JUNIPER EDITORIAL: 22 February 2015: VOL XIX ISSUE NO: 8

Thuziak tura insawmna

    Aw ka thu chhuak chuan min hneh viauin lang thin mahse, aw a chhuah rual rualin a thamral leh mai thin a. Chutihlaiin Thuziak erawh chuan kum tam tak mai nilovin dam chhung mai bakah thih hnu thlenga kan awm tawh loh hnu thlengin a daih thung a ni!
    Chanchin Tha hril tur chuan Thuziak kan mamawh hmasaber a. Chu Thuziak-a chu kan Nunna Bu ‘Pathian Lehkhabu Thianghlim’ hi a ni ti ila kan sawi sual tam lovang. Kan hma a mi thianghlim kaltate vawiin ni thlenga an chanchin kan chhiar theihna chhan pawh Thuziak vang a ni a. Kan zingah tel ve lovin an hmel leh an aw-ka te hre lo mah ila an Thuziak  chuan kan thinlung chhung ril ber thlengin a fangchhuak thin a. Chutah chuan Pathian Thlarauvah hlimna leh lawmnate kan lo chan ve phah thei ta thin a ni.
    Krista chu Kohhran Lu anih avangin awm hrang thei a ni lova, a inzawm tlat angai ang bawk hian Kohhran tinung tur chuan Pathian thu aw-kaa kan sawi chhuah mai bakah Thu Ziaka kan dahthat a tul ve bawk thin a ni. Thuziak chuan kan thinlung chhunga kan vei leh tha ni-a kan hriatte sawi chhuahna hun tha min siam a, midangte hnena kan sawichhuah theihloh leh kan sawichhuah ngamlohte tarlanna hun tha min siam thin a. Chuvangin Pathian Kohhrante kan chak lehzual zel theihna turin Thuziak lamah tan ila sauh sauh ang u.
    Kan Kohhran kan lo hmasawn a, rinna kawngah chak thar lehzualna kan neih zel theihna turin Kohhran member tinte ziak mi tha tak takte, kan tualchhung chanchinbu-ah hian in thuziakte (Article) lo thehlut turin kan insawm thar leh bawk a ni. He khawvelah hian lo awm tawhlo pawh nila i Thuziak erawh chu a awm reng ang.

Editorial Juniper 31 May 2015

JUNIPER EDITORIAL

Naupangte hian zirtirna tha dawn hi an mamawh em em a, kan zirtirna pek kawngah pawh hian fimkhur a ngai hle mai. Nakin lawka kan ram leh kohhran hruaitu turte an nih avang hian keini puitlingte hian kan zirtirna pek kawngah hian kan uluk hle a ngai. “Naupang chu a kalna awm kawngah chuan zirtir ula, a upat hun pawhin a thlah lovang” tih Bible-a kan hmuh ang hian an chet dan phung, an hawiher leh mizia thleng hian kawngdik kan kawhhmuh a tul hle mai. Naupang rilru hi a thianghlim hle mai a,  lehkhaphek var tak ang a ni a, chu lehkha phek var thianghlim takah chuan puitlingte hi a ziak tu turte chu kan ni. Chuvangin chawl lova kawngdik kan hrilh mawlh mawlh a ngai a ni. 

    Naupang than lenna zel turah leh kaihhruai danah chhungkuaa inzirtirna tha dawn hi rahbi hmasa ber a ni a, chhungkaw tinte hian mahni fate leh naupang theuh enkawlna hna hi nu leh pate hian mawhphurhna lian tak kan nei theuh a, chuvangin nu leh pa ten tan ila zel ang u.

    Tin,  kohhran anga kan  nun ho naah hian kan fimkhur a ngai hle mai. Kan tawngkam hman danahte ,kan BIak-in nungchangte, kan thusawi leh awmdanah te hian entawntlaka kan awm hram hram hi a pawimawh hle mai. BIakin-a kan kal dawnte hian Bible leh Hla bu ken nachangte hi hria ila, hla hriltu kuta kan han innghat ringawt mai te hi chu a zia lo lam a ni. Tin, thalai thenkhat ten inkhawmlaia mobile phone kheuh neuh neuh an chingte hi sim atan a tha hle mai. Chuvangin,kan nun dan zawng zawngte hi naupangte rawn zawh tur a ni tih kan hriat a, kawng engkimah kan fimkhur theuh hi puiltling zawkte mawhphurhna a ni tih hi i hrethar theuh ang u.

