian  “Inremna leh Thianghlimna”(Hebrai 12 : 14) hman a ni a. Rev. L.Chunglinga (Former Dist. Suptd, Chhimtuipui) chuan hawngin; Rev. PC Lalnghakliana, Aizawl East Dist. Suptd, hnen atangin thuchah ngaihthlak a ni.
    

April 10, Zirtawpni khan Departmental Conference neih a ni a, General Missions Department-te chuan Conference Pandal ah ro an rel a. He an rorelah hian General Missions Department Flag siam dan turte, kum 2015 chhung Missions Department Field hrang hrang member target-intuk dan chungchang bakah Chakma Missions Field chungchang ngaihtuah a ni a, General Missions Field-in enkawl tawh lovin District neitu Chhimtuipui District enkawl chhunzawm tura dah a ni a, thil tul dang erawh Missions Board-in an ngaihtuah ang.
    

General Sunday School leh General PYD chuan High School-ah ro an rel a. Kum 2015-2016 General Sunday School kumpuan atan "kan fate i chhanhim ang u" tih hman nawn leh a ni ang a, a bawhzuinan thu leh hla hmanga intihsiakna neih ni se, tihte, Sunday School Teachers meet neih ni se tihte leh thupawimawh dangte an ngaihtuah bawk a ni.
    

Zirtawp zan hian Rev. C Lalrammuana, North Mizoram Dist. Suptd. chuan thuchah a sawi a. Inrinni hmang khan UPC rorelna sang ber General Conference rorel inkhawm Conference Pandal ah neih a ni dawn a, he hunah hian District leh Department atanga Agenda lut bakah official Agenda hrang hrang ngaihtuah a ni. Zan lamah Rev. C. Darkhuma, Lunglei Dist. Suptd.in thuchah a sawi bawk.

Vawiin April 12, Pathianni chhunah hian Ordination Service neih a ni dawn a, Rev. VL  Dika Sailo, General Superintendent chuan thuchah a sawi ang. Chawhnu lamah chuan Rev. R. Lalrinsanga, Gen. Treasurer-in thuchah a sawi ang a. Pathianni zan lamah Rev. V.L Dika Sailo, General Superintendent thlahna hun hman a ni ang. Rev. V.L Dika Sailo chuan thuchah tawi sawiin, a profile Rev. R. Laichhingpuia’n chhiarin hun a hmang ang.

========================================================================

LOCAL PYD SPORT HMAN MEK A NI

    Bethlehem Local PYD buatsaihin Dt. 11  April 2015 hmang khan Rajiv Gandhi Stadium, Mualpuiah Outdoor Sport hmanga in elna hun hman a ni a. Memberte mai bakah Local OB team member rual u zawkte pawh kan phur tlang hle a. He chanchin buatsaih lai hian result hriat ala nihloh avangin kan tilang thei rihlo a ni. He sports lo thleng tur atan hian Group member tinte chu nasa taka inbuatsaihin hun an hmang hlawm a. Group tinte hian pakhatna nih tumin tan an la theuh a ni. Naktuk Dt. 13/4 Thawhtan zanah hian Indoor items hmanga intihsiakna neih leh tur a ni a. Intihsiakna items turte lo tarlang ila:

INDOOR SPORT
    A Hun        : Dt. 13 April 2015;    Dar 7:00 pm
    A Hmun    : NPSS Hall

ITEMS:
    1) Solo            2) Group Singing    
    3) Musical Chair    4) Extempore Speech    
    5) Mimicry        6) Arm Wrestling
        7) Group Attendance

 

 ======================================================================

KUMPUAN HUANG:
THUTHLUNG HLUIA PATHIAN KHA ISUA HI A NI

1.   Isua hi Pathian kan tih chu a ni tih hriatfiah theihna chiang tak pakhat chu Isaia 9:6 thu hi a ni a: “Kan tan naupang alo piang a, fapa pekin kan awm ta a, rorelna chu a kokiah a chuang ang a, a hmingah chuan Maka, Remruattua, Pathian Chaka, Chatuan Pa, Remna Lal an la ti dawn si a”. Naute lo piang hi “Pathian Chaka” leh “Chatuan Pa” mihring a lo chang chu a ni tih a chiang hle.

2.  Isaia hian Messia chu Immanuela sak tur ani tih a sawi lawk a, Immanuela chu kan hnena Pathian awm tihna a ni si a. (Isaia 7:14; Matthaia 1:22-23).

