KAN FATE I CHHANHIM ANG U

                                    Upa K. Lalbiakthanga

        Awle, Kan Sunday School Kumpuan hi ngaihtuah chian chuan a tulin a lo pawimawh hle a ni tih kan tunlai hunah hian a lo langin ka hria. Khawvel sualna sang zelah kan fate chhanhim turin nu leh paten mawh kan phur nasa hle in ka hria.

        Bible a kan entawn tur pahnih han tarlang ila:-
1. Nova: Ani chuan amah mai ni lovin a chhungte tan Lawng a tuk a, mite hmuhsit leh nuihsan pawi sa lovin Lalpa’n a hnena thu a sawi chu ring tlatin amah leh a chhungte chhanhim nan Lawng a tuk ngat ngat a, a fate a chhanhim a ni.

2. Joba: Fapa pasarih leh fanu pathum a nei a, a fate tan zing takah thovin an za a hming kimin inthawina a hlan thin. Keini fapa pakhat pawh kan buaipui a ni sia, theihtawp kan chhuah ava ngai em...

        Tin, tunlai khawvel changkannain a ken tel, tunlai Technology ina kan nun a tha lo zawng a a nghawng dan Research Team-ten an hmuhchhuah dante tlem a zawng lo tarlang bawk i la. Question hi zirlai 1919 in an chhang a, Kum 10-15 mi 207 in an chhang a, kum 15 chunglam mi 1430 ten an chhanna atanga mihring nun a nghawng dan tlem en ila:-

1. Mobile Phone:- Mobile phone hi thalaite zingah 99% (za a sawmkua pakua) in kan hmang a, hei  hian kan mut hun leh thawh hun min sawn sak dawr mai a, zan menrei phah nan kan hmang a, zingah lah kan tho thei ta lo!

2. Computer: Nitina hmang 70% (za a sawmsarih) awmin an chhut a, a tha lo zawnga nun a hruai dan an chhutin, “Sex lamah mi kai harh a ni” ti hi 84% (za a sawmriat pali) an awm anti. Tin, incheina kawngah pawh kan nun a hruai peng a ni tih hi 93% (Za a sawmkua pathum) an awm a ni, sawi tur tam tak a la awm e.

        Heng T.V en leh Computer Games khelh vangin kan fate nunphung a danglam nasa em em a, hengahte hian kan fate kan chhanhim ava tul tehlul em! Bul tan tha leh ang u hmiang? Fanaute hi Lalpa laka kan ro chante an ni si a. Nu leh pate hian T.V en hun leh Computer games khelh hun bite siam sak ila, Biak In lam hruai thlen tumin, Kohhrante pawn an puala chanvo siam sak dante ngaihtuah a, ruahmanna kan siamte a va tul em.

        A tawp berah chuan kan fate hi thuthlungah i chhanhim ang u, tichuan, khawvel sualna lakah pawh an him ngei ang. Kan fate i chhanhim ang u.

 

*************************

       

Juniper Editorial, 26 July 2015

 JUNIPER EDITORIAL

Eng angin nge miten min hriatreng ang??

 
Kan kohhran tana mi hmasa leh thlarau hmahruaitu leh Bethlehem Veng hming phuahtu Pu Zikpuia chu kan lo chan ta reng mai. A uiawmin mite thinlungah pawh nasa takin hmun a chang thar leh tih kan hre theuh awm e. Mihring lama thlir chuan dinhmun sang leh chhuan tur engmah a nei bik chuang lo, amaerawhchu mite thinlungah hna nasa takin a thawk a, a vuina hun pawh minaran leh mi tam zawk chan phak loh, programme danglam bik leh ropui takin YMA Hall ah buatsaih a ni a, a phu hle a ni tih chu mitin ngaihdan a ni.

Engvanga chuti taka ropui bik chu nge anih tak? A dam laia a thiltih leh Pathian taka a inpekna vang chauh a ni. Khawvel ropuina chhuan tur neilo mahse, a neih rohlu Pathian’in a chawimawi ve thung a ni.