*****************************

Connection I Nei Tha Em? - Jacky Lalruatmawia (Juniper Article 31 May 2015)

JUNIPER ARTICLE

CONNECTION I NEI THA EM?

Jacky Lalruatmawia

    Tunlai khawvel chankannain a ken tel Internet Connection hmangin Pathian Thu rawn chhawp chhuah ka tum dawn a ni. Thalaite leh nu leh pa thenkhatte chuan kan hria in a rinawm a, he thuziak hi a bikin thalaite tan erawh chuan hriatthiam awl tak anih ngei ka beisei. Broad-Band Internet Connection nei tur chuan Modem kan mamawh hmasa phawt a, Computer kan neih angai leh ta bawk a. Computer neiin Internet Connection nei ta ringawt ta ila, engmah kan la ti thei chuang lova, khawvel tukverh-a dak lut tur chuan Web Browser kan mamawh leh ta a. Tin, chu Web Browser hmang chuan kan duh duh kan thlirin kan ti thei dawn tihna alo ni. Movies/Games/Software,etc download kan duh thin a, hemi atan hian Torrent site-te leh site dang dangte atangin a download theih a. Browser ringawt hmanga kan download chuan a speed a hniam a, a chaklo thin hle a ni. Chumi harsatna su kiang tur chuan Download Manager a awm ve leh ta a, Internet Download Manager (IDM) hi entirnan lo hmang ta ila. Tin, Software/Games Crack version (full version) kan duh chuan Torrent site atangin awlsam tein a thlawnin a download leh theih bawk a, amaherawhchu torrent site ami download tur hi chuan Torrent Downloader kan neih alo ngai leh ta bawk a ni.

Connection & Fees = inpekna nun
Connection chi hrang hrang neih kan duh chuan pawisa chawi a awm ziah thin a, chutiang zelin Broadband internet connection-ah pawh hian pawisa sen angai a. Fee tha taka kan pek loh chuan an lo disconnect mai dawn a ni. Chutiang chiah chuan Lal Isua nena inkungkaihna (connection) tha tak kan neih theihna tur chuan mahni insen ralna nun neih angai a. Kan tha leh zung kan sum leh paite Lalpa tan ui lova kan hlan fo thin hi a tul hle dawn a ni. Sawmapakhat hi Lalpa chanpual anih ang ngeiin kan hmaih hauh loh tur a ni a, tin Lal ram alo zauh zel theihna turin Ramthim pual leh thil dang danga Kohhran hmasawnna kawnga kan sen ralna zawng zawngte hi a thlawn mai lo a ni tih hria ila. Lalpa nena inlaichinna tha tak min siamsaktu, Vana ro kan khawlkhawmna a ni tih hre rengin, thahnemngaih kan chhuah deuh deuh a tul hle dawn a ni.

Modem= BIBLE
Modem tih thumal hi Modulator-Demodulator tih tawngkam lam tawi a ni mai a.  Modem hi chi hrang hrang a awm a, tunah erawh hi chuan Broadband Modem chungchang kan sawi deuh  bik dawn a ni. Modem chuan telephone line atanga Analog Signal lo kal chu lo siam remin Computer-ah kan hmuh theih turin Digital Form in alo siam chhuak a, chutichuan internet connection tha takte neiin kan lo khawih theih phah ta a ni. Hetiang bawk hian, Pathian nen a in kungkaihna (Connection) tha kan neih theihna tur chuan Modem kan mamawh ta a, chu modem chu Bible hi a ni a. Chu Bible ah chuan kan tana tha tur tamtak, kan mamawh engkim awmna leh mi thianghlim kaltate chanchin ziak chu chhiar theihin a awm a. Ahmasaberah chuan Pathian nena Connection tha kan neih theihna tur chuan Bible kan neih hmasak phawt chu alo ngai ta a. Chu Bible chu nei ringawt si ila, kan chhiar ngailoh erawh chuan a nihna leh a tangkaina angin kan hmang pha dawn chuanglova. A tangkaina ang tak pawchhuak thei tur chuan taima taka kan chhiar thin a ngaih mai bakah Pathian thupekte kan zawm angai dawn a ni. Chutah tak chuan Pathian duhzawng leh a thu-te chu ilo hrefiah thei ang.

