KAWNG THAR THIANGHLIMNA LAMAH AW --- Evan. Robert Lalrinsanga

Kum 2013 District Conference chuan thianghlimna kawnga hmalakna thar 2015 atanga hman tur duang chhuakin Aizawl East District huangchhunga rawngbawltu tupawh heng zuk leh hmuam (kuhva, meizial, sahdah, tuibur leh ruihtheih thil reng reng) lakah a thianghlim loh chuan rawngbawltu mah nise Pulpuit atanga  thusawi tawh lovin Lecturn-ah an sawi tawh tur a ni tiin a lo passed a. Kumin Junary 1 ni atang khan he dan thar hi hman tan a lo ni ta a. He kan dan thar hian thianghlimna kawnga la fihlim lote thinlungah engtiangin nge nghawng a neih tih hi thil pawimawh tak chu a ni.

Bethlehem Local-ah ngei pawh hian zuk leh hmuama la fihlim lo engemaw zat rawngbawltu kan la awm niin a lang a, engtiangin nge hma kan lak ve dawn? Mahni theuh inzawt ila a va tha dawn em! Kohhranin thianghlimna kawnga hma a lak takah chuan kan Local chhungah ngei pawh nghei thar kan awm ta nual mai a, thil lawmawm tak a ni. Hemi kawnga la fihlim lote pawh hian kan taksa a lo thianghlim zawk a, rawngbawltu kan nihna atang pawha thil mawi zawk leh kan thianghlim zawkna tur a ni tih hriain zuk leh hmuamah hian fihlim ila ava duhawm em!

Mi thenkhatten zawhna min zawh thin chu zuk leh hmuam ka tih hian Pathian rawng ka bawlnaah min tibuai lo, ka hlim a, ka lam pawh ka thulh lo, nghei kher a ngai ami? tih hi. Unau duh tak, kan rilruah awm se ka duh chu entir nan, kei pawh hian zuk leh hmuam ti ila, Pathian rawng ka bawlnaah ka hniam phah lovang. Tha takin thu ka sawi reng tho ang, a chhan pawh heng zuk leh hmuamte hi sual lian takah ka ngaih loh vang a ni.

Kan mimal ngaihdan ai chuan kan kohhran duh dan te, kan dan te, rawngbawltute chunga Pathian leh Kohhran duhtuizia te, a thikthu chhiatziate hi kan rilruah a tharin awm se, heng kan ngaihdante hi kan sawhsawn mai lo maw?

Unau duh tak, ka rawngbawlna ka thulh phah chuang lo tih ai chuan rawngbawl tura kohhran kal tlanga Pathianin min ruatnate hi a hlutzia hre thar ila, mahni ringawt ni lovin Pathian lam en ila, rawngbawltu ka nihna atangin ka tih tur a ni em? tihte hi thenawmpa ni lovin mahni inzawt ila, kei chuan thiam ka inchantir ka ring lo.

Chutiang mahni tan leh midang tan pawha tha kan tih loh hruihrual chuan rawngbawltu leh thlarau mi tam tak min valh tlatin min phuar bet tlat a, tal chhuak turin nasa taka tan kan lak a lo ngai ta a ni. Nghei tuma hma kan lak pawhin rei loteah min phuar leh thin a nih hi!

Sunday tukah vawksa rep kan han hai lut hem hem a, chumi hnu chuan meizial leh kuhvain kan lung a tileng nghal a, a lungleng zawka kan tan miau avangin a pantu zawkah kan tang leh thin. Unau duh tak, heng min bawih tlattu zuk leh hmuam laka hawikir leh tawh lo tura tal chhuak tur hian kan zain a tharin tan ila ang.
Heng zuk leh hmuam kan thlarau nun kawng khat pawha chawikangtu ni lo, kan tih laklawh avanga min bawih tlattu, ta neiha min nei tawhtu hnen ata tal chhuak a, thianghlimna kawng thar zawha tan la turin inbuatsaih ila, chutianga hma kan lak chuan mimal, chhungkua leh kohhran chu ava mawi dawn em! Thil lang reng pakhat chu heng zuk leh hmuam kan tih hian mahni kan insit a, thianghlimna thu kan sawi ngam lova, kan rawngbawlpuite insum theihnaah kan insum theih ve loh avangin inthlahrunna kan chungah a lo thleng a, mahni inrintawkna te hlohin rawngbawlpuite phak loh ena en a awl hle. Sim turin inbuatsaih ang u.

Hun tha Pathianin min pek chhung hian heng zuk leh hmuam kan tih thin hi i sim ang u. Chuti chuan kan taksa leh thlarau chu a lo thianghlim zawk ang a, a rah chhuah chu mahni leh kohhranin kan tel dawn a ni. Kawng tharah kalin i intithianghlim ang u. Lalpan malsawm rawh se.