Mitin hi he khawvel atanga la kalchhuak vek tur kan ni a, kan kalve hunah miten eng angin nge min ngaih ang a? Engtin nge min hriatreng ang?A hriltu tur chu midangte bula kan nundan leh mite tana kan inpekna leh Pathian tana kan thawh danin ala hril dawn a ni. Chawimawi leh ropui taka invui liam chu mitinten duh vek mah ila, kan damlaia kan nundan in a zir miau loh chuan duh eng ang mah ila, kan dawng pha dawn chuang lova, Pu Zikpuia pawh a boral tak avanga ropui nilovin a damlaia a inpekna leh a thiltih avanga ropui a ni zawk.

“Tun hun” hi kan thilneiha hluber a ni a, kan nakin hun hril tur leh kan hun liamtawh siamtha thei om chhun a ni, chuvangin tun hun hi hmang tha ila tichuan miten tha takin min hrereng dawn a ni.

JUNIPER ISSUE NO. 30 ; 26th JULY, 2015

ROPUI TAKIN PU ZIKPUIA THLAHLIAM A NI

Bethlehem Veng leh Bethlehem UPC Kohhran tana mi pawimawh leh thahnemngai Pu Zikpuia chu Dt. 24 July 2015 khan ropui takin Bethlehem YMA Hall ah thlahliam a ni.

Pu Zikpuia, a hmingpum Rozikpuia hi August 1929 khan Kepran khuaah a piang a, tichuan kum 1948-ah Aizawl-ah lo chhuk thla in a theih ang angin a inbengbel a, tichuan kum 1960 a lo herliam dawnah chuan Krismas-te lawmin lengkhawm an hlim hle mai a, hemi tum hian thlarau lam hriattirna a dawn angin Pu Zikpuia thupuan atang chuan Bethlehem Veng tih hming hi a lo piang ta ni.

Kohhran tan pawh Pu Zikpuia hi mi tangkai leh thlarau hma hruaitu a ni a, inkhawm taima leh lam taima em em a ni a, thlarau pawlna changin hlim takin Pathian fakin a zaiin a lam thin a ni.

Vanduaithlak takin Kum 2012 khan motor-in a su hlauh mai a, chuta tang chuan a bawksawp tana, damdawiin lamahte inenkawl chho in theih tawp an chhuah a amaherawhchu a dinhmunin that lam a pan theih tak loh avangin in lamah an inenkawl chhunzawm ta zawk a, tichuan zawi zawia hniam chhovin July ni 23, 2015 zan dar 10:00 khan a fak nin loh, a Pathian hnena chatuana chawl turin a kal ta a ni.

Amah thlahna hun hi Dt. 23 July 2015, chhun dar 12:00 khan  Bethlehem Veng YMA Hall-ah ropui taka buatsaih a ni a, Rev. Ramtharpara, Bialtu Pastor-in vuiin, Ama hming phuah ngei Bethlehem Veng thlamnualah a ruang hi thlamuang takin zalh a ni.

Bethlehem Kohhran mihlun leh thlarau mi, zai leh lama Pathian fak taima a boral ta mai hi, Bethlehem Kohhran tan chuan channa nasa tak a ni a, Bethlehem UPC Kohhran din chhung chu a hming hi a dai tawh ngai lovang. 

***********************

VAWIINAH MUAL INKHAWM

    Vawiin Dt.25 July 2015, chawhnu inkhawm ban Dar. 3:30 hian Bethlehem Veng Dawrkawn-ah Mission Department buatsaihin Mual Inkhawm buatsaih a ni dawn a, hetiang  hun hi buatsaih zen zen anih loh avangin kohhran member tinten ngai pawimawh ila, theihtawp chhuahin kal theuh i tum ang u. Sunday School Naupang zawng zawng pawh kal vek turin hruaituten min sawm a ni.

    He hun hi Evan Lalchhuanmawia Zote in a kaihruai ang a, Evan Robert Lalrinsanga’n Pathian thuchah a sawi dawn a ni.

    Hetiang hun hi kan kohhran hmel lanna a nih dawn avangin kan intawiawm thalo anih chuan kohhran mualphona a ni thei a, chuvangin Kohhran member tam thei ang ber kal i tum ang u.

RT PHUNGA GROUP NEWS

RT Phunga group-te chu Dt.21 July 2015, Thawhlehni Zan khan Sahbawn tui siamin an Fin.Secretary SIs Lalnunthari-te inah an hnatlang a, an thilsiam hi tun atanga reilote ah zawrhchhuah an tum a ni.