Web Browser = Tawngtaina
Internet connection chu kan nei ta a, a chhunga thil awmte hmu a hmang tangkai thei tur chuan Web Browser kan mamawh leh ta a. Chu Web Browser hmang chuan kan duh apiangte chu kan thlir thei ta a ni. Chutiang zelin Lal Isua nen kan inkar connection a that theihna tura tangkai leh ta chu Tawngtaina hi alo ni leh ta a. Internet-a lut a hmang tangkai tur chuan Web Browser kan mamawh ang bawk hian, Lal Isua chu keimahni-ah alo nung a, a tana mi tangkai kan lo nih ve theihna tur chuan Tawngtaina kan mamawh leh ta a ni. Tawngtaina chuan Bible-a a Thu Thianghlim kan chhiarte chu chiang leh fiah zawkin a hrilhfiahna min pe anga, kan thlarau nun nasa takin a chawm anga, Lal Isua nen kan inkungkaihna chu a tinghet zual deuh deuh dawn a ni. Tin, internet kan khawihin Browser hmanga kan duh apiang kan zawng (Search) thin ang hian, Tawngtaina chuan Lal Isua hnenah kan duh leh mamawhte thlen theihna min siamsak a, kan chaklohna laite a hnena kan thlen theihna awmchhun a ni a. Amah nena inkungkaihna tha tak kan siam theihna tura hmanraw tangkai tak pakhat alo ni leh ta a ni.

Download Manager = Thlarau Thianghlim
Sawi tawh ang khan Browser atang ringawt a download chuan a speed a muang em em a. Tam tak chuan Download Manager an neih thin loh avangin internet a thil awmte rang tak leh awlsam takin an download thei ta thin lo a ni. Lal Isua hi nunphung pangngai tak leh inti polite taka kan biak chuan kan thlarau nun a chaklo hle thin a, kan hul dup mai thin a ni! Thlarau Thianghlim pawlna tello chuan tanna hunte leh Thuhriltu hun hmante hi a huphurhawm hle thin a. Chumai bakah a Biak Buk pan chaknate pawh kan tlachham hle thin a ni. Chutiang anih avang chuan kan rinna kawngah leh thil tha tihna kawngah chakna kan neih theihna tur chuan Thlarau Thianghlim kan chan hi a pawimawh hle a ni tih alang chiang hle awm e. Ringtute tan chuan Thlarau Thianghlim hi Lalpa hnen ata thilpek leh chak lehzualnate kan neih theihna tura kan Download Manager tangkai tak a ni! Torrent site a thil awmte hi torrent downloader kan neih loh chuan a download theih reng reng lova. Chutiang zelin Lalpa Thuthlung Ropuitak mai hi, Thuthlung vuantute chauhin kan hmuin kan hrethei a. Hnamdang/Kohhran dang erawh chuan Thuthlung vuantu an nih miau loh avangin an hrethiam pha ve reng reng lo a ni. Torrent Downloader (Thuthlung) an hmu a, an chang ve anih ngawt loh chuan hriatthiam phak rual a ni lo!

************************

JUNIPER ISSUE NO. 22 ; 31st MAY, 2015

LOCAL THIANGHLIMNA COMMITTEE

DIN A NI

District Hruaituten Bial leh Local tinah Thianghlimna Committee din tura a ngen anginBethlehem Kohhran ah pawh Local Church Board Committee chuan Thianghlimna Committee chu a din fel ta a. Office Bearers leh Committee member pawh a ruat fel nghal a ni.

