Juniper Editorial 21 June 2015

 JUNIPER EDITORIAL

Thianghlimna...

Kan hriat theuh angin kan kohhran chuan “Thianghlimna” lamah hma nasa takin a la a, a ropuiin a tha hle mai. Amaherawh chu ‘thianghlim’ erawh chu thil har berte zinga mi a ni si. Hruaitute pawhin theih tawp chhuangin kumpuan tih hlawhtlinna turin hma an la a, thianghlimna committee te dinin an phak tawkin tan pawh an la nasa hle mai. Nimin maiah pawh Seminar te neiin Bial chhung mite tan Tobacco leh a kaihhnawih lam zirhona neih a ni a, khang programte kha a hmunah khan a tawp mai ang tih a hlauhawm, khang kan programme buatsaihte khan kohhran mipuite hi thleng phak ve se, a kal ve lote pawhin engtin emaw tala hlawkna an chan ve theih a duhawm hle mai. Kha programme ah khan tel satliah mai lova, midangte zirtir chhawng thei kan nih a pawimawh hle a ni. Vaihlo do na lama thawkten min zirtir reng thei dawn lova, tin kohhran mipui zawng zawngte pawh an rawn zirtir vek senglo a, chuvangin zuk leh hmuam la ti lo,naupang zawkte leh kha huna kal velo te pawhin zirtirna an dawn ve hi a pawimawh a, a hlawhtlinna tak tak tur zawk pawh niin a lang.

    Zuk leh hmuam ti tawh sa inngheitir tum vak hi a tha a, nghei phah pawh tam tak an awm tawh a, a lawmawm khawp mai, mahse chu aia pawimawh zawk ni a lang chu a la ti velo leh naupang zawkte ti miahlo tura zirtir hi a ni, chu chuan zuk leh hmuama kan kohhran hmalam hun hi nasa takin a hril dawn a ni. Sap thufing pawhin “Bul tan that chu a chanve zo ang a ni.” a lo tih thin kha.

    Bul kan tan that phawt chuan kan hmalam hun hi a eng hle dawn a, kan thil beih mekah pawh hian nasa takin hlawhtlinna kan hmu ngei ang.

 

*********************

SILOAM IN SANG - K. Lianthanga; Juniper Article 21 June 2015

JUNIPER ARTICLE

SILOAM IN SANG

K. Lianthanga

    Awle, a hmasa in helai Bible a Pathian thu hi i lo chhiar hmasa phawt teh ang. Luka 13:1-5 thu hi- “Tin, chutihlai tak chuan, tute emaw an lo awm a, chumite chuan, Galili rama mi, Pilata’n an thisen, an Pathian biakna sa talhte zinga a talhsaka te chanchin chu Isua an hrilh a. Tin, Ani chuan an hnenah, chu Galili rama mite chu chutiang thil an tuar avang chuan Galili rama mi zawng zawng aiin misual bik niin in inring em ni? Ni suh e, ka hrilh a che u, nangni pawh in sim loh chuan chutiang bawkin in boral vek ang. Tin, Siloam in sangin mi 18 a delh hlumte pawh kha Jerusalem khuaa awmte zawng zawng aiin misual bik niin in ring em ni? Ni suh e, ka hrilh a che u, nangni pawh in sim loh chuan chutiang bawkin in boral vek ang” a ti a, a chhang a. tih thu kan  hmu a ni.

    Awle, heng thu atanga ka han lak chhuak duhte chu, Galili rama mite an thisen Pilata’n laksakin an Pathian biakna a an sa talhte thisen nena chawhpawlh tura a laksakate ho kha miten Galili rama mi zawng zawng aia sual ta bika an ngai kha thil dik ber a ni lova, kha thil vanduaithlak tak kha an tuar avangin midangte aia an sual bik vang a ni lo tih ka rawn sawi duh a ni. Tin, chutiang deuh bawkin Jerusalem khawpuia in sang pakhat Siloam an tih chu alo chim naah khan mi vanduaina tawk mi 18 lai maiin nunna an lo chan palhte pawh kha an sual vanga khatiang thil kha tuar an ni hauh lova, Jerusalem mi zawng zawng aia sual ta em em pawh an ni chuang lova, an chungah vanduaina alo thleng mai a ni. Kha thilah khan engmah mawhpuh tur a awm lo. Khawvela kan awm chhung hian tute pawhin vanduaina kan tawk thei vek. Kan chungah eng natna emaw alo thleng thei, heng thil avang hian kan tawngkam pawh kan fimkhur a ngai khawp mai, ‘A chuti reng a ni, tuar tlak ania lawm.’ han tih maite hi a awl em em a ni. Galili mite khan vanduaina tawkte chanchin Lal Isua hnena an va thlen khan “Galili rama mite aia sual bik niin in ring em ni” tiin Lal Isua’n a lo chhang a. Tin, chutiang bawkin Jerusalem vanduaina tawkte chanchin Lal Isua hnena an va thlen pawh khan “Chutiang thil an tuar avangin Jerusalema mi zawng aia sual bik niin in ring em ni.” tiin Lal Isua khan a lo chhang a nih kha.

