JUNIPER Issue No. 28; 12 July 2015

PYD HALF YEAR AUDIT NEIH A NI

Kar Kalta Dt.6 July 2015, Thawhtan Zan khan kum chanve chhunga Local PYD Group leh Sub-Committee hrang hrangte sum chet vel dan Audit neih a ni a, Bro. Lalfelkima leh Bro. C. Lalnunfela-ten an Audit a ni.

2015 January thla atanga June thla thlenga Local PYD Group pathum leh Sub-committee hrang hrangte sum chet vel dan chu hetiang hi a ni:

 

*************************

 NAUPANG SUNDAY SCHOOL-AH
DEPARTMENT THAR

General Sunday School Conference kum 2015 in a lo pass tawh, Executive Board approve tura a thudah chu Dt. 25 June 2015 , Zirtawpni Khan Executive Board-ah sawiho niin Naupang Sunday School-ah Department thar, THUTHLUNG ZIR PAWL siam chu tha tih tlan a ni a, General  Sunday School Department-in a tul anga a bawhzui turin dah a ni.

PYD HALF YEAR REPORT

Naktuk Dt. 13 July 2015, Thawhtan Zan, Thalai inkhawmah hian PYD chuan kum danga a lo tih thin angin Half Year Report huna buatsaih leh dawn a, hetah hian Local PYD Group leh Sub-Committee hrang hrang ten an hmalakna leh hma an lo lak tawh dante an report dawn a ni. Group tinte tha taka inbuasaih turin hruaituten min ngen ngal bawk a ni.

BIAKIN ZUNIN CHEI THA MEK

Kohhran in kan mamaw em em inthiarna hmun tha chu Building lam hmalaknain chei that mek a ni a, zunin pawh mipa leh hmeichhe tan a hranga siam tum a ni. Theih tawka chaka hma lak mek a ni a, hun reiloteah inthiarna tha tak kan kohhranin kan neih theih beisei a ni.

BAPTISMA CHANG

Dt.10.July 2015 Zirtawp Zan khan Hermon, Venghlui Local Atangin Mi 8 (pariat) laiin Bialtu Pastor Rev. Ramtharpara hnen atangin sual ngaihdamna Baptisma an chang a, Baptisma  rawngbawlna hi Pastor leh Evan Robert Lalrinsanga ten an nei a ni.

SENIOR DEPARTMENT NOTICE

Senior Department Zirlai zawng zawngte, Zirtirtute’n min chah angin Inkhawmpui Chang Joela 3:1-3 chu vawiin-ah thiamsa veka kaltur a ni a, Nu leh Pate pawhin kan fate thiam tir ngei turin zirtirtuten min ngen a ni.

GRADUATE

Mizoram University in 2015 Bachelor Degree Exam result a tihchhuahah PYD member hlawhtlinna chang kan nei nual a, an hlawhtlinna-ah Juniper editorial Board chuan kan lawmpui hle a, an kal zelna turah duhsakna sangber kan hlan e.

Graduate thar kan hriat theihte chu:
1. Bro. JH Lalhuansiama     I Div
2. Sis. Lalthakimi        I Div
3. Sis. Laltanpuii Ralte    II Div
4. Bro. Malsawmtluanga    II Div

 

GENERAL EXECUTIVE BOARD ROREL TLANGPUITE

June 25, Zirtawpni khan, General Headquarters Office, Mualpui Salem vengah Executive Board meeting-neih a ni a, Rev. V. L. Dika Sailo, General Superintendent chuan meeting a kaihruai a, member zingah Rev. Pantsa Leyri, South East Nagaland District Superintendent tih loh chu an kal kim a ni. An thurel tlangpui te :