    Chairman    :     Evan Lalramthara
    Secretary    :    Bro. R. Lalrokima
    Treasurer    :     Bro. K. Lalfamkima   

Committee Members:
    1) Bro. C. Lalthanga
    2) Bro. F. Zaihmingthanga
    3) Bro. K. Liansanga
    4) Bro. Sangkhuma
    5) Bro. Zonunsanga
    6) Bro. Lalnunmawia
    7) Bro. C. Lalnunfela

    Thianhlimna Committee meeting hmasaber chu vawiin Pathianni Dt. 31 May 2015, Chawhnu inkhawm ban hian Biakin Committee Room-ah neih a ni ang.

*****************************

BIAKIN SAK TANPUINA KHAWN DAWN

Zanin Pathianni inkhawm programme ah hian Bazar Bial a, Ramthar Veng Kohhran Biakin sak tanpuina tur khawn a ni dawn a, hemi hunah hian Bazar Bial atangin campaign turin an rawn kal dawn a ni. Kohhran mipuite Biakinsak tanpui na tur hian theihtawp chhuah tlang turin kan insawm a ni.

*******************************

DISTRICT EDUCATION COMMITTEE AIAWHIN KAL DAWN

Bethlehem Local PYD Member chhuanawm tak tak Bro. C. Lalrammawia, Bro. Dr. R. Lalfakzuala, Bro. Oliver Lalthlengliana leh Bro. Lalrinchhana Zote te chu Dt. 14 June 2015 hian Thingsulthliah Bialah Education Awareness Campaign neiin an kal dawn a, Bro. C. Lalrammawia leh Bro Lalrinchhan Zote ten thusawina hun an hmang dawn a ni.

*******************************

LALLIANA GROUP NEWS

*Lalliana Group PYD chuan kar kalta 26 May 2015, Thawhlehni zan khan Pickle zuarin an hnatlang a, hnatlanga thawkchhuak member-te leh lo dawrtu zawng zawngte chungah lawmthu an sawi a ni.

*Kar Kalta Zirtawpni, ni 29 May khan sun tuak nan lehkha chhia an hralh a, lehkha chhia lo khawl sak tu zawng zawngte chungah lawmthu an sawi a ni.

***********************************

LOCAL PYD KUMPUAN
SUB-COMMITTEE NEWS

* Tun thla June 2 emaw ni  4-ah emaw hian Bethlehem PYD Kumpuan Sub-Committee  chuan Meeting pawimawh tak neih tur a ni a,  hetah hian District atanga lehkha lo lut chungchang leh hmachhawp neih sa te bawhzui dan tur rel a ni ang. A hun chiang zawk chu Naktuk Dt. 1 June 2015, Thawhtan zan inkhawmah puan a ni ang. Committee member zawng zawngte hun awl lo insiam theuh turin hruaituten min ngen a ni.

* Kumpuan Sub-Committee pual hian kar kalta Thawhtanni zan, May 25 khan inkhawm  neih a ni a, inkhawm boruak a tha in chanvo nei tura ruat zawng zawngte inbuatsaihna pawh a tha in, hun an hmang tha hle mai a, hemi zana inkhawmte chuan hlawkthlak an ti hle. Hemi zana thawhlawm hi kumpuan puala  dah a nih avangin kumpuan hruaitute chu Local PYD hruaitute chungah an lawm hle.

*********************************

BIAL THIANGHLIMNA COMMITTEE BUATSAIHIN SEMINAR NEI DAWN

June ni 20 hian Bial Thianghlimna Committee chuan Bethlehem Biakin-ah Thianghlimna chungchang Seminar pawimawh tak a buatsaih dawn a, he hunah hian Resource Person atan Dr. Jane R. Ralte, Nodal Officer MSTCS, Lalremruata, MSTCS leh Rev. PC Lalnghakliana, Superintendent, Aizawl East District te sawm an ni ang.

*********************************

BIAL THIANGHLIMNA CCOMMITEE IN

CAMPAIGN NEI DAWN

Bethlehem Bial Thianghlimna Committee chuan zanin hian Hermon ah thianghlimna Campaigne an nei dawn a, hemi hunah hian Bro. Lalfelkima’n hun a hmang ang.

*********************************

TAWNGTAIPUI ANG U

Local LAD Secretary Sis. K. Lalchhanchhuahi chu Pumpui Ulcer avangin New Life Hospital-ah Dt. 28 May 2015, zingkar khan hlawhtling takin zai a ni a, amah hi ngaihtuahawm a nilo a,  in lamah an inenkawl chhunzawm a ni. Kohhran mipuite’n kan tawngtaina ah i hre reng ang u.