Sahbawn zuara hnatlang tur hian group member-te lo inring turin hruaituten min ngen a, hnatlang koh veleha thawkchhuak vek thei turin member-te kan lo inbuatsaih dawn nia. 

*****************************

BIAL SUNDAY SCHOOL BOARD ROREL

District Sunday School Kumpuan atanga lehkha lo lut angin, “Kan fate i chhanhim ang u” tih a hlawhtlin nan Dt. 2.8.2015, Pathianni chawhma inkhawm chu ruatin Programme pawh hetiang hian duan nghal a ni:-

Chairman        : Director, Puitling Sunday School
Hla sak ho        : Nangma thil ropuite an sawi
Tawngtai rual        :
      1) Sunday School kal theilote an kal theih nan.
      2) Ruihhlo bawiha tang ten Isua an hmuha, am sim theihnan.
      3) Kan faten thlarauva siamtharna Lalpan dawn tir turin.

Hminglamna leh thawhlawm khawnna
    Solo & Zaipawl    : A theih chuan
    Thusawi        : Bial Board ruat atangin
    Bible chhiar tur    :
        Exodus 10:9, Sam 127:3-5, Ephesi 6:1-2
    Report            : Secretary
    Hla sak ho        : Isu i thu ka ngaihtuahin
    Banna

He mi huna thu sawi tur hian heng mite hi ruat an ni:
    Bethlehem    :
        PTSS - Evan Lalramzauva
        NPSS - Bro. Laltlanlawma
    Bethlehem Vengthlang    :
        PTSS - Upa K. Lalbiakthanga
        NPSS - Bro. K. Liansanga
    Hermon :
        PTSS - Bro. Lalfelkima
        NPSS - Bro. F.L Ramchullova

2. Bial Sunday School Conference Agenda nei tur tan August ni 30, 2015 thleng thehluh theih a ni.

3. Conference chhunga zai hruaitu tur chu Bethlehem Local lamin ngaihtuah ni se.

4. Dt. 28.7.2015, Thawhleh zan dar 7:00 ah, Pastor Quarters Committee Room-ah Bial Board neih leh tur a ni ang.

5. Bial Sunday School Conference Recording Secretary atan Bro. JH Lalhuansiama ruat a ni.

6. Bial Sunday School Conference Quiz Masters atan a lian pawl ah Bro. Lawmsangkima leh A Te pawlah Sis. K. Lalthawmmawii -te chu ruat nghal an ni.

*****************************

GENERAL SUNDAY SCHOOL DEPARTMENT EXECUTIVE BOARD MEETING NEIH A NI

    July 20, Thawhtannni khan UPC Kohhran Sunday School Department Executive Board meeting chu General Director Office, Mualpui Salem vengah neih a ni.

    He meeting ah hian kohhran rorelna sang ber General Conference meeting-in Department thar a siam Doctrinal Department chungchang ngaihtuah a ni a, Doctrinal Department hi Puitling Sunday School Department-ah telh ni se tih niin an zirlaibu ziaktu tur pawh ruat nghal a ni.

    Tin, General Sunday School Department kumpuan "Kan fate i chhanhim ang u" tih bawhzuinan kumpuan thupuia hmangin Hla inphuahsiak leh Article in ziak siak ni se, kumin 2015 ral hmain General Sunday School hruaitute hnenah thehluh tur a ni.

    Kumin budget kal lai thlir ho a ni a, sum pawh a lut tha hle. Tin, General Sunday School Budget session-Kum tawp board chu October 29, Ninganiah Kohima, Nagaland-a neih tura tih a ni bawk. Meeting hi Rev. R. Laichhingpuia, General Director chuan a kaihruai a ni. 

***********************

UPC(NEI) WEBSITE HACK A NI

North East India UPC-ten kan official website upcnei.org chu July 24, Friday atang atang khan hman theihlohvin tunlaia buaina siam tuma sakhaw hrang hrang nasa taka bei mektu Islam sakhua mi tehnkhat ten an hack a, engemaw chen chu a function thei dawn lo a ni. A siamthat hna hi kalpui mek a ni. Kohhran dangte pawhin an tlawh leh kan kohhran chungchang an lakna sources pawimawh tak a nih avang leh North East India pum huap a nih avangin ram dang hla tak tak atang te pawhin NEI UPC-te min rawn contact.na pawimawh tak a ni a, mi engemaw zatin harsatna an tawh phah rin a ni.