1. Hruaitu ruat thar thu :
    a) Rev. VL Dika Sailo General Superintendent tanglai chu July 7,2015-a pension-a a  chhuah dawn tak avangin hun hman zawh loh (unexpired term) atan Rev. Lalmalsawma Sailo, General Secretary thawk lai chu ruat a ni.
    b) Rev. Lalmalsawma Sailo, General Secretary thawklai chu General Superintendent-a ruat a lo nih tak avangin  a hun hman zawh loh (unexpired term) atan Rev. R.Lalrinsanga, General Treasurer  thawk lai chu ruat a ni.
    c) Rev. R. Lalrinsanga, General Treasurer  thawklai chu General Secretary-a ruat a lo nih tak avangin a  hun hman zawh loh (unexpired term) atan Rev. Zohmingthanzama, General Missions Director  thawk lai chu ruat a ni.
    d) Rev. Zohmingthanzama, General Missions Director thawklai chu General Treasurer-a ruat a lo nih tak avangin a hun hman zawh loh (unexpired term) atan Rev. R.Lalhawia, Aizawl East District Secretary  thawk lai chu ruat a ni.
    e) Charge inhlan hun atan July 15, 2015(Wed) ruat niin a hmun atan Gen. Hqrs. Office a ni ang.
    f) Mawhphurhna leh chanvo hrang hrang :
   Mawhphurhna an chelh tharina a ken tel chanvo leh mawhphurhna chi hrang
hrang te chu  hruaitu ruat tharten an chelh nghal dawn a, Literature & Publication Board Secretary mawhphurhna erawh chu Rev. Zohmingthanzaman chelh tlang se, Media Chairman, UPC-NEI chu Rev. R.Lalhawia’n a chelh thung ang. Hengte hi hruaitu hmasa te hun hman zawh loh ( unexpired term ) atan zel a ni ang.

    2. Naupang Sunday School-ah Department  thar – thuthlung zir pawl - siam thu : General Sunday School Conference kum 2015 in a pass, Executive Board approve tura a thudah chu sawiho niin Naupang Sunday School-ah Department thar siam chu tha tih tlan a ni a, General  S.S Department-in a tul angin lo bawhzui se tih a ni.

    3.   Disable Sunday leh Orphanage Sunday uar zawka hman thu :
Hnuchhamte leh Rualban lote enkawlna  kawnga chak zawka  hmalak a nih theihnan General lam atanga chak zawka hmalak nise tih sawiho a ni a, tha tih
tlan a ni. Tin, Orphanage Sunday-a  orphanage pual thilpek LAD-te lak khawm
hi Local LAD-in District LAD-ah, District LAD-in General  LAD-ah, General LAD-in Kohhranpui General Treasurer-ah thehlut thin se kan ti.

    4. Television-a Programme/ Channel lei thu : Executive Board thu bawhzuilai a niin hma la tura ruat Media Cell-ten an hmalakna report an thehluh chu sawiho a ni a, kar khata darkar 1 emaw TV programme neih dan kawng zawn chu tha tih tlan a ni a, mawhphurtuten lo bawhzui zel se tih a ni.

    5. BSI-in revised edition buatsaih an tum chungchanga kohhran a rawnna chungchang : Bible Society of India-in Mizo Bible Revised Edition buatsaih an tum chungchanga kohhrante a rawnna thu sawiho a ni a, Revised Edition buatsaih chu tha tih a ni a; amaherawhchu English Bible behchhan bik neih ni se, he thu hi BSI-ah thlen ni se kan ti.

    6. Thawktute service tihngheh chungchang : He thu hi ngun taka sawiho a nia, heng a hnuaia kan thawktu hrang hrang te hi July 1,2015 atang effect tura tihngheh ( regularise) ni se tih a ni.
    i) Sis. PC Lalromawii - Mission Veng, Aizawl - Seller
    ii) Sis. Lalrosangi - Zemabawk, Aizawl - Binder
    b) Principal Susane Downs Boarding School, Kolasib Khuangpuilam atan tuna Principal thawk lai Evan. VL Zarzoliana Sailo chu tihngheh  ni se kan ti. July 1,2015-ah General Superintendent hnenah ziaka joining report pein hna an zawm ang.

    7. Dan ennawn chungchang :
Inneihna dan chungchanga Constitution Article 8 Section 34(5) ‘ Inneihna
thianghlim tlin lo, inngaihna suala lo tlu tawhte leh lo inru hmasate tan
inneihna lehkha tar emaw lehkha tar aia hriattirna puanga inneih hi phal a
ni lo’, tih hi ennawn ni se tih chu sawiho a ni a, tha tih tlan niin,
General Conference-ah amend tura thlen ni se tih a ni. Hetiangin – Hetianga lo chesual tawhte hi kum 1 ( thla 12) a vei hnu-ah hming hliauna nei lo leh Kohhran mit tikhama an awm loh chuan kohhranin lehkha tara inneih a phalsak thei ang - tiin. Tin, hemi hma pawh hian a mamawh an awm chuan a tul angin District Board-in lo relsak mai se tha tih a ni bawk.

