JUNIPER EDITORIAL 29 March 2015

 JUNIPER EDITORIAL

TUMKAU NI

    Vawiin hi Kohhran ni pawimawh tak, Mizo Kristianten kan hriat lar dan chuan ‘Tumkau Ni’ a ni a, khawvel pumah erawh chuan ‘Palm Sunday’ tia hriat leh sawi a ni thin.

    Tumkau Ni hi Kristiante tana a pawimawhna em em pakhat chu kan hriat theuh angin Lal Isua’n Lal a nihzia entir nana ropui taka Jerusalem a luhna ni champha anih vang a ni. Lal Isua Jerusalem-a chawimawia a awm thu hi Thuthlung Thar lama Chanchin Tha Bu ziaktute hian an ziak vek a (Mat.21:1-11, Marka 11:1-11, Luka 19:28-44 leh John. 12:12-19).

    Hmun leh ram hrang hranga kan hmandan a inang vek lova, hmun tam zawkah Tumkau chawiin hemi ni hriatrengnan hian Ringtuten  kawngzawh leh Biak In lamahte hun an hmang tlangpui thin. Hmun thenkhatah chuan tumkau/tum thing hmuh tur a awm ve loh avangin Box (Buxus sempervirens) thingte, Yew (Taxus baccata) thingte, Willow (Salix) thing leh thing awm remchang dangte an hmang thin a. Chuvang chuan hmun thenkhatah phei chuan Palm Sunday ti lovin Yew Sunday-te, Branch Sunday-te pawh an ti ve thin!

    Tunhma atang tawhin Near East (Iraq, Israel, Egypt,etc) ram velah hian miropui leh chawimawi  phute chu Sabengtung chunga chuantirin mipui lamin kawngahte puan/chhawlte an phah thin a. Tin, tumhnah leh thinghnahte lakhawmin kawngah an phah bawk thin a ni.

    Midangten-a an hman dan chu engpawh lo ni sela, Tumkau Ni alo thlen hian kan nunah a tharin Lal Isua lo lalber sela, Lal Isua daltu awm reng reng chu paihchhuak a, Lal Isua rahbeh theih turin i phawrh chhuakin i phah chhuak ve ang u! Kan nunah Lal Isua alo ropui ve theihna tur chuan kan hun hlutakte leh kan thil neih hlutte Ama ropuina turin kan pek a tul hle dawn a ni. Hossana tiin Lalpa I fak ve ang u.

  

***************************

K. LALHMINGMAWIA HI TUNGE? By VL Xavier Tochhawng; Juniper Article 29 March 2015

JUNIPER ARTICLE

 

K. LALHMINGMAWIA HI TUNGE?

 By VL Xavier Tochhawng

     February 5th 1968  a Lungtan khua a piang, naupang harh vang leh inhlei peih ve tak, thian kawm nuam ti mi, a bula awm hrehawmloh tak ni in, Apa K.Rothangpuia, A nu Rosangi te fa pariat zing a pasarihna a ni a, an naupangber K. Lalvulmawia tihloh, an upat dan in dawtin, Vanlalthari, K Vanramthianghlima, K Lalrinpuia, Zammawii, Lalramliani, K.Lalhmingmawia leh famta K Lalvulmawia (Vultea) an la dam kim a, Lianpui khuaah a seilian thung a ni.
    Kum 1974 ah Lianpui khuaah an pem a, he khuaah hian an chhungkuain UPC Kohhran an din a,an chhungkua choh a inkhawm pawh an ngah khawp mai.
   
    Kum 1988 ah Mizoram Police ah tangin kum 1990 kumah Aizawl Bethlehem Veng ah pem lutin awmhmun an beng bel a ni.

    Bethlehem Kohhranah hian a phak ang tawkin rawng a bawl ve a, nihna hrang hrang, PYD Committee member leh Group Leader te niin, kum 1995 khan Local PYD Secretary niin Kum 2003 ah Bial PYD Secretary a ni a; Kum 2004 khan Bial PYD President te a lo ni tawh a ni. Chubakah Bial zaipawl Chairman, Thianghlimna Committee Chairman leh Local Light & Sound Committee Chairman-te a ni tawh bawk.
   
    Amah hi a tih tawh lamah chuan inpezo tak mai a ni a, a tihtur tlin tak a timi a nih angin a rawngbawlna lamah pawh chanvo pawimawh a vuan tam hle, Kum 1997-1988, 2001-2005, khan Local Mission Department-ah Secretary a ni a, 2011-2012 ah Bial Secretary niin, 2013-2014 khan Bial Mission Department ah Director a ni bawk.
   
    Amah a inpek em a vangin Puitling zirtirtu ah kum 1997-2015 a thawk a, Building lamah pawh 1997- 1998 ah Building Committee secretary niin, 2015 ah Financial Secretary a ni leh a ni.
    Kohhranpui lamah Kum 2008 ah Church Board Assistant Secretary niin, 2009-2014 thleng Secretary a ni a, kum 2015 ah Bethlehem Bial Secretary a ni leh a ni.

    Kum 2006-2011 thleng Local Licence neiin, Kum 2012 atangin General Licence a nei a, tunah Sectional Pastor ni turin Apoint a ni ta a ni.

    Amah kan hrechiangin, a mizia pawh kan hria a, a bula awm a hrehawm lohzia pawh kan hre vek, Amah ka sawisel chuan in thinlung a na ang tih ka hlau a, ka fak vak chuan Amah ka veng thawng bawk si, ka sawi duh chu- “Ka thianpa, a sawrkar hnathawh uiawm tak tlansan a PASTOR hna, huphurhawm tak mai, Lalpa kohna chhang a alo pawm ta hi ka lawmpuiin ka chhuang ve hle a ni”

    Ni 13 March 1997 khan Upa Khuangchhinga fanu Vanlalrinpuii (Marini) nen inneiin, tunah Fapa pali, Lalniropuia, K Vanlalhlimawma, Vanlalchawimawia, Hmangaihzuala leh Fanu pakhat, VL Remruati te  neiin, chhungkaw inkawm ngeih tak niin hlim tlang takin an khawsa mek a ni.

    Hnahlan Pastor thar tur hi Kohhranho ten finna leh remhriatna a  rawng a bawl theih nan nasa takin I tawngtai pui ang u, I chhungkua; I unau ngei a ni si a. 