*******************

Juniper Editorial 12 July 2015

Tanpuitu..

Tunlaiin thalai zingah mahni nunnla la a, inthat tam tak an awm tih kan hria a, Mizoram ah pawh heti zat an awm chuan khawvel pumah phei chuan tam tak an awm ang tih a rin theih mai awm e.

Mahni inthatte hi an khawngaihthlak a, rilru na leh rilru hah avanga inthatte phei hi chu an lainatawm lehzual takzet a ni. Depression neih hi thil har tak a ni lem lo a, tihdam erawh har leh buaithlak tak a ni. Miin depression a neih tawh chuan a khawvel hi a thim a, a hmalam hunah beiseina reng reng a nei tawh ngai lova, chu beidawnna chuan a vawrtawp a thlen chuan mahni nunna hial pawh an la ta mai thin a ni.

Kristian tan chuan Depression neih hi thil awm lo tak ni mahse, a thleng ve miau bawk si a, chuvangchuan mitin hian eng emaw chenah mawhphurhna kan nei a ni. Kan vela mite, kan thiante hian a rukin Depression an lo nei reng em?? An rilru hahna pawh hrilh ngamlohna kan ni em? An rilru hahna chhawk zangkhaitu nge kan niha tih zualsak tu.

Mahni theuh kan inenchian a ngai hle mai. Miten an harsatna kan bula an sawia, lo uanpui emaw, lo nuihsan mai hi thil chindan thalo tak a ni a, chutiang tih ching mi kan nih chuan kan bulah miin a harsatna a sawi ngam ngai dawnlo a ni.

Miten an harsatna min hrilh hian kan puihna tam tak an phut kher lo a, kan ngaihthlaksak a, kan tawrhpuina kan lantir hi rilru hah hnem nan leh nunna chhan nan a tawk em em a ni.

******************

KRISTA MO - Evan.Lalchhuanmawia Zote (Juniper Article 12 July 2015)

JUNIPER SERMON

KRISTA MO

2Korinth 11:2 ,Thupuan 19:7

Evan.Lalchhuanmawia Zote

    “Hlim takin awm ila, Amah i chawimawi ang u.Beramno nupui neih chu a hun ta si a.” (Thup 19:7 ). “Pathian thikna in asin ka thik che u ni; Krista hnenah chuan nula thianghlim anga ka pek theihna tur che u in, pasal pakhat ka hualsak si che u a.” (2Korinth 11:2)

    Kohran hi Krista mo tur (a nupui tur) kan ti thin a, anih dan leh a pawimawhna in zir ho teh ang u.

    Adama nupui atan hmeichhia a pe. (Gen 2:18-24) : Pathianin Adama chu amah chauh a awm tha a ti lova, a kawppui tur mi zawnsak a tum a, rannung tinte chu Adama hmaah a rawn hruai a, mahse chung zingah chuan a kawppui awm mi an awm loh avangin Lalpa Pathian chuan Adama chu tui takin a muthilh tir a, a nakruh pakhat a la a, chumi ai chu tisa in a awh phui tir leh a, a nakruh chu hmeichhiaah a siam a, Adama hnenah a rawn hruai a. A lung a awi hle ni tur a ni, “Heizet chu ka ruh ang ruh nei, ka tisa ang tisa nei ngei chu a ni” a ti a, Adama nupui tur chu a nak atanga lakchhuaka buatsaih a ni ta a ni.
    Rom 5:14 ah Adama chu lokal tur (Isua)  nen tahkhinna a ni, a tul avangin enge an inanna sawi leh lawk ila, Isua naka tui leh thisen hmangin a nupui tur Kohhran ho min din a tum a ni.
    Pahian engkim siamtu chuan , Eden huana a pawl thinten thuthlungah awm reng lovin, eiloh tur atih tak chu an lo ei tak avangin Eden huan pawna hnawhchhuah te an ni, (Isaia 54:7) ah “Mitkhap kar lek ka ma che a, nimahsela, khawngaihna nasa takin k hruai leh dawn cehe a ni.” ati a. A nupuia min neih leh ngei a tum ta a, min rawn zawng turin lokal a tum ta a ni.