    Chairman Rev. V.L Dika Sailo chuan Executive Board-a a tel tawpna a nih tawh dawn avanga thuchah hetiangin a sawi -
1) NEI UPC-in kan nunpui tur chu Remna leh Thianghlimna a ni a, hemi
tibawrhbang thei thil chu i do tlat zel ang u.
2) NEI UPC hi huap zo kohhran a nih angin inpumkhatna tha i zawng fo ang u.
3) Patling rilru puin mahni intar lang hmasa lovin mi dang i dah hmasa thin ang u.
4) Executive Board zahawmna vawng reng ila,  member-te pawh nun dan zahawm takin i nung fo ang u.
5) Lalpan NEI UPC kaihruai zel se la, Executive Board Lalpan malsawm zel rawh se.
6) Min rawn tawngtaipui fo thin dawn nia, tiin.

********************

Juniper Editorial (5 July 2015)

JUNIPER EDITORIAL

Mi tana malsawmna...

Mizo ten rualbanlo kan tihte hi sap ho leh hnam changkang zawkte chuan an lo ngaihsakin, an hamthatna turte an lo ngaihtuah nasa em em a, tin, mi changkang apiangin anmahni support a, tanpui nachang an hre thin. 

Hnam naupang tih takah Mizo-te hi chuan rualbanlote hmuhsit leh diriam mai kan chin lohna hi ala rei lemlo hle a, thenkhat mawl fal leh zirtirna dawng tlem deuh chuan hmuhsit a, chhaih nawmnah mai ching tawk pawh an la awm nawk mai.

Hnampui leh fing zawk chuan an koh danah pawh an fimkhur a, an duhsak em em a, ‘Disabled’ ti a an koh pawh thlak tumin ‘Differently Abled’ - ‘Theih dan danglam bik’ tiin an lo sawi zawk thin a ni.

Rualbanlote enkawl dan leh hmuhsit leh chhawnchhaih chungchangah pawh Mizo-te hian hma kan sawn nasa hle a, mi changkang, hawizau deuh chin leh zirtirna dawng tha chin hi chuan hmuhsit leh chhawnchhaih ai chuan anmahni theih ang ang a support an lo ching ta zawk a, a lawmawm hle mai.

Kan Kohhran pawhin hetiang kawnga hma kan la a, An Puala Sunday-te kan han nei thei hi a lawmawm a, hei hian rah tha chhuah sela, chu chuan kan kohhran hmel mawia mai aiin kan Mihringpui, Pathianin duh leh hmangaih taka a siamte tan hian nun hahdam leh thlamuanthlak a siam ang a, an tan khawvel hi a lo nuam sawt dawn a lo ni.

An taksa leh rilru a harsatna nasa tak an tawh hi an tan chuan a hrehawm tawk a, an hrehawmna tizualtu ni lovin a chhawk zangkhai tu nih i tum theuh zawk ang u.

*********************************

RUALBANLO - Evan. P. C. Lalrokima (Juniper Article 5 July 2015)

JUNIPER ARTICLE

RUALBANLO

(Rualbanlo Sunday 1st Sunday of July, JULY 5, 2015 pualin)

 - Evan. P. C. Lalrokima

A awmzia:

Rualbanlo (disable/disability) han tih hian mitdelna (blindness), khawhmuh fiah lo(6/24 aia chhia) (low vision), Bengngawng (hearing impairment), Rilru lama rualbanlo (mental retardation), Rilru natna(mental illness), Phar dam leh (leprosy-cured), leh ruh leh taksaa rualbanlo (locomotor disability) sawina ni ber a. Doctor(certified medical officer) in kawng hrang hranga a en hnua a a chunga kan sawi ang taksa/rilru lama harsatna 40% (zaa sawmli) aia sang an neih chuan RUALBANLO tia pawm a ni, hemi aia hniam te chu rualbanlo an ni ve lo.