3.   Isaia chuan Messia chu Davida pa Jesaia atanga lo chawrchhuak anih thu leh Jessaia chu Messia atanga lo chawrchhuak anih bawk thu a sawi a (Isaia 11:1, 10). Tin, Isua chuan Davida lo chawrchhuahna zung leh Davida thlah anih tho thu a sawi leh bawk a (Thupuan 22:16). Mihring tisa a nihna kawngah chuan Jessaia leh Davida thlah atanga lo piang a ni a, chutihlai chuan Thlarau anihna lamah ve thung chuan Jesaia leh Davidate siamtu, an nunna zung a ni leh tho bawk a. Hemi thil nihdan hi rilrua hre ran chungin Pharisaite tih manganna turin Sam 110:1 thu hi Isuan a sawichhuak a. “Davida chuan Lalpa tiin Messia chu a ko si a, engtinnge Messia chu Davida fapa anih theih le?” tiin a zawt buai duh ve kher a ni (Matthaia 22:41-46).

4.  Isaia 35:4-6 thu hian Isua chu Pathian a ni tih a tilang leh bawk a: “Ngaiteh tu…. In Pathian chu alo kal ang a, a chhandam ang che u” tiin. Pathian alo kal hunah chuan mitdelte mit alo var ang a, bengngawngte beng pawh tih varin a awm ang a, kebaite pawh an zuang ang a, tawngtheilote lei pawh alo tawng bawk ang tih thu a sawi chhunzawm bawk a. He Pathian lehkhathu hi Amah insawi nan Isuan a hmang a (Luka 7:22), a rawngbawlnaah khan heng thil hi a ti vek reng a ni.

5.  Isaia 40:3 thu chuan, “Thlalerah LALPA kawng buatsaih ula, ram rovah chuan kan Pathian tan lamlian ti rual rawh u”. Baptistu Johana khan Isua tan kawng a sial sak a, heng hrilhlawknate hi a ti famkim ta a ni (Matthaia 3:3). Tichuan, Isua hi LALPA (Jehova) kan Pathian chu a ni.

6.   Mika 5:2 thu chuan Messia (Isua) hi Pathian a ni tih a tifiah leh bawk a. “Nimahsela, nang Bethlehem Ephratha, Judai rama sang tam tak zinga telah te hle mah la, nangma lak atang hian Israelho roreltu tur chu kan tan alo chhuak ang a; a lo chhuahna chu hmakhawsang ata, chatuan atangin a ni.” Tiin. Tichuan Thuthlung Hlui hian Messia leh Chhandamtu lokal tur chu Amah Pathian ngei a ni tih chiang takin a sawi a ni.

THUTHLUNG THAR ATANGA KAN HMUHTE:
1. Tirhkohte 20:28 thu hian Kohhran chu Pathianin a thisenin a lei a ni tih min hrilh a, chu Pathian thisen chu Isua thisen hi a ni.
2. Paula chuan Isua chu “Kan Pathian ropui tak Chhandamtu Isua Krista” tiin a sawifiah a (Tita 2:3). New International Version (NIV Bible) chuan “Kan Pathian leh Chhandamtu ropui tak, Isua Krista” tiin a sawi bawk a ni.
3. Petera chuan “Isua Krista kan Pathian leh Chhandamtu” tiin a sawifiah a (II Petera 1:1). NIV leh TAB (Amplified Bible) chuan “Kan Pathian leh Chhandamtu Isua Krista” tiin a sawi bawk a.
4. Kan taksa hi Pathian Biak In (Inkhawmna Biak In ang hi) a ni a (I Korinth 3:16-17), Krista ngei chu kan thinlung chhunga cheng (leh kan taksa chhunga cheng) a ni tih kan hre bawk a (Ephesi 3:17; II Korinth 13:5).
5. Kolossa bu hian Krista Pathianna chu khauh takin a sawi uar hle a ni. “Amahah (Kristaah) chuan Pathian famkimna tinreng chu taksa neiin a awm reng si a” a ti a ni (Kolossa 2:9; 1:19). He Pathian thu chang hian Isua chu Pathian a ni ve tawk tawk angin a sawi lova, Pathian Pathianna zawng zawng chu Amahah hian a kim vek a ni a ti zawk a ni. Pathian Pathianna chu mihrang an awm an tih thin chu lo dik ta ang sela chuan, Kolossa 2:9 thu hian chung mi hrang hrangte chu taksa neiin Isuaah hian a awm kim vek a ni tih a sawi ngei tur a ni ang. Amahah chuan kan famkim ta bawk a (Kolossa 2:10). Pathian hnena mamawh kan neih apiangte chu Isua hnenah hian a kimin kan hmu vek a ni (Kolossa 2:9).