********************

JUNIPER 29th MARCH, 2015 VOL. XIX, ISSUE NO. 12

CHAWIMAWINA PROGRAMME

Dt. 3 March 2015 (Good Friday) hian Bro. R. Lalngaihzualate chhungkua chuan Pathian hnena lawmthu sawi nan Chawimawina an nei dawn a. He Chawimawina Programme hi Revival Programme a hman chhunzawm nghal tur a ni ang. Programme hian Pathianni zan thleng a awh ang a. Hemi hun atan hian Speaker rawih a ni dawn a ni. Good Friday tlaiah hian tisa lam ruai buatsaih a ni ang a. Kohhran hote Thlarau lam ruai pawh kan kil theuh theihnan thahnemngai taka he hunpui hi hmang theuh turin kan insawm a ni.
 

Dt. 3.4.2015 GOOD FRIDAY
CHAWHMA

 Chairman: Upa C. Taisena
Tantu: Bro. R.L

alngaihzuala
Speaker: Evan. R.Vanchhunga

CHAWHNU
Chairman: Upa C.Taisena
Speaker: Evan. R.Vanchhunga

ZAN
Chairman: Upa C, Damvea
Speaker:  Evan. R.Vanchhunga,

4.4.2015
INRINNI ZAN
Chairman:- Upa C. Damvea
Speaker:- Evan. R.Vanchhunga
5.04.2015

SUNDAY NILENG LEH ZAN
Chairman:- Evan. K.Lalhmingmawia
Speaker:- Evan. R.Vanchhunga

************************

DRAFTING COMMITTEE DIN A NI

Pastor Quarters sak hna chak zawka kalpui anih theih nan Church Board Commttee chuan hma lo la turin Drafting Committee a din a, an ni hian an mithiamte rawnin an ruahmannate chu Church Board ah an thlen leh ang
     Convener     : Upa C. Taisena,
     Secretary     :Bro. Lalfelkima,
     Member       : Bro. Dr. R. Lalfakzuala, 
                           Church Board Members, Bro. PC Lalhmingmawia,
                           Building commitee Vice Chairman te an ni.

************************

RAWNGBAWLIN CHHUAK

Kan kohhram member tangkai tak Sis. Zionparmawii B/W chu Suangpuilawn Bial LAD Khawmpuiah Speaker ah tangin, khawmpui a hmanpui mek a, a pasal Bro. Vanlalrema’n a tawiawm a ni.

************************

SACRAMENT LEH KESIL RAWNGBAWLNA

Dt. 2.4.2015 (Ningani) zan hian Sacrament leh Kesil Rawngbawlna neih a ni dawn a, Bialtu Pastor in hun a hmang ang.

************************

DAHNA HMUN SAWN

Buhfai tham dahna hmun chu Upa F. Lalrova In atangin Pastor Quarters hnuaiah sawn a ni.

************************

AIAWHTU TUR RUAT

Evan. K. Lalhmingmawia leh Evan. F. Lalsanglianate chu hmundanga an awm dawn tak avangin an rawngbawlna chelh mekte an awiawhtu tur hetiang hian siam rem a ni:
Building Committee Fin. Secy.:
Bro. FL Ramchullova,
Light & Sound Committee Chairman: Bro.Dr. R.Lalfakzuala,
Local PYD Adviser:
Evan. Lalchhuanmawia Zote.
NPSS Director:
Upa Vanlalbela.

************************

KAWNGZAWH

Vawiin ni hi Tumkau ni anih angin tukin zingkar ah hian Naupang Sunday School-te leh puitling a thei theite chuan Hossanna ti-a auvin kawngzawhna an nei a ni.

************************

CHAWIMAWINA PUAL HNATLANG

Dt. 2 April 2015 (Ningani) hian Chawimawina leh Good Friday atana inbuatsaihnan kohhran pum huap hnatlang koh a ni a, kohhran mipui thahnemngai taka thawkchhuak turin min sawm a ni. Buh thlei te a ngaih dawn bawk avangin LAD lam pawh thahnemngai taka kal tura ngen kan ni e.

************************

PYD TEN DRAMA CHANG TA

Bethlehem PYD te chuan hun rei tak atanga an lo inbuatsaih tawh DDK a drama an chan tur chu Nimin Inrinni khan Shooting an nei. TV lama tihchhuah hun tur erawh hriattheih a la ni lo. 

************************ 

BIAL L.A.D CONFERENCE HMAN MEK A NI

March 27, Zirtawp zan atang khan Bial LAD khawmpui chu Bethlehem Vengthlang Biakin ah hman tan a ni a, Speaker atan Evan Lalnunmawia chu rawih a ni. Nimin inrinni nileng khan rorelna neih a ni a, vawiin hian khawmpui hi chhunzawm a ni ang a, ruahman lawk dan chuan khawmpui chu zanin hian a tiak ang; 

 
KHAWMPUI PROGRAMME

 
PATHIANNI ZING
    Chairman    : Sis. Lalthanseii Fanai, Vice President, Bial LAD
    LAD Thiltum Sawirual: Sis. Sailokhumi
    Solo        : Bro. Lalthansanga Colney
    Thuhriltu     : Speaker

 
PATHIANNI CHHUN
    Chairman    : Sis. Lalthanseii Fanai, Vice President, Bial LAD
    Solo        : Bro. Lalthansanga Colney
    Thuhriltu     : Speaker

 
PATHIANNI ZAN
    Chairman    : Sis. Lalthapuii, President, Bial LAD
    Thusawi    : Rev. Ramtharpara, Bialtu Pastor
    Thuhriltu     : Speaker
    Report & Lawmman Sem: Secretary, Bial LAD 

************************

BIAL HRUAITU RUAT THARTE

Bial Board chuan hetiang hian Department leh committee peng hrang hrang hruaitu turte a ruat tharin, a siam danglam:

    Bialpui Secretary         : Bro. Dr. R. Lalfakzuala (Bethlehem)
    PYD President             : Bro. Lawmsangkima (Hermon)
    PYD Asst. Secretary    : C. Lalnunmawia (Beth VT)
    LAD Asst. Secretary    : Sis. Lalzuithangi
    Sunday School Treasurer: Bro. Laltlanlawma (Beth VT)
    Zaipawl Chairman        : Bro. Lalfelkima

Thianghlimna Committee:
    Chairman                     : Evan Lalchhuanmawia
    Treasurer                     : Bro. Laltlanlawma  

************************* 

 INTHLAHNA HUN HMANG DAWN

Dt. 30.3.2015 (Thawhtanni zan) hian kan Kohhran atanga Pastor a chhuak tur Evan. K. Lalhmingmawia leh Mualpui lama min pemsan tur kan Church Board member Evan. F. Lalsangliana te thlahna hun hman a ni dawn a, hetiang hi Programme a ni ang:

Chairman: Upa C.Taisena
Thusawi tawi (10 minutes) : Evan. K. Lalhmingmawia
                                             Evan F. Lalsangliana.
Thlahna thuchah: Rev. Ramtharpara, Bialtu Pastor.
Thilpek: Bro. Lalfelkima & Upa Ngurthanzuala,
(Midang thilpek pe duh tan hun hawn a ni bawk ang.)