Pathian thu atanga thlirna:

Taksa, rilrua fel lo leh dik lo, rualbanlohna hi pian tirh atang renga awm theih a nih rualin pian tirha rualbanlohna awm si lovin vanduai vang emaw chhan eng emaw vangin a hnuah rualbanlohna hi a awm thei bawk. Bible (Thuthlung thar)ah pawh Lal Isua khawvela a len lai niah mitdel te, bengngawng tawngtheilo te, phar te, piangsualte awmin a tidam tih kan hmu. Khawvel hmun hrang hrangah hian pianphunga harsatna nei hi mi tam tak an awm a ni.

Pathianin mihring hi chhan neiin a siam a; Johana 9:3 ah Lal Isuan pian tirh ata mitdel a tihdam khan, kha mitdelna kha Pathian hnathawh a chung a lanna tur a nih thu a sawi kan hmu anih kha. Mitdelna, bengngawnna, rilru lam fel lohna leh pianphunga harsatnate hi a tawngtu tan leh, a tawngtu nu leh pa, u leh nau, pi leh pute tan chuan hriatthiam a har thin hle ang. Nimahsela, Pathian remruatah a tel ve a ni tia zaka indawm kun emaw thinrima Pathian hnena vui mai lovin Pathian ropuina puanchhuahna leh Pathian hnathawh kawng eng emaw ti taka a lanchhuahna tura chung lam remruat a nih hi rina pawm thiam a ngai hle. Exodus 4:11-ah “ Mihring ka hi tu siam nge ni a, tawngtheilo te, bengngawng te, mitvar te, mitdel te pawh hi tu tih nge ni? Kei LALPA hian a ni lo vem ni? tiin Pathianin Mosia hnenah a sawi a. Mihring pianphunga rual kan ban lohna hi pian tirh atang emaw chhan eng emaw vang leh vanduai vang liau liau pawh ni se Pathian remruatna hnuaia awm leh thleng a ni tih hi ringtuten kan hriat fo a tul hle.

Kohhran hian engtin nge hma kan lak ve ang?

Rualbanlote hi kohhran leh khawtlang mipuite hian engtinnge kan thlir a? Engtin nge an chunga rilru kan put thin? Mi tam tak chuan anmahni leh an chanchin zir leh hriat tumna nei lemlovin ngaihdan siam sa kan nei a – mi danglam, mi mak sak, vanduai ve reng, chhawnchhaiha biak chhawhchhi awm lek, min tihlimtu(entertainer) ang leka enin nuihzat enin kan en ngai em? Tunlai tawng takin an chhung leh khatte hmuh phak lohah chuan ‘bawl’ berah kan hmang thin em?

Rualbanlo te hi kan chhungkuaah an awm ve lo a nih chuan hriatthiam pawh a harsa mai thei e. Engpawhnise, khawtlang/Kohhran mipuite hian hengte hi kan hriat reng a pawimawh:

(1) Rualbanlote hi Pathianin duh taka a siamte an ni

(2) Rualbanlote Biak in, puipunna leh khawlaiahte midang ang bawka tel ve turin dikna leh chanvo an nei.

(3) An harsatnaah hmuhsita endawngtu nilovin an mamawh tihsaka phuhru tu, an hmasawnna kawng dap saktu kan ni thei.

(4) ‘Mi ang lo’ tia kan nuihsawh rualin tumah mi ang kan awm lo. Tumah hi kan inang lo, kan hmel, kan rilru puthmang leh tihtheih zawng pawh a inang vek bik lo.

Rualbanlote hmasawnna tur hian sawrkar lam chuan a tih theih ang ang tiin hma a la mek zel a, an chanvo humhalh kawngahte, an zir theihna turte, eizawnna an dap theih tur te, an zin veivahnaa tanpui dan tur leh hmanraw mamawh leh an kalkawng tur thlenga ngaihtuahin dan (Act) bik thlengin a siam a. Rualbanlote an mahni phak tawk theuhah midangte tan phurtir nilova an kea an din ve theihna turin sawrkarin hma a la mek zel a. Hetih lai hian nang leh kei, khawtlang leh kohhran mipui, rualbanlo te chhungte hian engnge kan tih ve tur ni ang? Heti hian rilru siamin ke pen dawn the ang:

(1) An theihna (capabilities) zawnchhuah a, kan rim ngam a kan puih (support) a tul

An tih theihloh hmuh sak aiin an tih theih zawk kha hmuhsak a tul.