========================================================================

Juniper Editorial 5 April 2015

JUNIPER EDITORIAL

LAL ISUA KAWNG CHU !
   
    Zawlnei Isaia chuan Jehova’n ama ban ngeia chhandamna a siam tur thu alo hrilhlawk daih tawh a (Isaia 19:16). Tin, amah Jehova ngeiin Mosia a biaknaah chuan banphar meuha mi a tlanchhuah tur thu Exodus 6:6 thu-ah kan hmu bawk a ni. Thuthung Hlui  hrilhlawkna bu kan en reng reng chuan Kros-a kan tan a tuartu hi Jehova ngei kha anihzia thu kan hmu a ni. Jehova lo chu Pathian dang  reng reng an awm lo a nih chuan Lal Isua chauh hi Pathian a ni tih, zawlneite hrilhlawkna atang ringawt pawh hian a lang chiang hle awm e.

    A Lehkha Thu ang ngeiin Lalpa Isua chu tihduhdahna nasa tak a tawrh hnuah Golgotha hmunah Kros-ah khenbehin a awm ta a, A Thlarau a thlah ta a nih kha. Kan tan Chhandamna kawng min siamsak ta!

    Lal Isua chuan amah chauh chu kawng leh thutak leh nunna anihzia alo sawi tawh a, amaha kal lo chu tumahin Pathian ram an chanloh turzia thute a sawi bawk a ni (Johana 14:6). Tin, thawhlehna leh nunna anihzia thu alo sawi bawk a (Johana 11:25). Hetiang anih avang hian Pathian Ram kan thlen theihna tura kan kalkawng zawh tur zawng zawngte chu Amah ngeiin alo zawh ta a, kan entawn tur a hnutchhiah ta a ni. Kros-a a thih hnuin a ni thum ni-ah a sawi tawh ang ngeiin ropui taka kaihthawhin a awm leh ta a.
   
    Kristian kan nih chuan Lal Isua kawng hi kan zawh ngei ngei tur kal kawng a ni tih a langchiang hle awm e. A thihna leh thawhlehna tawmpuiin Ama Hming ngeiin kan nunhluite thihsanin hnimphumin Baptisma kan chang ang a, tin, Thlarau Thianghlima kaihthawhin kan awm leh bawk tur a ni. Heihi kan kalna tur kawng Lalpa’n min kawhhmuh chu a ni.

*************************

TUNAH KA CHHAR MUANNA LEH HLIMNA - H.Laldanmawia (Juniper Article; 5 April 2015)

JUNIPER ARTICLE 

TUNAH KA CHHAR MUANNA LEH HLIMNA

- H.Laldanmawia

    Mihring hi a siamtu do thei khawpin a ropui em ni? Pathian laka vui reng thinlung put chu enge hlawkna awm? Pathian laka helna chuan boralna kawng a pawh em? Pathianin chhandamna a buatsaih chu tute tan nge ni a, eng zat man chiah nge a lo nih?  Hlimna hi khawiahnge a lo awm a, chung lam thlamuanna hian thihna hlim kawr ruam a thleng phak em? Pathian hian amah pantute hi an tih theih loh a thawhsak tak tak em?  Damchhung kum chu tlemtê pawh ni se, engkima Pathian laka lawm zel hi a theih dawn em ni?  Heng zawhnate hi he hla siamtu hian a hre fiah bik em ni le....?