************************* 

BOOKMARK ZUAR DAWN

RT Phunga Group PYD te chuan Bookmark mawi tak tak an zuar dawn a, Kohhran member zawng zawng ten lo dawr vek turin an sawm a ni. Tin, Bookmark siama hnatlang zawng zawngte chungah hruaituten lawmthu an sawi a ni.  

 *************************

LALPA I EN ZAWK ANG U - K. Lalfamkima; Juniper 22.March.2015

JUNIPER ARTICLE

LALPA I EN ZAWK ANG U

                                                                                                               K. Lalfamkima

    Khawi’nge kan Ar mit tet khuan leh nghek mai teh ang !
    Rawngbawltu pakhatin, a rawngbawlnaah eti hian a sawi a, ‘tlinglo leh fello a inti viau aniang ‘kei hi min enlo ula, Krista zawk i en ang u’ ati. Mi thenkat chu engmah ni chuang si lo mahni nupui fanaute pawh enkawl thiam hlei lo, an in chhunga a khawsak dan leh a nunte kan hmuh hian, ei tlak a awm love an ti a, a diknalaite pawh a awm ang.
    Nimahsela heti hian i ngaihtuah teh ang: Zirtirtu pakhatin naupangte a zirtir a, chu zirtirtu chu a nunah engmah hmuh tur a awm biklo, mahsela, a zirtir chhuah leh a zirtir tawhte ah chuan MA, BA leh Officer lian tam tak an lo chhuah tawh a. A zirtirna lamah khan a Zirlai-ate khan an ngaihtuahna leh an thinung an nghah tlat avangin rilru pe takin lehkha an lo zirchhuak zawk alo ni a. Zirtirtuah khan innghatin, a nunte kha en sela, a tlinohna laite ringawt kha en pheisela chuan M.A, B.A pass pawh tumah an awm kher lovang. Mahse, a zirtirna lamah khan an beng an dawh zawk tlat avang khan officer lian tak tak an lo chhuah theih phah ta a ni.
    Khawvelah hian mihring tumah mifel bik, tha bik, tling bik kan awmlo a ni. Pathian mithmuhah chuan puanchhe hnangkhai pawh tluklo vek kan ni Sualna neilo tumah kan awmlo ang hian, Eden bawhchhiatna avang chuan misual dumber avarna Kalvari thisen chuan min rawn tlengfai ta a, chu a thihna kan tawmpuina tur chuan kan sualnate tlengfai turin Tui Baptisma kan chan ve ngei alo ngai ta a ni. Lalpa fakin awm rawh se! Tichuan Tuiah leh Thlaraua kan pianthar chuan a hnenah chatuanin a angchhung thianghlimah kan chawl ve tawh dawn a ni.
    Tin, misual pakhatin Bible a rawn keng a, a kengtu chu misual mah nisela, a ken Bible erawh chu Pathian thawkkhum Bible a ni tlat si a; Tunge sualna nei lova Pathian Thu sawi ngai le? Tunge sualna neilovin Bible keng ta ang le? He leiah hian sualna neilo tumah kan awmlova, kan sualna theuh erawh a inang lo mai a ni. Tichuan a khawngaihnaa chhandamin kan awm theihnan, a thihna leh thawhlehna tawmpuiin a hnenah phum vein kan lo awm ta a ni. Lalpa chu fakin awm rawh se. Amen!
    I Samuela 1:1-8 kan chhiar chuan, Elkanan nupui pahnih a nei a, a nupui pakhat zawk chu Penini a ni a, pakhat leh zawk chu Hani a ni. Hani zawk hian fa a nei ve theilova, Penini hian a hmuhsit thin avang hian hani hian hrehawm ati em em thin a. Heti chunga a nupuite innghirnghona karah pawh Pathian biak a thulh duhlo hi entawn tur tha tak a ni. Mimal leh chhungkuaahte, kan rawngbawlpuite nen harsatna kan neih avangin Pathian Biak Ina kal kan tthlahdah mai tur a ni lo tih min kawh hmuh a ni.
    Keini ve zawng, chhung inkhawmna kan han neih thar loh hlek chuan kan inkhawm peihlo nghal mai thin a ni si a, LALPA KAN ENLOH THIN VANG alo ni mai lo maw?? He khawvelah hian harsatna chi hrang hrangte lo tawkin lo awm mahsela, Pathianin a mite an mangan huna a hnena an inhlanna tur a ruat chu BIAK IN a ni. Hani pawh khan a harsatna thuah a pasal leh Penini pawh sawipui fo thei mahsela a sawt lo! Biak Inah Lalpa a auhna chu chhanin a awm ta. Kan harsatnate hi mite hnena hrilhfiah tumin kan bei a; lehkha ziak leh tawngkamte, lamtang zawngtein kan beifo. A buai duh hle thin. Lalpa hnenah tawngtaia hlan mai hi a tha ber a ni. Min chhang ngei ang.
    A tawp a tawpah Hani tawngtaina chu chhanin a awm ta a, fapa duhawmtak Samuela a hring ta a, ava han lawm dawn tak em! Kan mangannat, kan harsatnate hi Pathian hnenah kan thlen thin chuan anin minlo chhang mai thin dawn a ni. Engpawhnisela LALPA I EN ZAWK ANG U.
    Lalpan a thu mal min sawmsak theuh rawh se.                     Amen. 