    Kan tunlai hunah hian eng nge kan an ve le? Miten vanduaina an tawk tih kan lo hriatin ‘A chuti reng a ni, tuar tlak a lawm, a tuar har zawk ngawt alawm .’ kan ti mai ang em? Lal Isua phih awh tum tumtute thinlung ang pu mite, an tlin lohna lai hmuh tum ran mi, Rulin, “ka mei rap se, chu ila” ti tu ang rilru pu mite an tuar na lam khawngaih ahnekin an tlin lohna lai hmuh tuma midang hnena a mualpho zawnga  sawi thin mi kan ni em? Lal Davida sawi angin kan nuten  min pai laia sual daih tawh vek kan ni. Pathian tana thianghlim saa piang tumah kan awm lo. Puitling kan nihin thil kalhmang tur kan hrethiam chauh a ni. Kan sawi tawh ang khan kan chhungkuahah eng vanduaina emaw a lo thleng ve thei tih hriain, mite vanduaina tawh chu elsen mai lovin thil awl tak a nih laiin chutiang lam rilru thalo tak mai chu kan pu tur a nilo reng reng a ni. an sual bik vang a ni lo ti zawngin Lal Isua min lo hrilh anih kha. Lal Isuan alo chhan dan kha i hre reng ang u. Keini pawhin kan sual kan simlo anih chuan sual nei rengin kan thi dawn a ni. Vanduaina lo thleng thinte hi kan sual bik vanga lo thleng a nilo tih hi Lal Isua zirtir dan  a ni.
Lalpa’n Malsawm rawh se.

********************

JUNIPER ISSUE NO. 25; 21st JUNE, 2015

BIAL PUM HUAP VAIHLO LEH A KAIHHNAWIH DONA SEMINAR NEIH A NI

    Kar kalta Inrinni Dt. 20 June 2015 nileng khan Bethlehem Biakin ah Aizawl East District Thianghlimna Committee huaihawtin Bial Pum Huap Seminar Neih a ni a, thusawi ngaihnawm leh hlawk thlak tak tak ngaihthlak a ni. Hun hi chawhma leh chawhnu hunin then a ni a, chawhma hun hi Rev. R.Lianzama, Chairman, District Thianghlimna Committee in a kaihruai a, Rev. Ramtharpara, Bethlehem Bialtu Pastor in Hunserh hmangin, Bro. TC Vanlalruata hnen atangin zai ngaihthlak a ni. Chumi hnu chuan Chief Guest, Pi Lalriliani hnen atangin, thusawi tawi ngaihthlak a ni a, tichuan Rev PC Lalnghakliana, District Superintendent hnen atangin ‘Tobacco chungchanga Kohhranin hma a lakna’ tih thupui a sawi chu ngaihthlak chhunzawm leh a ni a, Hemi hnu hian Thingpui in hona hun neih a ni.

     Chawhnu hun hi Evan Lalchhuanmawia Zote, Bethlehem Bial Thianghlimna Committee Chairman in a kaihruai vethung a, Dr. Jane R. Ralte, Nodal Officer MSTCS hnen atangin “ Ruihhloin a huam chin, a hlauhawm zia leh a sim theih dan.” tih thu a sawi chu ngaihthlak a ni a, chumi hnuah Pu Lalremruata Project Co-Ordinator, MSTCS hnen atangin “COTPA dan leh a hrem theih dan” tih thupui ngaihthlak ho leh a ni bawk. Upa Rodailova Zote, District Thianghlimna Committee Treasurer in lawmthusawina hun a hmang a, chumi zawh chuan Rev. R. Lianzama’n tawngtainain kalkhawmte a tin a ni.

    Thusawitute an thiamin a bengvarthlak bawka, kalkhawmten hlawkthlak an ti hle a, kohhran pawhin a hlawkpui ngei an beisei a ni.

 

*************************

 

MIKE SERVICE NEI DAWN

Naktuk zan Dt. 22.6.2015, PYD inkhawm banah hian Bethlehem Biakinah Mike service neih tur a ni a, thusawitu atan Evan. Joseph Lalremruata a ni ang. Inkhawm zawng zawngte haw mai lova mike Service a tel vek turin kan in ngen a, Kohhran Mipuite pawh a thei theiin tawiawm turin kan in ngen e.

************************

PYD IN 2 WHEELER SIL DAWN

Dt. 27 June 2015 hian sumtuak na atan PYD chuan Two Wheeler sil hnatlang a nei leh dawn a, sil manah Rs. 50/- aia tlemlo lak a ni ang. Sum tuakna dang a vang si a, kan kohhran chhungkua 2-Wheeler nei zawng zawngte chuan kan neih ang angte sil tir vek turin hruaituten min ngen a, tin, PYD member zawng zawngte pawh hemi ni hian thahnemngai taka hnatlang turin min sawm bawk a ni.