    Chang 1-na :       Changpât cheh chhum ang maia ngaihtuahna mumal leh tumna mumal pawh nei lova a nun mai mai lai leh, sahuainido ang tlata hnuailam thlir lui tlat chunga hringnun a chhiar lai chuan, chatuana hrem tuar tura chatuan hremhmuna kal inchhirawm turzia a ngaihtuah ngai lo va. Vanram nawm turzia lah a suangtuah  ngai bawk hek lo. Lei leh van siamtu leh amah ngei pawh siamtu chu a awm ngei ring mah se, chu Pathian chu a ring chuang lo va. Hmangaih Pathian a nih chu a ring thei lo a ni.  Duhsak bik nei Pathianah a ngai a, Pathian siam mihring theuh theuh vannei leh vanduai an awm chu hriatthiam har a ti a. Thil tha lo a chunga thleng reng rengah chuan Pathian lakah a vui a; malsawmna a dawn vete pawh chu chhiar thamah a ngai hek lo.  Mi zawng zawng tana Kros-a Krista  tuarna chu a haider a; a  hlutzia hriatfiah phei chu a tum lo hrim hrim a ni. Chhandamna an sawi thinte chu Pathianin a duhsak bik leh a ruat bikte chungah chauh a thleng thin niin a hre tlat a. Chu chu a pawm dan leh Pathian a hmel hriat ve dan a ni bawk. Pilata leh Juda Iskariota-te dinhmun chu hremhmun tla tur ruat lawk sa an awm ngei a ni tih nemnghehnaah a ngai a, Paula pianthar dan chu vanram kai tur ruat lawk sa awmah ngaiin Pathian rorel dan chu fair lo a ti a. Engkim siamtu lakah chuan engkimah lawmna nei lovin a vui thin.
    

Chang 2-na:    A beisei leh a zawn fo thin hlimna ringawtin a hma lamah chuan a hmuak lo va, vanduaina te, harsatnate leh lungngaihnate chu thlasik anga  khêl lovin tawrh tur a lo tam a. Van ngaihna nei chuang si lova lei nun thlakhlelhna reng reng nei lova nun beidawn chang a nei hial thin. Mahse, mahni hnuk chhat tur êm chuan huaisenna a nei lo va, siamtu’n hmuh theihna tura mit a pek ngei chuan chunglam malsawmna hmufiah thei si lovin,  he lei anchhedawnga kum hlun lo tur thil mawi leh hlu tinreng hi a hmufiah em em; chu chuan awhna sualah hruaiin van In kawng a bo phah a. Hremhmun kawnga sual chitin sualna rah chu têlin, chu sual chuan a rilru leh taksa a nghaisa a. Chhantu ngaiin a rum tlawk tlawk a, ngaihtuahna thar a siam loh chuan a hmabak chu boral chauh a ni ta...
    

Thunawn:    A pawnlam lan danah chuan lungngaihna  nei angin lang lo mah se, a thinlung  chhungah chuan khawhar rukna riau a nei tlat a. Tuktina kawla ni chhuak êng mawi tak chuan a thih ni a hnaihtir zel tihte chu a ngaihtuah fo va. Sana chu second khat tê tê-in kal bek bek mah se, a hringnun erawh chu a liam vut vut ni mai hian a hria a. Chu Sana, hmanhmawhna nei lo leh chawl hauh si lova chek tlauh tlauh chuan a hringnun chu thlânah vui liamin, a thlarau chu chatuan hremhmunah a nawr lut thuai dawn nia hriatna a nei bawk a. Pathian tel lova hlimna leh thlamuanna zawngtu chuan thlaphanna a nei ta zawk a.  Duhthlan tur awm chhun chu Pathian pan chauh a ni ta.
    

Pathian chu a ral hriat dan nen a lo inang hauh lo mai a, khawngaihna mak leh hmangaihna ropui tak te, chatuan nun neitute hlimna thurukte pawh chu ani, vui hmang tan pawh chuan a thlawna dawn theih a lo ni a. Harsatna naran a tawh chang pawha thlaphang mai thin kha thihna hlimkawr ruam zawh hial pawh huamin thlamuanna danglam a lo nei ve ta. Chu chuan he hla thu hi a thinlungah a lo piantir ta a ni.
    

Chang 3-na:     Reh thei lo tihrehna pawhin a silfai theih loh  mihring a nih avanga a pian chhuahpui sualna chu chhandamtu thisen hlu tak chuan a tlengfai thei a, chhiar thama a ngaih  ngai loh leh chhiar nachang a hriat ngai loh malsawmnate chu a chhingmit ni lovin a thlarau mit chuan a hmufiah ta em em a. Sual saa piang leh sual tinreng khawihtu chu chhandam a nih theih nan thawhsak sa vek a lo ni a. Khawngaihna kawngkhar leh sual ngaihdamna tuikhur chu hawnsak sa diam a lo ni.
    

Chang 4-na:    Tunah chuan eng thil mahin a tihchhiat theih tawh loh Ro hlu vanah a nei tawh a, eng thil pawh lo thleng se vuina tur a awm tawh lo a ni. A tisa chuan lungngaihnate tawkin natnate pawh tuar mah se, Pathian remruat a ni tih a hrefiah tawh a. A damchhung nun leh thlarau  nun zawng zawng chu Lalpa fak nan a lo hlan thei ta. Chuti chuan he hla hi a lo piang ta a ni.