EDITORIAL Juniper 22 March 2015

 JUNIPER EDITORIAL

PYD Piancham

    Kum 1969 March 21 alo inher chhuah meuh chuan United Pentecostal Church, N.E India, Thalai Pawl, ‘Conqueror’ tih ni thin chu mumal takin Pentecostal Youth Department ti-a thlakin kan Thupui ‘Krista Tana Senghawm’-te pawh siam alo ni chho ta a. Khatih hunlaia kan hruaitu tha tak takte avang khan tun hun hi kan thleng thei a ni tih hi hre reng ila a tha awm e.
    Kumin 2015 hian PYD chu kum 46 a tlinna alo ni ta der mai a. Golden Jubille lawmna turin kum 4 chiah kan hmabak ta der mai. Mihring kuma chhut pawhin kan naupang chhe ta lo hle a. Mite hipkhawm thiam leh Chhungkua, Kohhran leh khawtlanga rorel thiam ngaihdan fing nei chin kan lo ni pha ve ta. Kan fate pawh kum 20 chuang annih hun alo ni ta!
    PYD Day alo thlen apiang hian kan thupui ber ‘Krista Tana Sengkhawm’ tih hi kan rillru-ah lo thar leh thin sela. Kum 46-na piancham kan thlen mekna ah hian kan thiltum hi engtiang chiahin nge kan hlen chhuah, kan thiltum bawhzuina tur hian eng activities-te nge kan neih ang? tiin kan ngaihtuahna siamthar fo ila a tha awm e. Tin, kan theihnghilh hauhloh tur awm leh chu kan Thiltumte hi a ni. Kohhran Fundamental Doctrine en lova kan sawichhuak thei ang hian PYD Day lo thlen apiang hian emaw PYD Inkhawm zanahte hian kan Thiltumte hi en lova sawi chhuah thin nise thil tih chi tak tur a ni.
    Pentecost Thalai ni reng chung si a, mahni thiltum hrechiang lo leh hlenchhuak lo kan nih chuan mahni mawng kan hlim mai tihna a  ni dawn a. Chutiang anih avang chuan kan rilru leh kan ngaihtuahnate seng thar leh ila, kan Thupui leh Kan thiltumte hi a hma aia nasa zawkin a bawhzuina kawngah tan ila thar leh ang u.
    

*****************

   

JUNIPER Dt. 22 March 2015 VOL. XIX, ISSUE NO. 12

BETHLEHEM LOCAL LIGHT & SOUND COMMITTEE 

NEIH A NI

Dt. 15 March 2015, Pathianni hmasa khan Local Light & Sound committee pawimawh tak neih a ni a. Hetah hian Kohhran hmasawnna tur thil pawimawh tak tak sawiho a ni. Committee thurel chhuah tlangpuite:

Hmalaknate/turte:
1. Jubillee Hall-ah Dt. 21/3 (Inrinni) khan Electric Wiring neih a ni.
2. Biak In-a Sound Box hman tur kumin chhungin Pahnih (2) tha tawk tak lei nise tih a ni a. Heihi Church Board-ah thlen leh tur a ni.
3. Biak In-a Current awmloh thut nikhuaa tangkai tak Automatic Switch chu thlak tura tih a ni.

* Kum 2015-2016 chhung atana Light & Sound Committee hruaitute leh member ruattharte:

Chairman: Evan K. Lalhmingmawia
Secretary: Bro. Sangkhuma
Ex-Officio: Bro. Lalfelkima & Upa Ngurthanzuala
Members te:
1. Bro. F. L. Ramchullova        2. Evan. F. Sangliana
3. Bro. F. Lalremruata (Valtea)        4. Bro. Lalnunmawia
5. Bro. Dr. R. Lalfakzuala        6. Bro.Lalmuanzuala
7. Bro. Lalhriatpuia (Sena)        8. Bro.Lalfakzuala (Afaka)
9. Bro.Lalrammawia            10. Bro.Lalrinsanga
11. Bro. Oliver Lalthlengliana

* Sound Operator:
Sound Operator thla khat chhunga ruat ni thin chu kartin a thar zela ruat a ni tawh dawn a. Sound Operator tura ruatte chu a hnuaia mite hi an ni.

1. Bro. Lalhmingsanga            2. Bro. JH Zonuntluanga
3. Bro. Lalrinchhana Royte        4. Bro. Jacob Lalhriatrenga
5. Bro. Vanlalringa            6. Bro. F. Lalchhuanawma
7. Bro. John Sangzuala            8. Bro. Lalniropuia
9. Bro. Lalrokhuma (Patea)        10. Bro. K. Vanlalhlimawma

Sound Operator ruat tharte hian Dt. 21 March (Inrinni) khan Biak Inah training an nei nghal a ni.

************************************

MISSIONS DEPT.-IN TAWNGTAI INKHAWMNA HMANG

1. Dt. 19 March 2015 (Ningani) zan khan Local Missions Department chuan Bro. Robialate inah leh Bro. Lalrampanlianate inah Tawngtai Inkhawm an hmang. Hun remchang dangah Tawngtai Inkhawm hi hman chhunzawm zel tum a ni.

***************************

PYD HNATLANG

Nimin Dt. 21. March 2015  (Inrinni) kha PYD DAY a ni a, hemi pual hian Local PYD chuan Biak In kawtah Blanket suk hnatlang a nei a. Memberte an hlim tlang hle. Tlawmngaia hnatlanga lo thawkchhuak zawng zawngte chungah leh Kohhran mipui Blanket suk titrtu zawng zawngte chungah hruaitute chuan lawmthu an sawi a ni.

**************************

PASTOR RUATTHAR

Aizawl East District Board 98-na thurel angin kan Bial Secretary Evan. K. Lalhmingmawia chu Pastor atana ruatthar a ni a. Hnahlan Bial-enkawl tura ruat a ni. Rawngbawlna zau zawk nei thei tura Pathian Kohna a dawng hi Kohhran hote chuan thinlung takin kan lawmpui a ni. Evan. K. Lalhmingmawiate chhungkua, Kohhran hoten kan tawngtainaah i hre reng ang u.

****************************

PATHIAN CHAWIMAWINA

Dt. 3/4 Good Friday hmang hian Bro. R. Lalngaihzualate chhungin Pathian Chawimawina an nei dawn. Karleh issue ah program kimchnag rawn tihchhuah a ni ang