 

 ********************************

CHALLIANZIKA GROUP NEWS

Dt. 15. June 2015, Thawhtan Zan inkhawm ban khan Challianzika group-te chu Sis. Lalrindiki Sailo-te leivung paihin an hnatlang a, hemi zana group member hnatlang zawng zawngte leh inhlawhna siamsaktute chhungkaw chungah hruaitute an lawm hle a, lawmthu an sawi a ni.

 

 

 ******************************

VIDEO FILE ATAN TALK SHOW BUATSAIH MEK

    United Pentecostal Church Media Cell, Pentecostal Network chuan kohhran Document pawimawh vawn that reng tur Video talk Show-a buaipui mek.

    He Video talk show-ah hian Media-lama mawhphurtu Rev. Zohmingthanzama Chairman, Rev. Jh Zahluna Editor, R. Lalbiakfela Secretary-ten kohhran din tantirh a nih laia hmalatu hmasa, Rev. J. Damhuala, Rev. K. Satinvela, Rev. K. Darsailova, Rev. Ellic Hnehzova Fanai, Rev. P. Chunga Singson, Rev. Saihnuna, Rev. Hautluanga te bakah mi dang dang an kawm kual a, Aizawl khawpui chhung bakah Kolasib hmuna Fahrah chawmna in Audrine Scism Children’s Home, Susane Downs Boarding School bakah hmun pawimawh dang dang tlawh kualin kawmna hun an hmang a. Lunglei, Chhimtuipui leh Mizoram pawnlam District-te bakah Missions Field-hrang hrang te pawh an la tlawh kual zel dawn a ni.

**************************

Aizawl East District News

Rawngbawlna: Evan H.Vanlalhruaia, Full Time Evangelist chuan May 22 atanga June 4 thleng khan N.Khawbung hmunah Crusade neiin he Crusade hi Pathian thlarau thianghlimin nasa taka awmpuiin Kohhran member te pawhin an hlut hle a ni. He Crusade chhung hian mual Inkhawm vawi 4 neiin Thuthlung puanna neih a ni a, Mi 7 in Isua hmingin Baptisma an chang bawk a ni.
Rev HL Dingliana te chhungkua, Thuampui te chuan Inrinni hian Pathian chawimawina an nei dawna, he hunah hian Rev Darchhawna, Thuampui Bialtu Pastor chu Speakerah hman a ni ang. Thuampui Kohhran te hian Crusade hmang chho mekin Thlarau Thianghlim awmpuina nasa tak an dawng mek a, chumi kal zelah chuan Rev HL Dingliana te chhungkua hian Pathian chawimawina an nei dawn a ni.

    Hmun hrang hrang-ah Crusade neih mek zel a ni: Aizawl East District chhunga Bial/ Local hrang hrang-ah Crusade neih chho mek zel a ni. He Crusade-ah hian Bialtu Pastor te leh Evangelist thenkhatte Speakerah hman niin Crusade hian Pathianni vawihnih tal awh tura ruahman a ni. Kumin 2015 hi Aizawl East District chhungah ram lak beihpui thlak tura hma lak mek zel niin chumi denchhen chuan Crusade hi hmun hrang hrang ah neih alo ni tawh in la neih chho zel tura ruahman a ni bawk.

District Board nei dawn:
District Sunday School Department chuan Dt 23.June.2015 Dar 10:00 AM hian District Committee room-ah Kum Chanve Board an nei anga District PYD te pawhin Dt 26.June.2015, Zirtawpni hian District Committee Room-ah tho hian Kum chanve Board an nei ve bawk ang. He hunah hian Bial leh Official atanga thurel tur hrang hrang lut te ngaihtuahna an nei ang.

*******************

Juniper Editorial (Dt. 14 June 2015)

JUNIPER EDITORIAL

Thawhrimna leh Malsawmna:

    Ringtu nih leh thawhrim hi a inhmeh a, ringtu tha inti si, thatchhe tak leh hnathawh aia thlarau par tlan duh zawk zel hi a awm theih khawp mai a, chuvangin ringtute pawh inbihchiah a, inenlet kan mamawh tlang theuh a ni.
    Kan Bible pawhin, Rinna chu thiltih tel lo chuan THI anih thu min hrilh a, chuvangchuan kan rinna tihlawhtling turin thil kan tih a ngai a ni. Mi harsa tak, eitur neilo awm ta se, a inah va kalin, eitur emaw a leina tur emaw va pe lovin awmhmunah tawngtai sak vak ta ringawt ila, kha kan tawngtaisak na khan awmzia a nei tlem hle ang. Chu ai chuan a tan tawngtaiin, a inah kalin eitur va pe bawk ta ila, kan rinna chu nung a lo ni ang a, Pathian duh dan angin midang tan malsawmna kan lo ni thei dawn bawk a lo ni.
    Midang tana tawgtai hi a tha teh meuh mai. Tih theih dang a awm tawh loh hnuah phei chuan a aia hlu a awm chuang lo. Amaherawhchu a taka lantir theih hunah hi chuan mahni che chhuak chuang si lova, tawngtaina ringawt hi chuan kawngro a su tam vakin a rinawm loh a ni.
    Kan thiltihna kawng engkimah kan theihtawp kan chhuah hi mihringte tih makmawh a ni a, kan tih theih bak chin erawh Pathian kuta dah bak tihtheih kan nei tawh lo. Mahni theih tawp pawh chhuah tum lo a, Pathian kuta dah tawp hi a dik berin a lang lo. Entirnan:- Lekha zirlai chuan a tum ber chu exam a hlawhtlinna chan a ni a, chumi tur chuan amah a inbuatsaih a ngai a, lehkha a zir a ngai a ni. Mahse, lehkha zir lovin tawngtai ta ringawt se, exam-ah chuan a hlawhtlin a rinawm loh a ni.
    Chuvangchuan, kawng engkimah, theihtawp kan chhuah a, kan tawngtai bawk hian Malsawmna chu kan chang zawk thin a lo ni.