*********************************

  

AIZAWL ESAT DISTRICT NEWS

  * Bial Joint Revival hlim takin hmang: Champhai Bial, Champhai Bethel Bial, Hnahlan Bial leh Khawbung Bial te chuan Dt 22-24 hmang khan Bial 4 Joint Revival hlim takin an hmang. He hunah hian Bialtu Pastor te bakah Rev R.Lalthanzuala te hnen atang Pathian thusawi ngaihthlak thin a ni.
    * OTS Registration Day : District-in Pathian thu zirna a kalpui mek Oneness Theological Seminary chuan June 1, Thawhtanni Dar 11 hian District Conference Hall-ah Registration Day an hmang dawn. He hunah Thusawi Rev R.Lalhawia, District Secretary leh Rev. K.Darsailova te hnen a\angin zirlaite fuihna thu leh OTS pawimawhna chungchang ngaihthlak a ni ang. He hun hmang tur hian Kum 2015 Session-a OTS zir tur zawng zawng te chu kal vek tura beisei an ni.
    * District Literature & Publication Board :May 26, Thawhlehni khan District Secretary Room-ah District Literature & Publication Board Committee neih a ni a, Kum 2016 Nilai zan Thupui zirtur leh ziaktu tur ngaihtuah a ni a, Kum 2016-ah chuan Nilai zan Thupui bu hming hranpa awm lovin Nilai Zan thupui tih mai ni se, tlawmngaia lo ziak turin Rev. C.Vala, ruat a ni bawk. He Committee-ah hian thil tul leh pawimawh hrang hrang sawi hona neih a ni bawk.
    *Mi thar: Nopa Bial chuan Pathian malsawmna dawng mekin Thlarau dawngthar 25 awmin Baptisma changthar mi 12 an awm tawh a, Mithar 8 sengluh anni bawk. Kawlbem Kohhran-ah Bial S.S hruaitute leh Bialtu Pastor T.Lalbiakliana te chuan District S.S rorel bawhzuiin lang Camp cum Seminar neih a ni tawh a. He Seminarah hian mi 15 in Thlarau dawngtharin mi 12 in Isua hmingin Baptisma an chang thar bawk a ni. Ngopa Kohhran-ah mi 8  lawmluh thar an ni tawh bawk.

*********************************

Juniper Editorial Dt. 17 May 2015

 JUNIPER EDITORIAL

Thlarau nazawng...

    Kan Pathian thu ah hian Thlarau nazawng a awm thu leh zirtirna dik lo a awm tih thu chiang tak in kan hmu a. Chuvang chuan zirtirna diklo leh Thlarau nazawng ni awm hi enge kan ngaihtuah a ngai. Chutih rual erawh chuan thlarau dik leh diklo kan tehna tur chu ngun taka kan ngaihven a ngai, mahni rindan dan a lo sawi ve ngawt chi chu a ni hauh lo ang.
   
    Zirtirna diklo pawh a awm ngei a, Tirhkoh Paula te ngei pawh khan Vana Vantirhkoh te ngei pawh in zirtirna dang Pentecost ni a kohhrante tih dan nilo kha chu rawn hrilh che u pawh nise lo awih suh u a tih kha. Tunlaiah kohhran thenkhatte an hlim in an bei nasa khawp mai. Lalpa hi Isua a ni tih ringlo te leh awih lo tute chu eng thlarau pawh nise awih loh a, rin loh nachang te pawh kohhran te hian kan hriat a tul khawp mai. Thlarau nazawng hre tur leh zirtirna diklo hre tur in thuthlung fate pawh kan inbuatsaih a, kan insiamthar a ngai. Anih loh chuan kan rinna te a lo derthawng in kan lo buai mai ang tih a hlauhawm tak meuh meuh a ni.
   