Krista’n a nupui tur a zawng:
    Phil 2:5 kan chhiar chuan van ropuiona thlahlel loin leiah a thilsiam te anga ron changin a lo kal a. Miten anlo duh lo a,  an hai a,an tiduhdah a, anlo vaw nek a, chil te an chhak a, tihel nan lal puan senduk te an sintir a, hling lukhum an khum tir a; Tuifinriatte siamtu chu a tui a hal a, a pe tu tur tumah an awmlo. Zu thur chu intir a ni, chu mai chu anilo, nasa taka  sawisain thing krossah an khengbet a, a nakah feiin an chhun zui bawk a, thih thlengin a nupui tur zawngin a tuar a, A thihchilh a ni.
    Adama atanga alo entir ang ngeiin Isua Krista pawhin Kalvari Kross-ah a nak atang ngeia thisen leh tui luanchhuah tirin, A mo(a nupui) turte hi a buatsaih a, Isua thisen ring a, a naka tui luangchhuaka inbualfai te hi Krista mo tur diktak kan ni.
    A nupui tur mo chu engtinge a inthuam ang: Isaiah 52:1 “Aw Zion harh la, harh la, i chakna inbel roh. Aw Jerusalem khawpui thianghlim i silhfen mawi takte chu inbel leh rawh, i chhungah an lut dawn silo.” Monu chu a neitu tur leh midangten monu anihzia an hriat theihnan mo thuam famkimin a inthuam thin a, tichuan amah hre ngailo pawn “Saw nu chu monu a ni maw?” anti thei thin a ni.
    Keini pawh Krista nupui tur kan nih avangin mo kawr kan lo ha ve tur a ni.Chu kan mo kawr chu (Galatia 3:27) “In zingah Krista Isuaa Baptisma chang apiangte chu Krista-ah chuan in inthuam toh si a” a tih avangin Baptisma kan chan hian Krista nupui tur silhfen kan lo inthuam tihna a ni.

    A nupui tur chu eng tikah nge a rawn hruai dawn kan hre silo a, a mo (mithianghlimte) lam turin reiloteah a lo kal dawn a, chutih hunah chuan hruai kan nih ve theih nan lo inbuatsaih ila, lawr zingah kan tel velo ang tih a hlauhawm alawm. Chuvangin kan inthuamna silhfentehi tibawlhhlawh lo ila, tibawrhbanglo ila, miten kan nun an chhiar pawn “Krista nupui tur a ni bawk a, a nun a mawi hle mai” an tih theih nan kan awm danah fimkhur ila, Chanchintha nena inmawi nunchang pu zel ang u. Hla siamtuin,
Ngairu mo neitu au aw
A lo thang mek chhum zingah
Tlanten an lawm hla nen hmuak se,
Hosanna tia au rualin
A tih angin a lo lang tep tawha ni.

    Krista chauh pasalah nei turin in buatsaih ila, zirtirna dangten min lo chim mahse, keini chuan Pathian dang rawngbawl lovin, milem be hek lovin, “Pathian pakhatah minung pathum a awm a, thlei bik nei lova, rin leh biak tur” tiin zirtirna rawn vawrh mahse, Pasal Pathum kan nei dawnlo, Krista chauh pasalah kan nei dawn a, Paula pawn pasal pakhat chauh min hualsak a ni tih hrereng ila, kan Pasal tur Isua Krista tan chauh a mo tur te hi i inbuatsaih ang u.

Lalpa’n Malsawm Rawh Se.     

********************

        

JUNIPER Issue No. 28; 12 July 2015

PYD HALF YEAR AUDIT NEIH A NI

Kar Kalta Dt.6 July 2015, Thawhtan Zan khan kum chanve chhunga Local PYD Group leh Sub-Committee hrang hrangte sum chet vel dan Audit neih a ni a, Bro. Lalfelkima leh Bro. C. Lalnunfela-ten an Audit a ni.

2015 January thla atanga June thla thlenga Local PYD Group pathum leh Sub-committee hrang hrangte sum chet vel dan chu hetiang hi a ni:

 

*************************

 NAUPANG SUNDAY SCHOOL-AH
DEPARTMENT THAR

General Sunday School Conference kum 2015 in a lo pass tawh, Executive Board approve tura a thudah chu Dt. 25 June 2015 , Zirtawpni Khan Executive Board-ah sawiho niin Naupang Sunday School-ah Department thar, THUTHLUNG ZIR PAWL siam chu tha tih tlan a ni a, General  Sunday School Department-in a tul anga a bawhzui turin dah a ni.