***********************

PATHIAN KHAWNGAIHNA Evan Lalchhuanmawia Zote (Juniper Article 14 June 2015)

 JUNIPER ARTICLE

PATHIAN KHAWNGAIHNA

Evan Lalchhuanmawia Zote

II Timothea 1:9-10 “ Ani chuan akn thiltih angte ni  lovin, ama ruat leh khawngaihna ang zawkin min chhandam a, kohna thianghlimin min ko bawk a; chu khawngaihna chu leilung pian hmain Krista Isuaah chuan min pek a ni tawh; ”

Sam 89:49 “ Lalpa, i hmanlai khawngaihna, i rinawmnaa Davida hnena chhechhama i tiamte kha, khawiah nge a awm tak? ”

Isaia 54:7-8 “ Mitkhapkar lek ka ma chia; nimahsela, khawngaihna nasa takin ka hruai leh ang che. Ka thinur liamin mitkhapkar i lakah ka hmai ka thup a; nimahsela, kumkhaw ngilneihnain ka khawngaih ang che. ”

Isaia 55:3-7 “ In beng rawn dawh ula, ka hnenah lo kal rawh u. Ngaithla ula, tichuan in nunna chu a nung ang; tin, in hnenah kumkhaw thu ka thlung ang, Davida hnena khawngaihna tiam tlatte chu. Ngai teh, ani chu mi tin tan thu hretuah ka ruat a ni. Ngai teh, i hriat ngai loh hnam chu i ko vang a, nangmah hre ngailo hnam chu i hnenah anlo tlan ang, Mi Thianghlima avang chuan; ani chuan a chawimawi si chia. Hmuh awla a awm lai hian Lalpa chu zawng ula, a hnaih lai hian ko rawh u. Mi suaksual chuan a awm dan chu bansan sela, mi fel lo chuan a ngaihtuahte chu bansan sela, mi fel lo chuan a ngaihtuahte chu bansan bawk rawh se. Lalpa hnenah kir leh rawhse; tichuan, anin a ngaidam nasa khawp dawn si a. ”

Jeremia 6:16 “ Lalpa chuan heti hian a ti: Kawlkawngahte ding ula, en rawh u, Kawng tha awmna kawng hlunte chu zawt rawh u, Tah chuan kal ula, In thlarau tan chawlhna in hmu ang. Anni erawh chuan, ‘Tah chuan kan kal lo vang,’ an ti a. ”

Thufingte 16:25 “ Mi ngaiha kawng dik ni awm taka lang, A tawp chu thihna kawng ni si a awm. ”
Johana 14:6 “ Isuan a hnenah, ‘ Kawng leh thutak leh nunna ka ni; keimaha kal lo chu tu mah Pa hnenah an thleng ngai lo’.”

II Korinth 6:1 “ Tin, Pathian khawngaihna chu sawtpui lova in hmuh lohna turin, amah thawhpuituten kan ngen chiam a che u. ”

Ephesi 2:8 “ Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni. ”

    Min khawngaihna vang liau liaua chhandam ni turah kan in ngai a, kan inthlahdah a, kan nunah entawn tur hmuh tur  a vang hle a ni. Miten min chhiar a kan awmdan zawng zawng min hai lo, Krista chanchin tha nena in mawi kan nunah an beisei thin. Khawnge van kai tur chhu? Engvangin nge a kai bik ang? Baptisma a chan vangin maw? ‘Ani a kai chuan kan vawk nen lam kan kai ang’ anti thin a, zu no dawm reng chungin kai kan tum a.

    A khawngaihna(Baptisma) chu kan chang ngei a, mahse chu khawngaihna kan chan chu kan timualpho a, miten kan nunah sawtna an hmu chuang lo anih hi. Kan sawtpui theihnan pawh chuan “a ngenin ka ngen chiam a che u” a ti. Kan  nundan leh Krista chanchintha in mawi se la a tha hle ang.
    