        1.Van ngai lova hringnun ka chhiar lai khan,
    Lawmna nei lovin ka vui thin;
    Tlanna Kros leh thisen hlu,   
    Malsawmna chitin nen en lovin.

        2. Hring chan vanduaina lo thleng thinah te,   
    Chhingmita fiah lei mawina ten;
    Van in kawng min botir a,
    Suala sawisakin ka lo rûm thin.

    Tunah ka chhar muanna leh hlimna,
    Khawngaihna mak leh hmangaihna ropui;
    Chatuan hlimna thuruk nen,
    Kei vui hmang tan pawh a thlawn a lo ni.

        3. Seol natna vei hnu min chhandamin,
    Malsawm tinreng a lan fiah nan;
    Ka theih loh min thawhsakin,
    Lalpan ka thlarau mit min hawnsak.

         4.Eng thil pawh lo thleng se ka vui tawh lawng,
    Ka lawm zel ang Krista-ah chuan;
    Vanah ro ka nei tawh si,
    Hlimin ka zai ang lei piahah pawh.
       
    He hla phuahtu hi he thu ziaktu hi ka ni a, a thlûk ka siam thiam loh avangin a thlûk siam thiam leh siam duh tan ka tlangzarh e. Tu emaw talin hlawkpui nan hmang se ka va ti em.

********************

JUNIPER; 5 April 2015

LOCAL PYD SPORT NEIH A NI DAWN

    Bethlehem Local PYD chuan 11 & 13 April 2015 hian Local PYD Sport hlimawm tak a buatsaih dawn a, Group hrang hrangte pawh an phurin an inbuatsaih nasa hle. He sport-ah hian outdoor leh indoor items hrang hrang hmangin inelna neih a ni anga; kum danga la tih ngaih loh, Mimicry leh Dart te pawh kumin hian telh tum a ni.

OUTDOOR SPORT

    A hun        : Dt. 11 April 2015; Dar 9:30
    A Hmun    : Rajiv Gandhi Stadium
    Hunserh Hmangtu: Upa C. Taisena

ITEMS:
    1) Football             2) Volleyball              3) Death Ball
    4) Spoon Race         5) 100m Race (women)     
    6) 400m Race (Men)     7) Sack Race        8) Dart            9) Group Attendance

INDOOR SPORT

    A Hun        : Dt. 13 April 2015;    Dar 7:00
    A Hmun    : NPSS Hall

ITEMS:
    1) Solo        2) Group Singing    3) Musical Chair
    4) Extempore Speech    5) Mimicry    6) Arm Wrestling
    7) Group Attendance
    
Group hrang hrangte colour tur pawh siam fel a ni tawh a hetiangin:-
    Challianzika Group - Blue
    Lalliana Group           - Red
    RT Phunga Group   - Yellow

    OB Football team-te pawh he sport atan hian an inbuatsaih nasa hle a, an phur in  rual u zawkte pawh an in ko khawm nasa hle a ni.

LOCAL OB TEAM-te

1) C. Lalrammawia    2) H. Laldanmawia    3) Lalfakzuala
4) Lalrinnunga           5) FL Ramchullova    6) R. Lalfakzuala
7) Lalthansanga Colney    8) Lalremliana Ralte    9) Lalnunmawia
10) Lalfelkima           11) C. Lalnunfela    12) Lalhlima Sailo
13) Vanlallawma       14) R. Laltlanchhunga    15) Sangkhuma
16) Zothanchhunga    17) Lalrinawma Sailo    18) MS Dawngzuala
19) VL Ruatmawia     20) R. Lalramsanga    21) Lalromawia
22) Evan Lalnunmawia    23) Oliver Lalthlengliana    24) Jeho Lalramzaipuia
25) Vanlalrema           26) Lalramtluanga    27) Lalrammawia
28) VL Zawmliana      29) VL Tawna          30) Renner K Lalengmawia
31) F. Lalremruata      32) Zoramsanga    
Manager: Ratharnghaki Zote
    