(2) Kan tu fate emaw a tuartute hian zak mai lovin kan nihna kan pawm thlap a tul a. Zah avanga Biak in leh puipunna hmuna kal loh, hruai tam lohah tlak lovin Hmasawn tura ke penin mi dangte nun ang zawm ve turin kan pui tur a ni.

(3) Hmasawn thei an ni tih kan pawm a chu lamah chuan fuiha tanpui tur.

(4) An chanvo (rights) humhalhpuitu nih tur

(5) Kan zingah thlamuang taka na tel theih nan thinlung, tawngka leh cheziaah anmahni kan tel tir a pawimawh

(6) Sum leh pai, kan kut, kan ke, kan tawngkam leh theihna hrang hrangin an tan malsawmna kan ni thei. Vawi khat mai ni lo vawi tam tak malsawmna nih hi a tha lehzual em!

(7) Keimahniin tihtheih kan nei tam lo anih pawhin sawrkar lama an hamthatna awm te kawhhmuha haichhuahpuitu kan ni thei.

(8) Kohhranah tam zawka an tal theihnan kawng kan hawn a pawimawh: Entirnan – Biak in leh quarters sakah ‘ramp’ (wheel chair-a kalna) siam sak te, Sunday school zirna kawngah mitdel leh khawhmuh fiahlo te tana zir ve tur siam te, bengngawng leh tawngtheilote hriat thiam ve tur zirbu buatsaih sak te, thalai thiltih nikhua leh a hlimawm lam programme-ah an tel ve theihna tura hun siam thiam te, Pathian chhandamna mamawh tho an nih avangin an taksa mai bakah an thlarau chhanhim a nih theih nana a theih ang kawng kawnga hmalak dan dap chhuahte, sunday school intihsiak thlenga ngaihngam tak leh lungsi taka an phak tawk an chhuah ve theihna tur atana intihsiakna boruak rit lutuk paih te thlengin kan siam thiam a pawimawh hle.

Heng bakah pawh hian kohhran leh chhungkua dinhmun a zirin rualbanlote enkawl leh dawmkanna tur, an tana kawng sialsakna leh an tana ke penna tur tam tak a la awm thei ang.

Kan hmaa mihuai kalte kha!

Beidawng suh! I taksaah rualbanlohna a awm maw? I chhung leh khat, i u leh nau, i tu leh fate zingah rualbanlo an awm maw? Eng ngatinge zaka i kimki deuh em ni? He dinhmuna ding hi mi tam tak an awm a, huaisen taka hmachhawntute chuan khawvel hi an hneh thin asin! Khawvel milar sawi zinga hmaih hauh loh tur Helen Keller kha mitdel bengngawng a ni a. Nimahsela, lehkhabu 14 lai ziakin article tam tak a ziak bawk. Scientist ropui Stephen Hawkins hi a puitlin hnuah rualbanlo a ni. Kum 21 a tlin hnu lawk 1963 khan natna khirh tak, hriatna thazam khawih chhe chi ALS (Amytrotic Lateral Sclerosis) a vei a. A natna avangin wheelchair-a nawr ngai a lo ni ta a, computer hmang chauha tawngthei a ni zawm leh bawk a. Mahse, khawl hmanga tawngin lecture pek a thulh chuang hauh lo! Khawvel scientist ropui berte zinga mi niin a lehkhabu ‘A brief History of Time” chu science khawvelah ngaihsan hlawh tak a ni. Greek miffing leh hla phuah thiam, epic poem ropui berte zinga mi The Iliad and The Odyssey phuahtu Homer kha mitdel a ni asin.

Chumai a la ni lo, English poet lar John Milton pawh kha kum 43 a nih hnuah a mit a del a, hla phuah leh thuziah a bansan chuang hauh lo. ‘Paradise lost’ pawh hi a mitdel hnua a ziah a ni. German hlaphuahtu ropui Beethoven pawh kha kum 28 anihin a beng a ngawng a, mahse hla phuah a thulh chuang hauh lo. Kristian hla tha leh sak hlawh tak tak ‘Ni ai pawhin I eng zawk e’, ‘Aw sualthim lungngaihthlak tak hian’, ‘ Isua hnenah ka him ang’ tihte phuahtu Fanny J Crossby hi thla 2 mi lek a nih laia mit del a ni a. Nikhua a lo hriat hnuah pawh a mitdel vangin vawi khatmah a vui lo. Kristian hla 9,000 zet a phuah asin!

