THUTAKA TIHTHIANGHLIM - Varhlunkima

“Anni chu thutak in tithianghlim rawh, I thu chu thutak  a ni” Johana 17:17
    

 Isua Krista khawvela a lenlaia a zirtirte hnena a thu hnutchhiah ropui tak chu “Thlarau Thianghlim lo thlen tur thu” a ni. Khawvela Krista rawngbawlna chu hun ruat chhungte chauh a ni a. A zirtirte hnen ata a la kal bo dawn a ni tih kha Isuan a hriat chian em avangin an mangan lohna turin “Thlamuantu” tirh a tiam a. Chu thlamuantu chu “Pa Thiltiam” a ni a ti bawk a (Lk 24:47;TT 1:4). Pa thiltiam, thlarau thianghlim chu a lo thlen hma loh chuan Jerusalem chhuah san lo tura thu pein a lo thlen hunah chuan thiltihtheihna an la neih tur thu nen lam a hrilh a (TT 1:4). Chu Thlarau thianghlim hnathawh ropui tak pakhat Isuan a sawi lawk chu a zirtirte chu engkim a zirtir ang a, Isuan an hnena a sawi zawng zawng chu hriatchhuah tir lehin (Joh 14:26) thutak zawng zawngah a hruai lut dawn a ni (Joh 16:13).

Thlarau Thianghlim Hnathawh:

    Thlarau thianghlim hnathawh hi sawi tur tam tak a awm theiin keimahnia a hnathawh dan a zirin sawi tur pawh a tam viau ang. Chung tam tak karah chuan pakhat han thlur bik ta ila. Thuthlung hlui zawlnei ten thlarau thianghlim Pathianin mitin chung a la leih tur hi an lo hmu lawkin an lo sawi lawk tawh a (Joel 2:28). Chung zawlnei ten thlarau thianghlim lo thleng turin a hnathawh tur an lo hrilh lawk chu “Pathian Dan thu kan thinlunga ziaha awm tur thu hi a ni” (Jer 31:33, 34; Ezek 36:25-27). Thuthlung hmasa, Mosia Dan thuthlung thute chu lungphekah leh lehkhabuahte ziah a ni a. Chu Dan chu Dan thianghliam ani a, a fel a, a tha bawk a ni (Rom7:12; 1 Tim 1:8). Amaherawhchu Dan chu tha mahse Israel fate tan chuan an zawh loh nghawngkawl lo niin (TT 15:10), Dan anchhia (Gal 3:13), anmahni dodaltu (Kol 2:14), thihna rawngbawlna (2 Kor 3:7) a chang ta hial mai a ni. Dan petu Pathian chuan a Dan siamah chuan Israelte chu an leng lo a, a thupekah te chuan an awm reng lo tih a hriatin Aigupta ram atanga a hruai chhuah nia a thuthlun ang kha ni tawh lovin, thuthlung thar siam a tum ta a (Jer 29:31). Pathianin thu a thlun chu hei a ni: “An chhungrilah a thupekte a dah ang a, an thinlungahte a ziak bawk ang” (Jer 29:33). Pathian thupekte kan zawm a, Pathian dan siamahte lenga, A thupek leh dante kan thinlunga ziaha a lo awmna chu thlarau thianghlim min pekah hian a ni (Ezek 36:27). Thlarau thianghlim zarah Pathian thute chu lehkhatui nilo, thlarauva ziak zawk, lung pheka ziak ni lo, tisa thinlung phekah zawk ziahin a lo awm ta a (2 Kor 3:3). Chutianga kan thinlungah ngei Pathian thu chu Thlarau kan dawn khan ziaha a lo awm avangin Thlarau chuan Pathian thutakah min lo hruai lut ta thin a ni. Thutaka hruai luha kan awm tawh hnu pawha khawvel mite ang leka “Tawk suh, tem suh, dek suh” in tih kan la ngai fo mai hi chu mahni ngei kan in fiah a pawimawh takzet a ni.

Thutaka Tihthianghlim:

    Pathian thutak zawma kan nun kan hman theihna turin Thlarau thianghlim pek kan ni a. Pathianin atana bungbel thianghlim ni tura min tih thianghlimna, Amaha thilsiam thar kan nihna chu Thlarau thianghlim kan dawn hi a ni. Amaherawhchu Thlarau pawlna nasa takin chang mahila Pathian thutak/thu kan ngaih pawimawh loh a Pathian thutaka hruai luha kan awm loh chuan serh hran kan nihna te leh kan thianghlimna hi hmuh tur a awm lo a ni. Miin Pathian thutak a ngaihsaka Pathian thu a nun kaihruaitu, a ke atana khawnvar a kawng atan eng (Sam 119:105) a hman chuan nun thianghlim a neiin Pathian thutak chuan a nun sual lakah vawngin a tithianghlim ta thin a ni. Pathianin Israel fate, Kanaan rama lut mai turte hnena hnam dang laka an thianghlimna a lan theihna tur leh hnam thianghlim an ni tih hnam dang ten an hmuh theihna tura a thuchah chu “a thupekte zawma a kawngte zawh a ni” (Deut 28:9). Kanaan mite chu hnam bawlhhlawh an ni a chung hnam thianghlimlo zinga Pathian tana hnam thianghlim an nihna tur leh hnam dang ten Pathian tan serhhran an ni tih an hmuh theihna chu Pathian thu/thupek a an awmna kha a ni. Krista ringtute pawh hi khawvel chhe tawh tak leh bawlhhlawh tak kara khawsa a cheng ve kan ni a. Chhuan beng tla lo leh tihmawh zinga sual nei lo leh nuntlang, Pathian fa sawiselbo kan nih theihna turin Pathian thutakah kan awm reng a tul a. Pathian thutak hian mihring a ti thianghlim thin a ni tih hriain kan Thlarau chan hian thutakah min hruai lut sela thutakah vek I awm reng ang u.