JUNIPER VOL. XIX, ISSUE NO. 14; 5th APRIL, 2015

UPC (NEI) GENERAL CONFERENCE VAWI-47 NA NEW SAIHA-AH

    United Pentecostal Church of North East India ten kan khawmpui lian ber General Conference-vawi 47-na chu April 9-12 chhung hian High School Field, New Saiha-ah neih a ni dawn a, “Inremna leh Thianghlimna”( Hebrai 12 : 14 ) tih chu thupuiah hman a ni ang.  April 9, Ningani zanah Rev. L.Chunglinga (Former Dist. Suptd, Chhimtuipui) chuan he inkhawmpui hi a hawng ang a, Rev. PC Lalnghakliana, Aizawl East District Superintendent-in thuchah a sawi ang. Inkhawm service hi Zanlamah dar 7:00pm ah tan a ni ang a,  Pathianni zingah chuan dar 10:30 ah tan a ni ang. He hunah hian kumin July thla a Full Pension a chhuak mai tur, General Superintendent ni lai Rev. V.L Dika Sailo thlahna hun hman a ni dawn bawk a ni.

    April 10, Zirtawpni dar 10:30 am ah Departmental Conference neih a ni ang a, General Missions Department ten Conference Pandal ah ro an rel ang a, General Sunday School Department-in District Headquarters Sunday School Hall-ah; General PYD ten District Headquarters Church building-ah an ro an rel thung ang. Zan lamah Rev. C Lalrammuana, North Mizoram District Superintendent-in thuchah a sawi ang a, April 11, Inrinni chhun dar 10:30 ah Conference rorelna, pandal-ah neih a ni ang. Zan lamah Rev. C. Darkhuma, Lunglei District Superintendent in thuchah a sawi thung dawn a ni.

    April 12, Pathianni chhunah Ordination Service neih a ni ang a, Rev. VL Dika Sailo, Gen. Superintendent-in thuchah a sawi ang. Chawhnu lamah chuan Rev. R. Lalrinsanga, General Treasurer-in thuchah a sawi ang a. Pathianni zan lamah Rev. V.L Dika Sailo, General Superintendent thlahna hun hman a ni thung ang. Rev. V.L Dika Sailo chuan thuchah tawi sawiin, Rev. R. Laichhingpuia’n a chanchin chhiar chhuahna hun a hmang dawn a ni.

***************************

General Conference kalna tur

Kum 2015 General Conference Saiha hmuna neih tur atan Aizawl East District chuan Bus a hmang dawn a, he Bus a kal turte chu April 8, Nilaini Dar 10:00 AM-ah District Office-ah kim vek tur a ni. Lunglei-ah riah phei tur a ni ang a, Lunglei atang hian Zing Dar 5:00-ah Saiha lam pan leh tur a ni ang.

***************************

LAWRKHAWM

HNAHLAN LAM PAN TA
Hun rei tak chhung Bethlehem Kohhran Secretary nihna lo chelh reng tawh leh kohhran tana mi pawimawh tak ni thin Evan. K. Lalhmingmawia chuan Pastor rawngbawlna hna a thawhna hmun tur, Hnahlan chu kar kalta April 2 2015 Ningani zing khan a pan ta. Amah leh a chhungte, Kohhran mipui ten kan tawngtaina ah i hrereng ang u.

THAWHLAWM THAWH UAR NI
Vawiin 5/4/15 hi Sunday School Puala thawhlawm thawh uar ni a ni a. Nidanga kan thawh thin aia tam leh uar in thawhlawm thawh theuh turin Kohhrante kan insawmin kan inngen a ni.

REVIVAL PROGRAMME
Good Friday leh Chawimawina Programme hlim taka hman a ni a, Revival Program-a chhunzawm nghal a ni. Speaker Evan R. Vanchhunga hnen atangin Kohhran hote tana chaw tak, Thlarau lam chaw tha, Pathian thu tha tak tak ngaihthlak thin a ni . Kohhran hoten kan hlawkpui hle a. Inkhawm pawh kan tha thin hle a ni. Good Friday tlaiah hian Bro. R. Lalngaihzualate chhungin Pathian an Chawimawina ruai kilho a ni a, mi 650-700 bawr velin ruai hi an kil a ni. Tin, Good Friday Zan atang khan inkhawm ban apiangin Team hote kaihhruainain lenkhawmna hun hman thin a ni a. Vawiin nileng hian Revival Programme hi hman chunzawm tur a ni ang a, Zanin hian a tiak ang. Kohhran member zawng zawngte thahnemngai lehzual sauh sauh ang u.