Tlangkawmna:

Genesis 1:31 ah chuan ‘Pathianin a thil siam tha a ti hle si a..’ tih kan hmuh angin rualbanlote hi Pathian siam leh dinte an ni. Pathianin duhtaka a dinte hi hmuhsita nuihsawh emaw hi ringtu nihna nen a inhmeh lo. Rualbanlohna hi thenawm leh midangte ta a ni bik lo va, nang leh kei hi zan khar thilah pawh rualbanlo kan ni thei, kan zavaia ta a ni. Hawh u, kan mawhphurhna hre thar ila, an tan ke penin an tan malsawmna nih i tum zel ang u khai; ‘heng mite ber chunga ti chu ka chunga ti in ni’ titu Lal Isua zuitute kan nih hi! 

**************************

JUNIPER: ISSUE NO. 27 ;5th JULY, 2015

RUALBANLO SUNDAY 

UPC kohhran rorelna sang ber General Conference- thurel angin kum tin July Pathianni hmasa ber hi “Rualbanlo Sunday” atana hman thin a ni a. Kumin 2015 hian July 05, Pathianni hi hman tur a ni. He ni hian Rualbanlote puala thawhlawm lakkhawm a ni ang a, District kaltlangin General Headquarters-ah thehluh tur a ni. He ni hi India hmarchhak pumpuiah hman tur niin local tin ten Rualbanlo puala hun siamin thuchah pawh he lam hawi vek hi sawi tur a ni. Local tina chhiar chhuah turin General Headquarters Office atangin Rualbanlo pual Thuchah pawh chhuah a ni bawk. 

Bethlehem Local pawhin vawiin Pathianni zan inkhawmah hian Rualbanlo Sunday Pual hian hun a hmang ang.

*******************************

PYD IN SOCIAL WORK DAY HMANG 

June 30, Thawhlehni kha UPC Kohhran thalai pawl Pentecostal Youth Department-in North East India pum huapa Social work day atana a hmang ni a ni a, Kohhran thalai local hrang hrang a mi ten he hun hi khawtlang tana thil tha tih hun atan tangkai takin an hmang hlawm a ni.

Bethlehem Local PYD pawhin Bethlehem leh AR Rama thingphunna hmun samfaiin hun an hmang a, thawkchhuak pawh an tha thawkhat hle.

“SOCIAL WORK DAY” hi Kum tin North East India huam chhunga District, bial leh tualchhung PYD te chuan vantlang tana hna tha thawhna ni atan an hmang thin a. Kumin Social Work Day hian Aizawl khawpui chhungah chuan City PYD bul tumin Aizawl Civil Hospital, Cancer Khualbuk leh Cancer Hospital (Zemabawk) ah te damlo leh thawktute tan eitur an sem bakah Rajiv Ghandhi Stadium tihfai  hna an thawk a, vantlang tan Ngaizel-hmuna zun in an siam chu thawm that a ni. City PYD ruahman angin khawpui chhung leh pawn hmun pawimawh laiah  bial hrang hrang ten thingphun hnatlang an nei a, Lunglei District lamah pawh Tlawng lui leh a chhehvelah thinphun hnatlang an nei bawk. Thingtlang bial tam zawk chuan khawchhung, zun in leh hmun pawimawh tihfai nan an hmang.

Mizoram pawn lam Meghalaya, Assam leh Manipur te pawhin Social Work Day hi an hmang a, Central District Shillong pawhin Kohhran thlanmual sam fai hnatlang an nei bawk.

*********************************

BIAL PYD CRUSADE HMAN A NI

Kar kalta Dt. 24th_ 26th June 2015 khan Bethlehem Bial PYD te chuan Bethlehem Vengthlang Kohhran biakinah Crusade an hmang a, he Crusade ah hian speaker atan Evan. Lalbiaktluanga chu hman a ni a, Kohhran thalaiten an hlawkpui hle a ni. Tin, Ni 26th Chawlhni chawhnu inkhawm banah mual inkhawm Bethlehem Vengthlang kawnah an nei bawk a ni.