*****************************

GENERAL PYD DAY THUCHAH            

                                                                             Rev. C. Vanlalena Gen. PYD President

    North East India huamchhunga PYD member zawng zawangte General PYD Day ah hian Lalpa Isua hmingin chibai ka buk a che u. Kan hriat theuh angin 21/ March hi kum tinin General PYD Day atana hman thin a ni a.
    Mizorama UPC alo din khan Kohhran thalai rawngbawlna hi ngaih pawimawh a ni nghal a, thalai pawl ‘Conqueror’ tih hming puin din alo ni tawh a ni. Kum 196 a Mizoram alo buai khan India sipaiten Conqueror tih lai tak hi an hriatthiamloh deuh thin avang leh lam alo harsat deuh bawk avangin, North East India UPC alo indan a, Executive Board hmasaber Ni 21 March 1969-a thukhawm chuan ‘Pentecostal Youth Department’ tiin alo thlak ta a ni. Hetia PYD alo din hnua hruaitu hmasaberte chu
President: KL Hnuna
Secretary/Treasurer: Rev. K. Satinvela
te an ni a. Tichuan Ni 9-11 September 1983 a General PYD Conference Lunglei Rrahsi Veng hmuna neih chuan hemi ni hi General PYD Day atan hman nise tiin alo rel ta a ni. Tin, Ni 8 April, 1988-a Saiha hmuna General Conference chuan tuna kan hmanlai PYD Emblem (logo) hi alo pawm a, PYD Motto ‘Sheaves for Christ’ tih hi a pawm bawk a ni.
    General PYD Day hian kawng hrang hrangin Lalpa Pathian hruaina dawngin hma a sawn ve zel a. General PYD Day hman anih tan kum 1983-ah hian General PYD member 3142 anih laiin kim 2013 (Report hnuhnungber) ah chuan member 18974 lai kan lo tling ta a. Tin, kum 1983-a sum hmanzat hi Rs.3552 anih laiin kum 2013 ah chuan sum hman zat Rs. 346410 lai alo nita reng mai. Heng ang malsawmna minpetu Lalpa Isua chu fakin awm rawh se.
    Kumin General PYD Day alo thlen hian North East India PYD memberte hian Pathian minlo hruai tawhna leh a malsawmna kan dawnte avangin Pathian hnenah lawmthute sawi ila. He ni pawimawh takah hian PYD kan nihna leh din chhante, kan thiltum leh motto-te hre thar leh ila, Krista tana sengkhawm tura inpekna thar nen he hun hi i hmang theuh ang u.
    General PYD Day hmangtu zawng zawngte, Lalpa tana sipai rinawm ni tur leh a rawngbawlnaa mi tangkai tak ni chhunzawm zel turin hlim taka hmang theuh turin Lalpa Isua hmingin duhsaskna sangber ka hlan a che u.

********************************

 

EDITORIAL; Juniper 15 March 2015

 ***JUNIPER EDITORIAL***

Enge i talent ni ve le?

    Khawvelah hian mihring maktaduai tamtak kan awm a. In ang tak erawh an awm nameuh lo lawi si a! Chutihlaiin kan talent neih erawh a in ang thei tho mai alo ni a. Mi tamtak chuan an talent hmangin sum tamtak an hai lut thin a, eizawnna hnar thatak neih nana an hman laiin, thenkhat erawh chuan an talent neih ang angte an pho langsar lem lova sum thawhchhuah nan leh intih lar nan an hmang lemlo bawk a.

    Mi pangngai tawh phawt chuan a lian emaw a te tham emaw, a hlu emaw hlu lo emaw thiam bik thil kan neih theuh mai a. Heng kan talent kan neih ang angte kan phochhuah ve theihna tur atan chuan Kohhran leh School/College/Pawl thila inhman tam a, items a tel tam hi a kalkawng pakhat a ni ti ila kan sawisual tam lovang. 

    Kohhran member tawngtlem tak pawh thusawi thiam tak a ni thei a, a tui zawng tak alo ni hloh thei bawk. Chutiang zelin a mimal a zaithiam lemlo pawh, a hranpaa Pathian Thu zir lemlo pawh nisela Pathianin a hman chuan Khuang Vuak alo thiam viau thei bawk a. Tin, thusawi thiam lemlo pawh zaithiam tak alo ni reng thei bawk a, Pathian Thu zirchhuak pawh Sermon thiam tak a ni kherlo thei bawk. Hetiang hi thil awm thei anih tlat avangin hunruattu a ni emaw hruaitu a ni emaw kan fimkhur tlan a, midangte talent hai chhuah theihna tur kan dap a tha hle dawn a ni.

    “Ani chu ruat lovang, a thiam lovang” tihte emaw “A ti ve thiam lovang” tih thute hi sawichhuah fo loh a tha! Khami khan vawi khat khuang a vaw tawh emaw thu a sawi tawh emaw tih i hriat hmasak zet loh chuan a thiam lovang, a ti thei lovang, ti ngawt suh! Mi reng reng a talent haichhuahsak tur chuan puitling taka kan en hmasak phawt hi a finthlak hle a ni. Mi zawng zawngin thiam thil bik kan nei. Enge i talent ni ve le?

***************

   
   

LALPA ISUA KRISTA RIM A NAM TA E K. Lalfamkima (Juniper Article; 15 March 2015)

 ***JUNIPER ARTICLE***

 LALPA ISUA KRISTA RIM A NAM TA E 

K. Lalfamkima

 
Khawnge kan Nipui Bekang puah ve pawp mai teh ang.
    Kan tunlai khawvelah hian mahni hna leh kan pawimawhna hmun hrang hrangah kan inpel sung sung mai si a. Lalpa Isua Krista lokalna tur pawh ngaihsak hman lek lovin mahni buai buaiin kan buai vek a ni si a. Sawrkar pisa kal ho lahin an nitin un chu office ah an hmang a, dawrkai leh Bazar-a eizawng leh sumdawnna chi hrang hrangten kan nitin hun chu mahni tulna lamtluang kan zawh tan mek bawk a. Politician leh chanchinbu miten a englai point tak hi nge sawi ila mi ka hip theih ber ang tiin tan anlo la mek bawk a. Tin, nu leh paten an fanu/fapate zu ngawl vei leh Drugs Addictte lak a an beidawn tawhzia thute thlengin kan lo hre ve si a, a buaithlak a ni. Tin, sarthihna chi hrang hrang hraw pui pui he kan Mizoram chhung ngeiah pawh kan hre teuh mai a, avan rapthlak tak em!! Hengte hi engvanga lo awm nge tih kan chhut thin em aw? Abul ber chu, Pathian lokal hnaih tawh vang a ni tih i hria ang u.