Pastor te, Tirhkoh te, Upa te, LAD te, PYD te u, miten a nunah Isua a awm tawh anti em? Antih loh chuan in ngaihtuah chiang ila, a sawi a sawi mai mai lovin kan nun leh awmdan hian rah dik tum ila, tichuan kan nunah miten an hmu ang. Thuthlungah kan lut a mahse thuthlungah kan awm thinlo a ni.

    Thawhpuite thawhpui theilo, keini aia chungnung tur rahbeh duhna te, rorelna kawngah in huphurh a awm theih a ni. Chung mite nunah chuan miten enge an hmuh ang? Pathian phei chuan min ten ngawt lo ang maw?

    `Khawngaihna vang liau liauva chhandama koh kan nih hria ila, tumah inluling lo ila atha. Kan chetzia leh khawngaihna Chanchin Tha a thlawna kan dawn hi a thlawna pe chhuak tur kan nih hre rengin...’

**********************

JUNIPER ISSUE NO. 24; 14th JUNE, 2015

MISSION DEPARTMENT IN MUALPUI LOCAL TLAWH DAWN

Vawiin Ni 14, June 2015 Pathianni hian Bethlehem Local Mission Department chuan Mualpui Local a tlawh dawn a, chawhma atanga hun hman tan tur a ni a, zan thlengin program hi hman a ni ang. Thusawi tha tak tak leh zai mawi tak takte ngaihthlak a ni ang.

    He hun hmang tur hian Mission Deparment chuan a tam thei ang ber kohhran mipuite kal turin a sawm a, a kal tur tan zing dar 9-ah Sihluiah kim tur a ni ang a, dar 9:15 ah Sihlui atangin Bus a chhuak ang.

PROGRAM

Chawhma

    Tantu        :    Sis. Lalrindiki Sailo

    Solo        :    Sis. Lalpianmawii

    Thuhriltu    :    Upa C. Damvea

Chawhnu

    Tantu        :    Bro. Zothanchhunga

    Thuhriltu    :    Evan. Lalchhuanmawia Zote

Zan

    Tantu        :    Bro. Singzathanga

    Solo        :    Bro. Lalthansanga Colney

    Thuhriltu    :    Evan. Robert Lalrinsanga

************************* 

BIAL HUAP SEMINAR A USHER TUR TE

Aizawl East DIstrict huaihawta, Bial pum huap Seminar, Dt. 20 June 2015 a Bethlehem Kohhran Biakina neih turah heng mite hi usher tura ruat an ni a, an changvote tha taka tihlawhtling turin hruaituten an ngen a ni.
    1) Lalfakzuala            2) Vanlalringa
    3) Baby VL Hruaitluangi     4) Lalrawngbawli
    5) Vanlalhumi                   6) Lalhruaizeli Hrahsel
    7) Lalmuansangi               8) Laltharlawmi
    9) Jolly Lalremmawii         10) Ramtharnghaki Zote
    11) Lalhrilmawii

*************************

BIAL ZAIPAWL HNATLANG

Bial Zaipawl chuan sumtuak nan Engedi Cassette zuarin kar hmasa thawhlehni khan hnatlang an nei a, lo leisak tute zawng zawng chungah lawmthu an sawi tak meuh a ni. Hemi zan kher lova lei sak tute chungah pawh lawmthu an sawi a ni.

**************************

LOCAL KUMPUAN NEWS

Dt. 22.6.2015, PYD inkhawm banah Bethlehem Biakinah Mike service neih tur a ni a, thusawitu atan Evan. Joseph Lalremruata a ni ang. Inkhawm zawng zawngte haw mai lova mike Service a tel vek turin kan in ngen a, Kohhran Mipuite pawh a thei theiin tawiawm turin kan in ngen e.

DISTRICT MISSION DEPARTMENT NEWS

Dt 11 June 2015 khan District Committee Room ah committee neih a ni a, rorel pawimawh zualte:-
1. Home Missionary lawmman atan kum 2016 atagin Rs 8000
2. Home Missionary hi kum khat chhung atan term pawhsei a ni.
3. Home Missionary lak dawnin Advertisement chhuaha Board hmaah lak tawh tur a ni.
4. Bro. Thandawla, Arunachal, Dyun Missionary hman turin Refrigerator leh Inverter Set leisak nise.

PYD IN 2 WHEELER SIL DAWN

Dt. 27 June 2015 hian sumtuak nan PYD chuan Two Wheeler sil hnatlang neih a ni leh dawn a, sil manah Rs. 50/- aia tlemlo lak a ni ang.

**************************

Bial Mission News

Kar hmasa thawhlehni Ni 9 khan Bial Mission Department Board neih a ni a, rorel pawimawh zual te:-

1. Hmalak mekna kohhrana mi hlate hnuh hnaih an kalpui mek cu Local tin hmalakna report ngaihthlak a ni a, a hlawhtling an ti hle a damna changte an awm a, chhunzawm zel nise kan ti.