****************************

BIAL PYD KUMPUAN COMMITTEE NEWS

Bial PYD Kumpuan Sub-Committee te chuan Dt.6th July Thawhtan zan hian Bethlehem Vengthlang Biakinah Bial tlawh chhuah programme an hmang dawn a, hemi hun ah hian kal theuh turin PYD memberte min ngen a ni. Inkhawm Programme chu hetiang hi a ni ang ;-

Chairman  : Bro. Lalhlimpuia

                              Bial PYD Kumpuan

     Committee Chairman

Tantu     : Bro. John Sangzuala

Thuhriltu    : Bro. Varhlunkima

*************************

PYD HALF YEAR AUDIT & HALF YEAR REPORT

Kum tina neih thin angin PYD Kum chanve sum Audit chu Dt. 6. July 2015, Thawhtan Zan inkhawm ban hian neih tur a ni a, Group leh Sub-Committee hrang hrangte lo inbuatsaiha lo inpeih vek turin hruaituten min ngen a ni.

Tin, Half Year report pawh Dt. 13 July 2015, Thawhtan Zan inkhawm-ah neih a ni bawk ang.

************************

Aizawl East District news

OTS Graduation Day hmang dawn: 

Aizawl East District hnuaia Short Term Course Bible Zirna Oneness Theological Seminary (OTS) chuan Kum 2015 Session atan Graduation Day Dt 5.July.2015, Pathianni hian District Conference Hall-ah an hmang dawn. He hun hi Principal Rev Pc.Lalnghakliana chuan kaihhruai hna a thawk anga, Khuallian atan Pstor C.Malsawmzela, Lecturer CBC chu hman a ni ang. Khuallian hian Graduate te hi Confer na a nei nghal dawn a ni. Thusawi Rev VL Dika Sailo, General Superintendent, Rev HL Dawngliana, Lecturer OTS leh Rev C.Lalrammuana, N.Mizoram District Superintendent te hnen atang ngaihthlak a ni anga, Graduate te Present hlanna Rev R.Lalrinsanga, General Treasurer leh Rev R.Lianzama, Lecturer OTS te an nei bawk ang. Zirlai Graduate te aiawhin Bro C.Lalchhuanga’n thusawi na a nei bawk ang. He hun hmang tur hian Aizawl chhunga Bial hrang hrang te sawm an ni bawk a ni.

Oneness Theological Seminary hi Kum 1998 khan din tan niin,Certificate in Theology (C.Th) a pe chhuak a, UPC-N.E India-in Pathian thu zirna a neih Calvary Bible College (CBC), Shillong-a in affiliate niin OTS atang hian zirlai thahnem takin lo Pass chuak tawhin tunah hian rawngbawl turin an chhuak mek a ni. Kuminah hian zirlai 10 te chuan thataka Pass chhuakin an Graduate dawn a ni.

District PYD Dt 26.June.2015, Zirtawpni-ah Kum chanve Board rorel tlangpui te:

1. NEI PYD Logo kan hman lai hi a inang vek hman a nih theih nan hmalak ni se tih chu General Board-ah thlen tura tih a ni. (Eg: Pentecostal tih tur Penticostal tia inziak)

2. General Target belhna Rs 20,000 chu Bial tinah sem a a ni.

3.District PYD-in Daido hmunah Missionary Evan H.Lalbiakzauva chu a ruai mek a, Missionary pual hian Thla tin Thawhtanni hmasaber (PYD Inkhawm Zan)-ah tawngtaina neih thin ni se, Bial leh Tualchhung remchang apiangten tanpuina pek emaw tlawh thin ni se, tlawh tur te chuan District PYD OB te hriattie thin ni se tih a ni.

4. Kum 2017 District PYD Khawmpui chu Khawlian Bial-ah nghah ni se tih a ni. Harsatna a awm a nih chuan Zohmun Bial-ah nghah ni se tih a ni bawk.

Thawhlawm Uar Ni: Dt 5.July, Pathianni hi Aizawl East District chhunga Sunday School thawhlawm uar ni a ni a, he hunah hian District S.S Hruaitute chuan thawhlawm uar taka thawh turin Kohhran mipuite min ngen a ni.

District Board nei dawn: Aizawl East District hnuaia rorelna sang District Board nithum awh tur chu Dt 7-9.July 2015 chhung hian District Committee room-ah neih a ni dawn. He hunah hian thu pawimawh tak tak rel tura chhawpchhuah a ni ang.

***************************