PYD HALF YEAR REPORT

Naktuk Dt. 13 July 2015, Thawhtan Zan, Thalai inkhawmah hian PYD chuan kum danga a lo tih thin angin Half Year Report huna buatsaih leh dawn a, hetah hian Local PYD Group leh Sub-Committee hrang hrang ten an hmalakna leh hma an lo lak tawh dante an report dawn a ni. Group tinte tha taka inbuasaih turin hruaituten min ngen ngal bawk a ni.

BIAKIN ZUNIN CHEI THA MEK

Kohhran in kan mamaw em em inthiarna hmun tha chu Building lam hmalaknain chei that mek a ni a, zunin pawh mipa leh hmeichhe tan a hranga siam tum a ni. Theih tawka chaka hma lak mek a ni a, hun reiloteah inthiarna tha tak kan kohhranin kan neih theih beisei a ni.

BAPTISMA CHANG

Dt.10.July 2015 Zirtawp Zan khan Hermon, Venghlui Local Atangin Mi 8 (pariat) laiin Bialtu Pastor Rev. Ramtharpara hnen atangin sual ngaihdamna Baptisma an chang a, Baptisma  rawngbawlna hi Pastor leh Evan Robert Lalrinsanga ten an nei a ni.

SENIOR DEPARTMENT NOTICE

Senior Department Zirlai zawng zawngte, Zirtirtute’n min chah angin Inkhawmpui Chang Joela 3:1-3 chu vawiin-ah thiamsa veka kaltur a ni a, Nu leh Pate pawhin kan fate thiam tir ngei turin zirtirtuten min ngen a ni.

GRADUATE

Mizoram University in 2015 Bachelor Degree Exam result a tihchhuahah PYD member hlawhtlinna chang kan nei nual a, an hlawhtlinna-ah Juniper editorial Board chuan kan lawmpui hle a, an kal zelna turah duhsakna sangber kan hlan e.

Graduate thar kan hriat theihte chu:
1. Bro. JH Lalhuansiama     I Div
2. Sis. Lalthakimi        I Div
3. Sis. Laltanpuii Ralte    II Div
4. Bro. Malsawmtluanga    II Div

 

GENERAL EXECUTIVE BOARD ROREL TLANGPUITE

June 25, Zirtawpni khan, General Headquarters Office, Mualpui Salem vengah Executive Board meeting-neih a ni a, Rev. V. L. Dika Sailo, General Superintendent chuan meeting a kaihruai a, member zingah Rev. Pantsa Leyri, South East Nagaland District Superintendent tih loh chu an kal kim a ni. An thurel tlangpui te :

1. Hruaitu ruat thar thu :
    a) Rev. VL Dika Sailo General Superintendent tanglai chu July 7,2015-a pension-a a  chhuah dawn tak avangin hun hman zawh loh (unexpired term) atan Rev. Lalmalsawma Sailo, General Secretary thawk lai chu ruat a ni.
    b) Rev. Lalmalsawma Sailo, General Secretary thawklai chu General Superintendent-a ruat a lo nih tak avangin  a hun hman zawh loh (unexpired term) atan Rev. R.Lalrinsanga, General Treasurer  thawk lai chu ruat a ni.
    c) Rev. R. Lalrinsanga, General Treasurer  thawklai chu General Secretary-a ruat a lo nih tak avangin a  hun hman zawh loh (unexpired term) atan Rev. Zohmingthanzama, General Missions Director  thawk lai chu ruat a ni.
    d) Rev. Zohmingthanzama, General Missions Director thawklai chu General Treasurer-a ruat a lo nih tak avangin a hun hman zawh loh (unexpired term) atan Rev. R.Lalhawia, Aizawl East District Secretary  thawk lai chu ruat a ni.
    e) Charge inhlan hun atan July 15, 2015(Wed) ruat niin a hmun atan Gen. Hqrs. Office a ni ang.
    f) Mawhphurhna leh chanvo hrang hrang :
   Mawhphurhna an chelh tharina a ken tel chanvo leh mawhphurhna chi hrang
hrang te chu  hruaitu ruat tharten an chelh nghal dawn a, Literature & Publication Board Secretary mawhphurhna erawh chu Rev. Zohmingthanzaman chelh tlang se, Media Chairman, UPC-NEI chu Rev. R.Lalhawia’n a chelh thung ang. Hengte hi hruaitu hmasa te hun hman zawh loh ( unexpired term ) atan zel a ni ang.