2. Bial chhung Local tin tlawh kual tura ruahmanna neih a ni a, a hmasa ber atan 12 July 2015, Pathianni zanah Bethlehem Vengthlang Biakinah neih nise, 

Thusawitu atan Evan. Lalchhuanmawia Zote a ni ang.
    Hermon Dt. 9.8.2015, Thuhriltu Evan. Robert Lalrinsanga
    Bethlehem Dt. 20.9.2015, Thuhriltu Upa Lalbiakthuama

*****************************

DISTRICT THIANGHLIMNA COMMITTEE BUL TUMIN BIAL HUAP SEMINAR NEI DAWN

Ni 20 June 2015, Inrinni nileng hian District Thianghlimna Committee bul tumin Bethlehem Biakinah Bethlehem Bial tan “ Seminar on No Tobacco” a buatsaih dawn a, kal tur chinte chu kim taka kal tur a ni.
PROGRAMME
1st Session ( Dar 10:30 a.m - 12:30 p.m )

Chairman        :    Rev. R. Lianzama
            Chairman, Thianghlimna Committee
Hunserh        :    Rev. Ramtharpara, Bialtu Pastor
Solo            :    Bro. T.C Vanlalruata
Thusawi        :    Pi. Lalriliani, Chief Guest
Thupui            :    “Tobacco chungchanga Kohhran in hma a lakna”
Sawitu            :    Rev. P.C Lalnghakliana, District Superintendent
Thingpui in hona    :    12:30 p.m - 1:30 p.m

2nd Session ( Dar 1:00 p.m - 4:00 p.m )

Chairman        :    Evan Lalchhuanmawia Zote, Chairman, 

 Thianghlimna CommtteeBethlehem Bial

Thupui            :    “ Ruihhloin a huam chin, a hlauhawm zia leh a sim theih dan.”
Sawitu            :    Dr. Jane R. Ralte, Nodal Officer, MSTCS
Thupui            :    “COTPA dan leh a hrem theih dan”
Sawitu            :    Pu Lalremruata, Project Co.Ordinator, MSTCS
Sawihona        :    3:00 p.m - 3:45 p.m
Vote of Thanks        :    Upa Rodailova Zote, Treasurer
                District Thianghlimna Committee
Huntawp tawngtai    :    Rev. R. Lianzama 

************************

 

Juniper Editorial 7 June 2015

JUNIPER EDITORIAL

KRISTIAN DAN DIK

    Mizo mipui za a tam zawk fe te hi chu kristianah kan inchhal a, India mipuite leh ram dang mite pawhin Kristian state ti hialin min hre thin. Heti taka kristian tamna state ah hian rorelna dik a awm em? Mihring kan thlamuangin kan inhmangaih tlang em? In sawisel leh in elrelna a bo em? Mirethei an tlemin mite tana inpe leh mite harsatna a pui thin vek kan ni em? A chhanna chu sawi ngailo in kan hre nghal vek mai awm e.
    Han ngaihtuah mai hi chuan a chunga kan tarlante khi chu awm lo vek mai awm hian a lang a, a chhan chu a tam zawk Kristian kan ni miau si a. Kristian chu Isua Krista ringtu, Isua hnung zuitu leh a duhzawng titute hi an ni si a, chutiang mi chuan mi elrel leh sawisel, mite tana harsatna thlen hi chu a tih loh atan mawi a ni bawk si. Mite tana harsatna thlentu, mite rilru tina thintu, mite sualna hmuthei tak, an insiamthatna tura engmah tichuang silo hi Kristian dik a ni thei dawn em ni!
    Kristian, thlarau mi tak inti chung si hian miten an bula an awm duh loh, an kawm chak loh leh an bula  thil tih an hreh deuh hi kan lo ni reng thei mai awm e.
    Kristian dik tak chu Biakin chhung nilo, Biakin pawna a nungchang leh awmdan-ah a lang thin a, mite tana a thiltih-ah a langchhuak bawk thin.
    Kristian luangchhuak lo hi thil inhmehlo tawpkhawk a ni a, kan zui ber leh kan Kristian chhan kan Lal Isua meuh pawh kha, mite tana inpe zo vekin a thihni thlengin a nun a hmang anih kha.
 Chuvangchuan Kristian luangchhuak lo nih leh mite tana harsatna leh hrehawmna thlentu nih hi Kristian dik tak tan a inhmehlo tih hi i hrereng ang u.

***************

Thuthlung hi a lo va pawimawh tak em!! - K. Lalfamkima (Juniper Article Dt. 7 June 2015)

JUNIPER ARTICLE

“ THUTHLUNG HI A LO VA PAWIMAWH TAK EM!!!”

K.Lalfamkima

    He thu ropui tak hi famkim viau lo mahsela, thinlung tak a lo chhiar turin ka ngen a che u.
    Pathian in khawvelah mihring te Chhandamna turin thu a lo thlung a, thuthlung hmasa ber chu “ Eden huan thuthlung”, a ni a, huan lai taka thing awm rah erawh chu in eitur a ni lo. (Genesis 03:03 )

    Tin, Abraham a hnenah serhtan thuthlung a lo dah leh a ( Genesis 17:10-13 ) a kan chhiar chuan kan hmu leh a.