A pasalin a that a khamah a paih; A hringtunu leh a unaupa leh a unaupa fapa ngeite pawh that a inchhirna pawh nei miahlo; naupang kum tlinglo pawngsual a, chhuhlum nghal hmiahte, naupang rukbo tum tih leh setana biak tih vellte hian Pathian lokal chu ava ti hnai chiang tak em!!
    Tunah chuan kan rintirh lai ai khan kan chhandamna chu a  hnai zawk si a, a rim pawh kan hre tan ta, a namta thar thar mai le. Pasalthain Sa a pel a, Sakei rim a hriat chuan a awmna a hnai a ni tih a hria a; chutiang bawk chuan, kan Lalpa Isua Krista lokal lehna hi tunah chuan a hnai a ni mai lova, a rim a nam ta, alo hnai tawh takzet a ni.
    II Petera 3:8,9 ah chuan, “Nimahsela duhtakte u; he thu kam khat hi theihnghilh suh u, Lalpa ngaih chuan ni khat hi kum sangkhat ang a ni tih hi. Mithenkhatin, muanga an ruat angin Lalpa chu a thutiam kawngah chuan a muang love, tuma boral duhlova mi zawng zawng lo sim duhin nangmahni lamah a dawhthei a ni zawk e” tih kan hmu a. Heta mi thenkhat a tih ho hi keini ho hi kan lo ni mai lo maw; lo la kal rih mai lo tur leh tlema ala hla deuhhlekah kan lo ngai mai a ni thei angem le?
    Pathian thu leh a zirtirna lam ngaihtuah leh ngaisak miah lova, mahni chak zawng ringawt, entirnan:- Interenet leh Facebook ringawt mai ngaihtuah a, Pathian thu lamah kan Online leh duh tak tak silo; kan nakin hun tur ngaihtuahloh vang leh kan rilru Pathian lamah kan dah tawk lohzia ava tilang chiang tak em !!
    Bible-ah heti hian chiang takin min hrilh a;
II Timothea 3:1-5 “Tin, hei hi hre rawh, ni hnuhnungahte chuan hun khirh takte a lo awm ang. Mi, mahni inhmangaihtu te, tangka ngainatu te, intivei te, chapo te, Pathian sawichhetu te, nu leh pa thu awih lo te, lawm nachang hre lo te, thianghlim lo te, hmangaihna pianpui nei lo te, huaikawmbawl te, hektu te, insum thei lo te, mi kawlhsen te, tha duh hauh lo te, vervek te, thuhnudawn lo te, inngaihlu te, Pathian hmangaih aia mahni lawmna mai hmangaih zawktu te an ni dawn si;  Pathian ngaihsak anna an nei ang a, nimahsela a thiltihtheihna chu an awih lo vang; chung ang chu hawisan rawh” tih kan hmu a ni.
    Awle, kan Lalpa Isua Krista hi alokal a hnai ta takzet a ni tih hi a takin i ngaihven zual zel ang u khai. Nimin aiin vawiinah, vawiin aiin naktukah.
    Lalpa Isua Krista RIM A NAM TA E
   
Lalpan a thu mal min sawmsak rawh se.

   

JUNIPER VOL. XIX, ISSUE NO. 11 ;15th MARCH, 2015

AIZAWL EAST DISTRICT KHAWMPUI ROREL TLANGPUI

 
District Khawmpui Vawi 21-na, Kawlkulh Vengthar Biak-In a March5-8, chhunga neih chu Thlarau thianghlim awmpuina hnuaiah hlimtaka hman zawh a ni.

District Conference rorel tlangpuite :
1. Kum 2017 khawmpuina hmun atan Chhingchhip Bial ruat a ni. Kum2016 chu Bazar Bial-ah a ni ang.

2. N.E.India huam chhunga Office hrang hrangte Kumthar Office hawnhun leh Kumtawp Office khar hun in rual tlanga hman tawh ni se tih chuGeneral-ah thlen tura tih a ni.

3. Kohhran ni pawimawh hrang hrang kan neih te a pawimawhna leh hman a tul dante General atangin emaw District atangin emaw Thuchah/Thuchhuah siam thin ni se.

4. Kum 2015 atang chuan Rawngbawltu zuk leh hmuam nghei lote chu Pulpit atangin rawng an bawl thei tawh lovang tih District in kan hmanmek hi NE.India pumah hman ni rawh se tih chu General-ah thlen tura a ni.

5. Bial leh Department hrang hrang a ruala Conference kan neih hi ennawn ni se tih chu kal dan ngaia kalin a hun erawh ennawn ni se.

6. Kum 2017 atang chuan AED-ah Kohhran Upa te, Church Boardmember te leh Department hruaitute chu zuk leh hmuama fihlim tura hmalak ni se.

7. Mualpui, Salem Veng Bial Hqrs-a hmangin Upper Republic Bial chu Bial hniha siam ni se, Bial huam chhung atan Mualpui, Salem Veng leh I.T.I ni se tih chu tha tih tlan a ni.

District Board Vawi 98-na leh Committee room thar lawmna March 10, Thawhlehni khan neih a ni :
Rev. Pc.Lalnghakliana, Dist. Supdt. chuan kaihruaiin Pathian malsawmna leh Kohhran mipui te vanga Committee room tha tak kan nei ta chu lawmawm a tih thu a sawi a,Rev. Lalmalsawma Sailo, General Secretary leh Office Staff - ten pawh he hunah hian telin Committee room hlannan tawngtai rualnaa hlan in, Thlarau lam hla nen he hun hian hmang. Committee room hi Ft 24 x 36 a lian, mi 50 leng thei tura ruahman a ni. District Board neih chhunzawm nghal a ni.
 

An thurel tlangpui te:
1. Kohhran-in hmun leh ram tam zawk kan neih theih nan Aizawl East District huam chhungah Land Project siam ni rawh se.
 

2. Doctrinal Department siam rawtna.

3. Pastor quarter sanction dilna chungchang.
 

4. Biak-In sak tanpui dilna.
 

5. District Sunday School-in Chhungkaw zan atan October ni 1 an ruahman approve dilna.
 

6. Pastor lak thar leh Transfer te chungchang.
 

7. Financial leh Evangelism-a nasa zawka hmalak rawtna.

*********************************

 **TUALCHHUNG**

RAWNGBAWLIN CHHUAK

District Missions Department chuan Evan. Robert Lalrinsanga chu Thanglailung khuaah rawngbawl turin a tir chhuuak a. Nimin Dt. 14, March (Inrinni) hmang khan a fehchhuak a ni. A awm hun chhung tur erawh hriat lawk theih ala ni rihlo. Thanglailung khua hi Ramthim niin Kohhran ala dinglo ni-a hriat a ni a. He hmunah hian Pathianin hna a thawh a, a Kohhran a din ngei theihna turin kan tawngtainaah i hre reng ang u.

*********************

LALLIANA GROUP HRIATTIRNA

Lalliana Group-te chuan harsatna dang a awm lo anih chuan tunkar chhung hian Kohhran In tinah lehkha chhia khawna hnatlang tum a ni a. Hemi atan hian Kohhran chhungkaw tinte lehkhachhia minlo khawlsak theuh turin kan inngen thar leh a ni. 