    2. Naupang Sunday School-ah Department  thar – thuthlung zir pawl - siam thu : General Sunday School Conference kum 2015 in a pass, Executive Board approve tura a thudah chu sawiho niin Naupang Sunday School-ah Department thar siam chu tha tih tlan a ni a, General  S.S Department-in a tul angin lo bawhzui se tih a ni.

    3.   Disable Sunday leh Orphanage Sunday uar zawka hman thu :
Hnuchhamte leh Rualban lote enkawlna  kawnga chak zawka  hmalak a nih theihnan General lam atanga chak zawka hmalak nise tih sawiho a ni a, tha tih
tlan a ni. Tin, Orphanage Sunday-a  orphanage pual thilpek LAD-te lak khawm
hi Local LAD-in District LAD-ah, District LAD-in General  LAD-ah, General LAD-in Kohhranpui General Treasurer-ah thehlut thin se kan ti.

    4. Television-a Programme/ Channel lei thu : Executive Board thu bawhzuilai a niin hma la tura ruat Media Cell-ten an hmalakna report an thehluh chu sawiho a ni a, kar khata darkar 1 emaw TV programme neih dan kawng zawn chu tha tih tlan a ni a, mawhphurtuten lo bawhzui zel se tih a ni.

    5. BSI-in revised edition buatsaih an tum chungchanga kohhran a rawnna chungchang : Bible Society of India-in Mizo Bible Revised Edition buatsaih an tum chungchanga kohhrante a rawnna thu sawiho a ni a, Revised Edition buatsaih chu tha tih a ni a; amaherawhchu English Bible behchhan bik neih ni se, he thu hi BSI-ah thlen ni se kan ti.

    6. Thawktute service tihngheh chungchang : He thu hi ngun taka sawiho a nia, heng a hnuaia kan thawktu hrang hrang te hi July 1,2015 atang effect tura tihngheh ( regularise) ni se tih a ni.
    i) Sis. PC Lalromawii - Mission Veng, Aizawl - Seller
    ii) Sis. Lalrosangi - Zemabawk, Aizawl - Binder
    b) Principal Susane Downs Boarding School, Kolasib Khuangpuilam atan tuna Principal thawk lai Evan. VL Zarzoliana Sailo chu tihngheh  ni se kan ti. July 1,2015-ah General Superintendent hnenah ziaka joining report pein hna an zawm ang.

    7. Dan ennawn chungchang :
Inneihna dan chungchanga Constitution Article 8 Section 34(5) ‘ Inneihna
thianghlim tlin lo, inngaihna suala lo tlu tawhte leh lo inru hmasate tan
inneihna lehkha tar emaw lehkha tar aia hriattirna puanga inneih hi phal a
ni lo’, tih hi ennawn ni se tih chu sawiho a ni a, tha tih tlan niin,
General Conference-ah amend tura thlen ni se tih a ni. Hetiangin – Hetianga lo chesual tawhte hi kum 1 ( thla 12) a vei hnu-ah hming hliauna nei lo leh Kohhran mit tikhama an awm loh chuan kohhranin lehkha tara inneih a phalsak thei ang - tiin. Tin, hemi hma pawh hian a mamawh an awm chuan a tul angin District Board-in lo relsak mai se tha tih a ni bawk.

    Chairman Rev. V.L Dika Sailo chuan Executive Board-a a tel tawpna a nih tawh dawn avanga thuchah hetiangin a sawi -
1) NEI UPC-in kan nunpui tur chu Remna leh Thianghlimna a ni a, hemi
tibawrhbang thei thil chu i do tlat zel ang u.
2) NEI UPC hi huap zo kohhran a nih angin inpumkhatna tha i zawng fo ang u.
3) Patling rilru puin mahni intar lang hmasa lovin mi dang i dah hmasa thin ang u.
4) Executive Board zahawmna vawng reng ila,  member-te pawh nun dan zahawm takin i nung fo ang u.
5) Lalpan NEI UPC kaihruai zel se la, Executive Board Lalpan malsawm zel rawh se.
6) Min rawn tawngtaipui fo thin dawn nia, tiin.

********************