    Tin Nova hnenah Lawng tuk thuthlung kan hmu leh a, Genesis 06:14 kan en chuan “I tan Far thing in Lawng siam rawh”, tih kan hmu leh a, mahsela, Nova rawngbawlna kha a tla tha vaklo aniang, an chhungkaw member -8 chauh kha tui ata chhandamin an awm ta a, chumi anpui Baptisma kan hnena a thuthlun hnuhnun ber a zirtir sawm leh pakhatte hnen ngeia, a thlen chu, “Aringa Baptisma chang chu chhandamin an awm ang a, a ringlo erawh chu thiamloh changin an awm ang”, (Marka 16:15-16)

    Bible pakhat hmang vek siin dan hrang nuaih hi engtizia nge ni ta ang le? Hindu hoah khuan Trinitarian leh Unitarian an awm ve ang em le?, chutiang chu an awm ve awm si lova…

    Keini Bible pakhat ring theuh theuh si pawn dan hmang hrang lo awm ta hi Setana min beihna chikhat a lo ni a, chu chu hrethiam si lo hian Piantharna nei silo hruaituten kohhran an kaihhruai chuan ngaihdan awlsam leh mite tana pawm nuam thei ang berin an rilru an rawn her danglam sak a, IIKorinth 4:3-4 kan en chuan heti hian kan hmu, “NImahsela, kan chanchintha hi chhuahin a awm chuan, boral mekah te hian a ni khuhin a awm ni, Krista Pathian anpui, a ropuizia chanchin tha eng chuan anmahni a chhun en theihlohna turin chungah te chuan he khawvel Pathian hian ringlo te rilru a ti dang a”, tih kan hmu a, Helai thu kan chhiar zawh tak chiah hi Tirhkoh Pawla hian a lo hmu chiang em em a ni.

    Pathianin van a a lawn dawn a a thuthlung pawm harsa lo tak tur, a then tan harsa tak ni si Tui Baptisma hi luipui a ui kaih luh tum ang maiin an tang tlat mai thin a nih si hi…!!! Tichuan a awlsam ber leh a nihna tak rawn hailang tur chuan kan Pathian hian a thuthlung hi mi zawng zawng tan anih rual rualin, UPC tan alo thlung ta ber mai niin a lang ta. Avan ropui tak em! Lalpa chu fakin awm rawh se. Amen.
    I Timothy 4:10 kan chhiar chuan “Ani chu mi zawng zawng chhandamtu a ni a, a ringtute chhandamtu a ni deuh ber mai” tih kan hmu a ni.
    Kan Bible-ah hian thuthlung hi alo dah pawimawh khawp mai. Thuthlung hlui hunah pawh khan Thuthlung Bawm lamin an lo dah pawimawh a ni a, a bawm pawh khati khawp a dah pawimawh chuan, a thuthlung phei chu an van dah pawimawh lehzual dawn em!!

    Thuthlung bawm-ah chuan heng pathumte hi an dah a -
1) Arona Tiang chawr        2) Manna Hlumbela dah      3) Thusawm pek te an ni.

    Hengte hi ropui tak chu an va ni hranlo em! Mahsela, a dahtirtu Pathian erawh a ropui a ni. Chutiang bawkin, A thuthlung- tui Baptisma erawh ropui tak a nilo, a tirtu Pathian (a thuthlungtu Pathian) erawh a ropui a ni.

    Khawvel zawng zawnga Kristian-te hian kan tum leh kan Aim ber chu vanram kai a nih vek a rinawm a, chuti anih rau rau chuan, a thupek zawm chu kan tih tur dik tak a van nih hmel si vele. “A thupekte chu a khirh si lova.” tih kan hmu a ni. Mahsela a then tan hian alo khirh viaute pawh a ni mahna.

    Pathian thuthlung ropui tak hi alo pawimawh zia Pathian miten hla thuin an lo phuah chhuak a, a bik takin kan kohhran hlabu No. 622-na ‘Lalpa Thuthlung Ropui Tak Chu’ tih hla phuahtu, Pu Darrikhuma hian rau takin Pathian-in a lo pe a, a chang 3-na,

    “Pathian rama lut thei turin,
    Tuiah leh Thlarauah chuan
    In piangthar tur a ni tiin
    Lal Isuan min lo hrilh.” tiin a lo phuah a, van Pathian hi a thuthlungah vek alo kal leh ngei dawn si a.

 “Thuthlung kha rawn pawisa ang che, lei hmunthim laite chu nunrawnna awmnain a khat si a.”
(Sam 74:20)

    A chiartu zawng zawngte Lalpa’n a tharin malsawm rawh se. Amen.
     