NPSS  INKHAWM  AWM DAWNLO
Vawiin ni hian Revival Programme a awm avangin Naupang Sunday School Inkhawm a awm dawn lova. Naupang zawng zawngte Biak Inpuiah inkhawm vek tur a ni.

***************************

ISUA KRISTA AN TIH HI ENGTIN NGE KA TIH TAK ANG LE?? - C. Lalthanga (Juniper Article 3 April 2015)

JUNIPER ARTICLE 

ISUA KRISTA AN TIH HI ENGTIN NGE KA TIH TAK ANG LE??

  - C. Lalthanga

Matthaia 27: 20-23 “Pilat’an an hnenah Isua Krista an tih hi engtin nge ka tih tak ang le? An za in, “Ani chu Kross ah kheng bet rawh.” an ti a.

    Roreltu Pilata zawhna hi a pawimawh hle mai, Israel-te leh Juda, a hnam thlan ngei te chuan “Kaisara lo lal dang kan nei lo”, an ti a, lainatna tel miah lovin Rom sipai ten an duh duh a an tih turin Kross ah kheng bet rawh an ti a, an kheng bet ta a ni.

    Awle, tun hunah hian Pilata zawhna hi engtin nge kan chhan ve dawn le? Kross ah kheng bet rawh kan ti ve mai dawn nge? Nang engtin nge i chhan ve dawn le? Kei chuan hetiang hian chhan ka duh a ni.

1. KAN THINLUNGA LALBER ATAN: I Peter 3:15 ah chuan :Krista chu in thinlungah Lalah ruat sak rawh u” a ti a ni. Isua Krista kan thinlunga a lal ber chuan khawvel thila kan harsatna leh mangan buainate, kan lungngaihna zawng zawngte a bo ang a, thil sual kan tih duhna leh kan duhamnate hi Krista’n min hnehsak ang a, Setana’n hmun a chang dawn lo a ni. Kan chhungkuaah, kan kohhranah, kan khawtlangah, kan ramchhungah Isua Krista hi lalber atan sawm ila, ava nuam dawn em!

2. KAN HNENA AWM ATAN: Emau kawnga kal Cleupa-te thiandun pawh khan an hnena awmah an sawm a, sawmtute hnar ngailo Lal Isua chuan an sawmna chu a ngaipawimawh hle a, an hnenah chengin zanriahte a kilpui a, thlamuanna reh theilo a pe ta anih kha. “Lalpa ka pawlin ka thinlungah, thlamuanna tui a luang, ka thinlunga lawmna ri chu thatna in par chhuak, khawiah pawh hlauhna reng ka hre ngailo ang, Isua nen chuan hlim takin ka kal thei ang.”

3. MIN CHHANDAMTU ATAN: Awle, a pathumna atan chuan min chhandamtu atan. Van hnuai khawvel hming zawng zawngah

 min chhandamtu hming dang reng an awm loh avangin, Eden natna vei, suala tlu chhe tawh hnu, kan thlarau Gehena hremhmun a kal mai tur min chhandamtu atan i sawm ang u hmiang. Kan sawm dawn chuan a thupek kan zawm a tul dawn a ni. Ama hminga sual sim a, Baptisma, tuia hnim ngeia kan chan chuan min chhandam dawn a ni. Chhandam kan nih theih nan min Chhandamtu atan i sawm ang u le. 

4. CHATUAN PA ATAN: A tawp ber atan chuan Pilat-a zawhna dang, “Krista an tih hi engtin nge ka tih tak ang?” tih a zawhna hi, Chatuan Pa atan i pawm ngam ang u hmiang. Khawvelah, Kristian ringtu inti zingah hian Isua Krista hi Lal leh chhandamtu atan chuan an pawm thei mai a, Chatuan Pa atan an pawm thei tlat lo nia! Kan unau Trinitarian hote chuan Isua chu Fapaah chuah an pawm a, Second Person-ah an pawm a, Chatuan Pa atan chuan an pawm thei tlat lo a, Chatuan fapa te an ti mai mai zuk nia! Bible-a awm hauh lo, chatuan fapa a an pawm tlat avangin Isua Krista, Chatuan Pa hian engtin tak ngai ang maw?!

Nang leh kei chuan kan thinlunga Lalber atan leh kan hnena chenga, min chhandamtu atan leh Chatuan Pa atan kan pawm theih chuan khawvela mi vannei ber kan ni mai dawn a ni.