    Engpawhnise, sawisel mai lova kan theih ang ang a Pathian thu dik leh thlarau dik tak hrilh hriat hi kan mawhphurhna a ni tih kan hriat a ngai tak meuh meuh. Kan Pathian hi  a thuthlungah lo chuan a lo kal dawn lova, a fa ni lo chuan a Vanram an luah thei dawn lo tih hi kohhran ho te hian kan vawn tlat a ngai a ni. Pathian hnenah tawngtai chunga kan rinna kan sawh ngheh sauh sauh a pawimawh e.

Juniper Article Dt. 17 May 2015

JUNIPER ARTICLE

 

 

RINGTU TAWNGKAM

                                            By Arina Zote

    Pharisai ten uirenu denhlum tuma Isua hnena an rawn hruaia, a ngaihdan an zawh khan, kan Lal Isua khan tawngkam ngeiawm leh mei nei, tullo pui pui lo chhak chhuak duah lovin,” Sualna neilo apiangin deng hmasa rawhse”, damdiai leh awmzia nei takin alo ti mai a, a bak a sawi duah lo. Chu tawngkam avang chuan uirenu in thihna pumpelhin ngaihdamna a chang a, mifel famkima inhriaten sualna nei an nih zia an lo hriat chhuah phah bawk a ni.

    Inodui pahnihna a nasat zualpui lai, German Air Force thlawhna rualin, zing chhun zan zawm, chhumlo chat lova England ram an han bomb mup mup mai kha zawng a rapthlakin British mipui te kha an thlaphang tak zet zet a. Amaerawhchu, khatih hunlaia British Prime MInister rothap leh huaisen, Winston Churchill-a khan radio kal tlangin mipuite thu a chah a, a thusawi tawi fel, tawngtui tam duah lova tawngkam amzia neii taka, “ Khawmualah te, tuipuiah leh van boruak sangahte pawh beiin kan tang zel ang, kan tlawm dawn lo’’ a tih khan British sipai leh mipuite ah chona leh phurna thar a pe a. “ Battle of Britain” ah khan ropui takin hnehna an chang nghe nghe anih kha. Khami tuma Winston Churchill-a thusawi kha Khawvel History a thusawi ropui berte zinga mi a ni nghe nghe.

    Keini kristian, ringtu intite hian kan tawngkam chhuak hi kan uluk in mite mitmei kan veng thin em? Mite chuan Khawvel History nghawr danglam dawt thei khawpa mite rilru hneh thei tawngkam tangkai leh hmantlak an chhak chhuak thin asin. Kan tawngkam ve hian enge a rah chhuah, mite beidawnna leh rilru natna mai em ni a rah chhuah aw? Nitin kan in en leta kan inchhut nawn fo ava pawimawh em. Kolossa 4:6 ah chuan, “ Mitin engtia chhan theuh tur nge ni tih in hriat theih nan in tawngka chhuak chu, chi a al, khawngaihna tel ni fo rawhse” tih ziak kan hmu. Ringtu tawngkam ni awma mawi hi a awm a ni tih kan hriat a tha. “ Kei chu ka tawng liam puat puat a, ka thusawi hi ka hre rei lem hlei lova”, tihte kan chhinga, a lo dawngsawngtu khan a lo hriat reng a, a rilru tinatu a lo nih reng si chuan a zia lo viau ang le.

    Kan tawngkam chhuakte hi mitena Biakin hnaih leh pan an chak loh phahna chhante alo ni ru reng em? Mite tina a, beidawng leh intihhlum duh hial khawp rilru neih tirtu alo ni reng em? Nupa inngeih leh inthlahlel em emte inthen tirtu alo ni reng thei em? Pulpit leh Maicham atanga kan thu chhah chhuahte hi mitena Biakin leh Kohhran lak atanga tihtauh leh inkiltawih phah nana an hmanna chhante alo ni ru reng em? Kan tawngkam chhuak hi nula leh tlangval in hmangaih em em, kumkhua a nupa a insaim mai tawh turte in iai tira, in thentirtu alo ni thei reng em?  Nu leh pa ten kan fate tibeidawng zawngin tawngkam kan chhak chhuak fo em? Kohhran upa ni chung si in kan tawngkam mei nei tak tak avangte in kan faten mahni in chhuahsan duhna rilru an pu rum rum thin em? Tin, faten min hringtu, kan lei Pathian hmuh theih, kan nu leh pate rilru tina zawngin tawngkam kan cheh thin em? Thlarauva hlimna lo chan thar ve tak avanga an thahnem ngaihna duh khawp lovin a thim a var pawh thlulo leh hrehawm tamtak tuara Kohhran lo khai dingtu Pastor leh Upate sel zawngin tawngkam kan chhak chhuak fo thin em? Heng zawng zawng hi nitin i chhut nawn fo thin ang u. Jacoba 3-8 ah, “ Amaherawhchu, lei hi tuman an khawih ngam thei lo a ni; thihna hlawma khat, sual awm hle hle theilo a ni,” tih ziak kan hmu. Ringtuten kan lei kan ven that a, kan tawngkam chhuak chu chi a al, khawngaihna tel a ni tur a ni tih hi kan hriat nawn fo ava pawimawh tak em.
Lalpan malsawm rawh se.