JUNIPER 7th JUNE, 2015; ISSUE NO. 23

BETHLEHEM LOCAL PYD EXECUTIVE
MEETING NEIH A NI
(PYD Inkhawm zan apiangin zavaia lam hun siam ziah a ni ang)

Dt. 4th June 2015, Ningani zanah khan Bethlehem Local PYD Executive Meeting pawimawh tak chu Biakin Committee Room-ah neih a ni a, PYD-te kal zel dan tur thu pawimawh tak tak an rel a ni.
    Rorel Pawimawh zual thenkhatte chu:-

1) Thawhtan zan, PYD inkhawm apiangin banna hla sak hunah inkhawm zawng zawngte lamtualah chhuak khawm a lam vek thin  a ni tawh ang a, Banna hla ah hian lengkhawm hla sak ziah thin a ni bawk ang.

2) Local PYD Kumpuan Sub-Committee tih len nise tih rawtna chu ngaihtuah ho anih hnuin Fin. Secretary post dah belh a ni a, he post chelh tur hian Sis. Vanlalhlimpuii chu ruat nghal a ni.

3) Local OB, Local Executive Committee members, Group OB, leh Sub-Committee OB-ten meeting neih ho nise tih rawtna lo lut chu ngaihtuah ho anih hnuah remtih tlan a ni a, a hun leh pawimawh dang erawh Local OB-te ngaihtuah tura dah a ni.

4) Kum danga tih thin angin Group leh Sub-Committee Half Year Report ngaihthlakna hun siam leh a ni dawn a, a hun atan 13 July 2015 chu ruat nghal a ni.

5) Dt. 27 June 2015 hian sumtuak nan Two Wheeler sil hnatlang neih a ni leh dawn a, sil manah Rs. 50/- aia tlemlo lak a ni ang.

6) Thla tin PYD inkhawm, Thawhtan vawi thumna apiangah Kumpuan lam hawi Sermon leh Kumpuan lam hawi tawngtai thupui neih thin a ni ang.

7) Fellowship neih rawtna lut chu ngaihtuah niin tha tih tlan a ni a, a hun atan 7 June 2015 ruat a ni a, programme pawh duan ngal a ni.

**************************

LOCAL MISSION DEPARTMENT IN MUALPUI LOCAL TLAWH DAWN

Dt. 14 June 2015 Pathianni leh lo awm turah khian Bethlehem Local Mission Department chuan Mualpui Kohhran a tlawh dawn a, he hunah hian thusawi ngaihnawm tak tak leh zai mawi tak takte ngaihthlak tur a awm ang.
    Zing Dar 9:00 ah Sihlui atangin Bus a chhuak ang.

********************

LOCAL MISSION DEPT. HOME CRUSADE PROGRAMME

Bethlehem Local Mission Department chuan kumin kumtir atang khan Ningani zan apiangin Home Crusade programe a buatsaih thin a, kohhran chhunga in hrang hrangah inkhawm hun an buatsaih thin a ni. Tun kar lo awm tur
Tunkar Ningani hian Sis. K. Vanlalruati leh Sis. Zamveli-te inah hun hman a ni ang.

**************************

MUAL INKHAWM NEI DAWN

Dt. 28 June 2015, Pathianni khian Local Mission Department buatsaihin Bethlehem Dawrkawn-ah Mual inkhawm buatsaih  a ni dawn a, Kohhran Department hrang hrangte thawhpuina leh tawiawmna a ngen tak zet zet a ni. Kohhran hmel lanna tur leh ram lakna hmanraw pawimawh tak anih avangin kohhran mipuiten ngaipawimawh a, tel vek turin min sawm bawk a ni.

**********************

PYD HALF YEAR AUDIT & HALF YEAR REPORT

Dt. 6 July 2015, Inrinni Zan inkhawm ban hian PYD Group leh Sub-Committee-te kum chanve (half year) sum lut leh chhuak audit neih a ni dawn a, Auditor atan Bro. C. Lalnunfela leh Bro. Lalfelkima-te ruat an ni.
Tin, Dt. 13 July 2015, Thawhtan zan inkhawm ah Group leh Sub-Committee-te Kum chanve report ngaihthlakna hun bauatsaih a ni dawn bawk a ni.
    Audit leh Report atan hian Group leh sub-committee te lo inbuatsaih theuh tur a ni e.

*********************

FELLOWSHIP (VAWIIN TLAIAH)

Hun rei tak chhung Bethlehem Local PYD-ten Fellowship Programme kan hman tawh loh hnuin Vawiin Dt. 7 June 2015 chawhnu inkhawm ban hian Local PYD chuan Fellowship Program a buatsaih dawn a, Member-te kal vek turin hruaituten min sawm a ni.
    A Hmun    : Biakin
    Chairman    : Bro. C. Lalrammawia
    Tantu        : Bro. Lalhmingsanga
    Musician    : Keyboard - Bro. Lalnunmawia
              Bass            - Bro. Lalhmingsanga
              Drums       - Bro. C. Lalnunfela
              Guitar       - Bro. Lalmuanzuala
              Hla Hriltu - Sis. Lalhmingmawii 

*************************