*********************

BLANKET SU DAWN

Tunkar Inrinni lo awm tur March 21 (PYD DAY) hmang hian Local PYD chuan Biak In kawtah Blanket a su dawn a. Kum dang zawng aia uluk leh fai zawka suk tum a ni. Kohhran hote kan inhriattir nawn leh e. 

*********************

PYD EXECUTIVE COMMITEE 

Vawiin Dt.15/3 (Sunday) chawhma inkhawm banah hian Evan. F. Lalsanglianate inah PYD Executive member zawng zawngte committee tur a ni a. Kim taka kal theuh turin kan in hriattir a ni. 

********************* 

DISTRICT PYD SUB-COMMITTEE

Aizawl East District PYD Sub-Committee hrang hrangte member ruatthar an ni a. Bethlehem Veng atangin a hnuaia mite hi ruat an ni:
Music & Sound:
1. Bro. Lalhriatpuia (Sena)
2. Bro. Lalnunmawia (Mawitea)
3. Bro. Lalthansanga Colney
Education Sub Committee:
1. Bro. C. Lalrammawia,
2. Bro. Dr. R.Lalfakzuala,
3. Bro. Oliver Lalthlengliana

*************************

TANPUINA HLAN DAWN

Bethlehem Bial PYD Conference 2015-a Speaker atana kan rawih Evan. Lalbiaktluangate chhiat tawk avanga tanpuina khawn khawm chu vawiin ni hian hlan a ni ang.

************************ 

LAD NOTICE 

Local LAD-te’n a sumtuak nana Sangha leh Alu an zawrh tlawmngaia lo leisak tute, aman la pelo kan awm anih chuan a rang lama pek nise a lawmawm hle ang.

**********************  

CHALLIANZIKA GROUP NOTICE

Dt.12/3 (Ningani) zan hmang khan Challianzika Group-te, Pu Chullovate lungthiar-a hnatlang neih a ni a. Tlawmngaia thawkchhuak zawng zawngte chungah hruaitute chuan thinlung takin lawmthu an sawi a ni. Tin, Group TShirt man tur pawh hruaitute hnenah pek theih reng a ni. 

***********************

LAWMPUINA
 

TLING THAR

* India Weighlifting Federation (IWIF) hnuaia National Referee Exam Dt.12/3 (Ningani)-a Jaipur khuaa neihah Bro. Lalthansanga Kawlni chu tha takin a passed a. He IWIF hnuaia Referee a a inziak tling thei hi Local PYD chuan a chhuang a hle a, thinlung takin a lawmpui a ni.

***********************

KAI SANG

* Bro. C. Lalnunfela S/O Upa C. Damve-a chu hun reitak Social Welfare Department, Kolasib khuaah Probation officer-a post anih hnuin Social Welfare Department hnuaia Home for Children with Mental Illness, Laipuitlangah sawn niin Probation Offiicer atangin Supirentendent-ah a kaisang nghal bawk a ni. He a kaisanna hi Local PYD chuan thinlung takin kan lawmpui a ni. 

******************

 

THUAWIHNA - LALFELKIMA (Juniper 8 March 2015)

**SERMON**

                                                                  THUAWIHNA
                                                  (Thufingte 15:8, I Samuela 15:22)
                                                                                                                             Lalfelkima

    Keini Mizo kristian ringtu te hi he khawvela sakhaw dang betu te nen hian kan sakhuana lak run dan leh Pathian thu kan kalpui dan hi theih ang ang hian ka teh ve fova, chik taka ka ngaihtuah hian Sakhuana la run lo pawl tak leh ngaihdan nei tam pawl tak kan ni awm e.

    Kan zui Lal Isua ngei pawhin hrehawm tuara nitin mahni kraws pu tura min tih laiin hrehawm erawh tawrh kan peihlo viau niin a tlangpuia han thir chuan a lang tlat in ka hre thin. Bible ring theuh theuh si te kan rin dan leh kan Pathian thu pawhfan danah te hi a mak deuh thin teh zawng a nih hi. Lal Isua’n Vana a lawn dawna thu min chah te, Vanram chahbi a pek, Petera te thupek ngei pawh engahmah ngailo kan tam ta. Dik niawm taka lang leh mahni a a lan dan ang ang a Pathian thu lo her rem ve ngawt ching thin te hian Pathian pawi nasa takin an sawi a ni. Nikinni a lo thlen hunah Lalpa chhuahchhal turte an ni tih hi i pawm ngam ang u.

    Kan Pathian thu tarlan atang khian han en ila, I Samuela 15 kan chhiar chuan Lal Saula chuan Amalek ho nen an indo tumin Pathianin Amalek ho chu an thil neih zawng zawng, ran te, mihring te pawh nausen chena that chimit vek tura a tih laiin ran chawmthau te chu halral thil hlan atan a hawn a, chu a thil hawn chu Pathian hnena hlan tura a tih nimahse Pathian thu a nih loh avangin Pathian a chungah a lung ni lova, I Samuela 15:22 ah chuan zawlnei Samuela kaltlangin Lalpan’n thu a sawi ta a, “Ngaiteh, inthawina aiin thuawihna chu a tha zawk a, berampa thau aiin a thu pawm a tha zawk a ni”, a lo ti a, Lal a nihna atangin a hnawl phah ta a nih kha. Thufingte 15:8 kan chhiar leh chuan, “Mi suaksual inthawina chu Lalpa tana tenawm a ni” tih kan hmu a. Chuvangin a thu zawm silova a rawngbawl ve viaua inngai chung si hian a duhloh dan angin kan lo awm thei reng mai. Kan zoram kristian inti tamtak leh kohhran inti tamtak te zingah pawh hian ti fuhlo ngial ngial chu kan awm hmel e. Kan sum thawhte hi kan chhuang viau thei a ni e, missionary kan chawmah te leh Biakin ropui kan din te hi Lalpa tan ninawm leh tenawm mai a lo ni reng thei si a ni. Chuvangin fimkhur ila, Lalpa’n thu min chah ang chiah hian awm ila, Tirhkoh leh ringtu hmasate rawngbawl dan leh an thlarau thianghlim chan thin dante entawn chung zelin Lalpa Thuawih Bawihah I lut theuh ang u. 

                                                Lalpa’n malsawm rawh se.