JUNIPER: 17 TH MAY, 2015 VOL. XIX, ISSUE NO. 20 ;

 BIAL 5 JOINT REVIVAL HMAN MEK A NI

Tunkar inrinni Dt. 15 May 2015 zan atang khan  Bial Nga Joint Revival chu Bawngkawng Bial Kohhran Biakin-ah hman tan a ni a, Zanin Dt. 17 May 2015 Pathianni zan hian a tiak ang.. He Revival programme-ah hian Bawngkawn Bial, Upper Republic Bial, Salem Veng Mualpui Bial, Bethlehem Bial leh Bazar Bial te an tal anga a, Rev. Lalrema District Revival Committee Chairman chuan  hawngin Upa C. Taisena Bethlehem chuan tawngtainain Joint Revival hi a khar dawn a ni. Kum 2016 bial nga Joint Revival chu Mualpui Salem Veng bialah nghah a ni ang.

    Bethlehem Bial atang pawhin bus hman a ni dawn a, Joint Revival a kal tur zawng zawngte chu Sihlui ah dar 9 a.m ah kim vek tur a ni. Zan lam ah pawh Bus hi a awm dawn bawk a ni.

PROGRAMME
        PATHIANNI CHAWHMA
Chairman    :    Rev. Ramthapara Bethlehem Bial
Zaipawl    :    Bazar Bial PYD
Thsawitu    :    Rev. F. Lalchhanhima, Mualpui Salem
Thawhlawm    :    A thlengtu pual

        PATHIANNI CHAWHNU
Chairman    :    Rev. Lalrema, Upper Republic   
Zaipawl    :    Bethlehem Bial Zaipawl
Thusawitu    :    Rev. R. Lalhawia Dist. Secy.
Thawhlawm    :    A thengtu pual

        PATHIANNI ZAN
Chairman    :    Rev. C. Lalzuiliana Bazar
Zaipawl    :    Bawngkawn Bial
Thusawitu    :    Rev. V.L. Dika Sailo Gen. Supdt.
Thawhlawm    :    Revival Pual

        INKHAWM TAN HUN
Pathianni Chawhma    :    Dar 10 a.m.
Pathianni Chawhnu     :    Dar 1:30 p.m.
Pathianni Zan         :    Dar 7 p.m.

*********************

GENERAL HEADQUARTERS OFFICE HAWN A NI TA   

North East India UPC ten kan hmunpui General Headquarters Office chu May 15, Zirtawpni chawhma Dar 11:00 a.m khan hawn a ni.
   
Hawnna inkhawm buatsaih hi Rev. Lalmalsawma Sailo, Planning Board Chairman-chuan a kaihruai a, Rev. PC. Lalnghakliana, Planning Board Secretary chuan hunserh hmangin, Rev. VL Dika Sailo, General Superintendent chuan Pathian malsawmna ropui tak a ni tiin he office hi a hawng. Technical Report Rev. R. Lalrinsanga, Planning Board Treasurer -in a pe a, a hmun lei nan cheng nuai sawmruk pali, (Rs.64,00,000) sen a ni a, Vawiin thlenga a sakna senso atan cheng Nuai zahnih sawmkua pathum, singhnih sangkua zathum sawmthum pathum (Rs. 2,93,29,333.00/-) vel hman a ni tawh.  General Choir leh North Mizoram District Choir ten fakna hla an sa bawk.