Lalpa’n malsawm rawh se. Amen

 

************************* 

 

JUNIPER EDITORIAL, 3 April 2015

JUNIPER EDITORIAL

Aw Hmangaihna a va thuk em!!!

    Pathian Hmangaihna ropui zia leh thukzia lanna ni, suala boral mai tur hringfate tana chhandamna kawng a hawnna hriatrengna ni chu kan lo thleng le ta a. He ni kan serh a, kan hmanna hian rah tha chhuah se, kan thlarau nun leh kan nitin nunah hian puitlinna leh siamtharna chang thar ila a duhawm hle mai.

    Heti taka maia Pathian in mihringte min hmangiahna hi a ropui a, ngaihtuah chian poh leh a thukzia leh ropuizia a langchiang tulh tulh thin. A nunna hial hlana kan tana inpe tu hi a ropui a, a thihna hi a thlawn mai ah kan chantir ang tih a hlauhawm hle mai.

    Hmangaihna chuan thil a ti thei a, Pathian in mihringte min hmangaihna chuan Chhandamna, van nun ropui leh nunna lallukhum min pe ta a ni. Chutiang chiah chuan mihringte, a chhandamna chang tawh kan nih chuan mite tan malsawmna leh hmangaihna lantirtu kan nih ve hi kan tih makmawh a ni a. Kristian inti si, midangte tana luang chhuak ngai reng reng lo kan nih chuan kan inenfiah a ngai hle a ni.

    Biakin chhung chauh a Kristian kan ni ang tih a hlauhawm a, kan awmna hmun apiang leh kan bula awm apiangte hian Kristian kan ni tih hi hria se a va duhawm em!! Chung chu hmangaihna avang chuan kan ti thei vek si a.

    Kan Lalpa  Isua, Kan tana a nun hlana a inpekna hriatrengna ni ah hian tu tan nge kan inpek ve ang a, tu tan nge malsawmna kan nih ve ang le?

***********************

 

JUNIPER Good Friday SPECIAL ISSUE VOL. XIX, ISSUE NO. 13; 3rd APRIL, 2015

GOOD FRIDAY LEH CHAWIMAWINA PROGRAMME

    Vawiin Dt. 3rd March 2015 (Good Friday) hian Bro. R. Lalngaihzualate chhungkua chuan Pathian hnena lawmthu sawi nan Chawimawina an nei dawn a. He Chawimawina Programme hi Revival Programme a hman chhunzawm nghal tur a ni ang. Programme hian Pathianni zan thleng a awh ang a. Hemi hunah hian Speaker atan Evan R. Vanchhunga chu rawih a ni. Good Friday tlaiah hian tisa lam ruai buatsaih a ni ang a. Kohhran hote Thlarau lam ruai pawh kan kil theuh theihnan thahnemngai taka he hunpui hi hmang theuh turin kan insawm a ni.

Dt. 3.April.2015 GOOD FRIDAY

CHAWHMA
Chairman: Upa C. Taisena
Tantu: Bro. R.Lalngaihzuala
Speaker: Evan. R.Vanchhunga.

CHAWHNU
Chairman: Upa C.Taisena
Speaker: Evan. R.Vanchhunga

ZAN
Chairman: Upa C, Damvea
Speaker:  Evan. R.Vanchhunga,

4.April.2015 INRINNI

INRINNI ZAN
Chairman:- Upa C. Damvea
Speaker:- Evan. R.Vanchhunga

5.April.2015 PATHIANNI

SUNDAY NILENG LEH ZAN
Chairman:- Evan. K.Lalhmingmawia
Speaker:- Evan. R.Vanchhunga

*******************************

LALPA ZANRIAH SACRAMENT BUATSAIH

Nizan, Dt.2 April 2015 (Ningani) zan khan Bial chhunga Local hrang hrangah Lalpa zanriah Sacrament buatsaih a ni a, hemi rual hian kesil rawngbawlna neih nghal a ni. Bial Headquarters, Bethlehem-ah chuan Bialtu Pastor Rev. Ramtharpara’n hun a hmang a, Bethlehem Vengthlang ah Rev. JH Zahluna’n hun a hmang a, Hermon-ah Rev. Ellic Hnehzova’n hun a hmang bawk.

*******************************

ARTICLE THEHLUH THEIH

Juniper a chhuah tur Article leh Sermon, engtik lai pawhin thehluh theih reng a ni a, tin, Easter lam hawi article nei tan pawh a la thehluh theih reng e. 

 *******************************