    North East India UPC hnuaia District 11 Superintendent theuhte bakah Rev. R. Laichhingpuia General Sunday School Director, Colnel Z.S Zuala, Bialtu MLA leh Pu CT. Zakhuma, AMC Chairman, Rev. JH Zahluna- Editor,  ten thu an sawi a. Rev. Zohmingthanzama, General Missions Director-in lawmthu sawina neiin tlai dar 3:30 pm ah lawmna ruai tuihnai tak kil ho a ni.

    UPC General Headquarters office hi Shillong-a awm thin a ni a, kum 2004 August thlaah Aizawlah sawn chhoh a ni. Kum 2010 April 16 ah Rev. Bruce A. Howell, General Director of Foreign Missions, UPCI chuan Headquarters building lungphum phumin sak hna tan a ni. General Headquarters office Building hi a dung 100ft leh a vang 60 a ni a, chhawng ruk a sang tura ruahman a ni.

********************** 

PASTORAL SEMINAR NEIH A NI

 

     Ni hnih awh Pastoral Seminar chu May 13, Nilaini khan North Mizoram District Headquarters Biakin, Tuikhuahtlang ah tan a ni a. North East India huamchhunga Pastor zawng zawngte tan PASTORAL SEMINAR hi buatsaih a ni.

    Nikhatni hian Rev. V.L Dika Sailo, General Superintendent chuan Seminar hi a kaihruai a,     Rev. Lalmalsawma Sailo, General Secretary paper buatsaih "Evangelism & Statistics" tih leh Rev. R. Lalrinsanga, General Treasurer buatsaih "Ministerial Duties" tih chungchang zir ho niin sawiho na neih chhunzawm nghal a ni.

    A ni hnihnaah Rev. V.L Dika Sailo, General Superintendent paper buatsaih "Pastoral Ethics"chungchang zirho a ni a, Pastor te mawhphurhna leh tihtur chungchang zirtirna leh infuihtharna neih a ni a, Pastor-te awmdan mawi leh nun dan tur chungchang te, Mipat hmeichhiatna kawnga fimkhur a tuldan chungchang, Sum leh paia thianghlimna, Quarters leh kohhran hmanrua enkawl dan chungchanga zirtirna te leh kawng hrang hrangin infuihtharna hun hman a nia, General Discussion neih chhunzawm nghal a ni.  Pastor kalten an hlawkpui hle.
   
District 10 atangin Pastor 150 velin he Seminar hi an chhim a, harsatna avangin South East Nagaland District Pastor te erawh he seminarah hian an tel thei lo a ni. 

 *******************

 PYD HNATLANG

Ni 14 may 2015(Nilaithawhtan) zan khan Bethlehem Local PYD te chu sum tuak nan lei vung paihin an hnatlang a, hemi zan hian hnatlang thawk chhuak an thahnem hle ani. Member hnatlanga chhuak zawng zawngte chungah PYD hruaituten lawmthu an sawi tak meuh meuh a ni.

 LAD DAY HMAN A NI

May ni 10 2015(Sunday) kha LAD Day a ni a, kan Local LAD te chuan a hranpa a lawm lovin Kohhran pumpui huapin thingpui ruai tui takin LAD Day hi an hmang a ni.

LISENCE NEI THAR

Evan. Lalchhuanmawia Zote chuan General Lisence a nei thar a, Bro. Joseph Lalremruata pawhin Local Lisence a nei thar bawk. Lisence nei tharte hi Juniper Editorial board chuan kan lawmpuiin, rawng an bawl leh zelna turah kan duhsakna sang ber kan hlan e.

RT PHUNGA GROUP NEWS

    Local PYD Sport naa RT Phunga group atanga Jersey la thehlut lo zawng zawngten RT Phunga group hruaitute hnenah tunkar chhungin thehluh vek tur a ni.

LOCAL PYD KUMPUAN NEWS

    Naktuk zan thalai inkhawm banah hian Dt. 25th May a Kumpuan puala inkhawm programme tur rel a ngaih dawn avangin Local PYD Kumpuan Committee member zawng zawngte Committee vek tur a ni e. 

 ******************