*********************************************************

Juniper 8 March 2015,Vol XIX; Issue No: 10 Editorial

***EDITORIAL***

 

Mahni Intodelh...

Khawvel in hma a sawn zel a, mihringte tan nunkhawchhuah a awlai lo telh telh bawk a, tin, kohhran a thang ve zel a, sum a mamawhna a sang telh telh bawk nen. Tu tan mai pawh hian sum indaihlohna hi a nasa telh telh zel a, a nasa zual zel dawn ni pawhin a lang.

    Chuti anih lai chuan Kohhran hian hma a sawn a, tha taka a kal zel theih nan sum a mamawh ve zel bawk si a, a pe tu tur leh a thawh tu tur chu tudang nilovin Kohhran member-te kan ni a, chutah chuan PYD te pawh kan bang bik silo.

    PYD Member Tam tak chu thawhchhuan neilo leh zirlaite kan ka ni hlawm a, thawhlawm leh khawn neuh neuh a awm reng lo thei bawk silo a, hetiang anih avang hian PYD Memberten rilru kan neih a, mahni intodelh duhna thinlung kan put a pawimawh hle mai. Chhungte thawhchhuah sa rigawt ring chunga budget leh thawhlawm pek hi kan chin loh deuh deuh a tha khawp ang. Zirlai pawh ni ila, kan mamawh zualpui phuhru thei tur khawp inhlawhna emaw thawhchhuahna tur hi chu a awm tih hria ila, chumi atan chuan taimak erawh a ngai hle tih hre tel bawk ila a tha awm e. Phone smart tak tak lek chunga chhungte thawhchhuah ringa thawhlawm thawh hi thalai hrisel pangngai tan chuan a mawi lemlo a ni.

    Kan hrisel that a, kan taimak phawt chuan mamawh zualpui phuhru tur hlawhchhuah na tur hi chu a awm reng a; tin, kan finna leh kan talent, kan lehkha thiamna te hman tangkai nachang hre turin PYD memberte inbuatsaih theuh ang u.

**************************************

Juniper 8 March 2015; Vol-XIX; Issue No- 10

AIZAWL EAST DISTRICT CONFERENCE VAWI 21-NA HMAN MEK A NI

    UPC (NEI) Aizawl East District Conference Vawi-21-na chu Kawlkulh Vengthar Biak In ah hman mek a ni. March, 5 Ningani khan Rev. R. Lalthanzuala chuan a hawng a, Palai lawmna Bialtu Pastor Rev. R. Laltlankima hnen atangin ngaihthlak a ni. He inkhawmpui thupuiah hian “Thlen chin atanga hmasawn” (Phillipi 3:10) tih hman niin Speaker hrang hrang Evan. Lalramthara, Upa JH Rozawna, Rev. K.VL Hmangaihkima, Rev. Lalmalsawma Sailo General Secretary,  Rev. R. Lalhawia District Secretary leh Rev. Pc Lalnghakliana District Superintendent-te hnen atangin ngaihthlak thin a ni ang.
    Vawiin lamah khawmpui hi hman chhunzawm leh a ni ang a, ruahman lawk dan chuan khawmpui hi zaninah a tiak ang.
    Vawiin Conference Inkhawm program chu hetiang hi a ni.

SUNDAY CHAWHMA
    Chairman    : Rev. PC Lalnghakliana, Dist. Superintendent
    Mitthi Sunna    : Rev. K. Hrangvunga (Retd.)
    Zaipawl    : Zemabawk Bial
    Duet        : Sawmtea & Tetei
    Solo        : 1) Bro. Lalnienga
                      2) Sis. Rinhlui
    Thusawitu    : Rev. Lalmalsawma Sailo, Gen. Secretary
    Thupui        : Sum Leh Paiah

SUNDAY CHAWHNU
    Chairman    : Rev. PC Lalnghakliana, Dist. Superintendent
    Zaipawl    : 1) Champhai Bial
              2) Bethel Bial
              3) Bazar Male Voice        
    Solo        : 1) Bro. Lalkima Zote
              2) Sis. Hmingthanzami
    Thusawitu    : Rev. R. Lalhawia. Dist. Secretary
    Thupui        : Chhungkua leh khawtlangah

SUNDAY ZAN
    Chairman    : Rev. R. Lalhawia, Dist. Secretary
    Mitthi Sunna    : Rev. K. Hrangvunga (Retd.)
    Zaipawl    : 1) Bazar Bial
              2) Kawlkulh Bial   
    Solo        : 1) Sis. Laldinpari
    Thusawitu    : Rev. PC Lalnghakliana, Dist. Superintendent
    Thupui        : Kohhranah
________________________________________________________________
________________________________________________________________

LOCAL PYD NOTICE**Executive Committee Member chin ten kan Talent tihpunna kha March thla ral hmain Hruaitute hnenah thehlut theuh tura ngen kan ni.

    Tin, Evan H.Lalbiaktluanga-te tanpuina tur, Executive Committee member chinin Rs. 50 aia tlemlo thawh tur pawh kha thehluh a lo hun ta a, a la pe lo chuan Vawiin, Pathianni hian pek vek nise tiin hruaituten min ngen a ni.

RT PHUNGA GROUP**RT Phunga Group-te chuan Dt. 2 March 2015 Thawhtan zan khan meeting neiin  kan hma lawka Local PYD Sport lo awm tura inelna tur Sport Item hrang hrang an duhzawngte Executive Committee a thehluh turin an thlang.
**Hun remchang hmasa berah Aieng, Ajonomoto leh Soda-te zuara hnatlang neih an tum.
** Sahbawn tui leh Bookmark zuara hnatlang neih an tum bawk a, kohhran mipui zawng zawng ten lo dawr vek turin min ngen a ni.

LALLIANA GROUPLalliana Group PYD te chu Dt.3 March 2015, Thawhlehni Zan khan Pickle zuarin an hnatlang a, hnatlanga thawkchhuak an tha hle a, member hnatlang zawng zawngte chungah leh tlawmngaia lo leisak tute zawng zawng chungah lawmthu an sawi.

PYD DRAMA

Bethlehem PYD in Doordarshan Kendra, Aizawl a Drama an chan tur chu ngawrh takin an inbuatsaih chho mek a, kar kalta chhung khan zan tin Drama zir hian an chhuak a ni. An drama chan tur script hi Bro. Ramsiamthara Fanai ziah a ni a, shooting hun tura ruahman lawk, Dt. 7 March 2015 chu rokhawlhna a awm avangin ni 28 March ah sawn a ni.

 __________________________________________________________________________

***LAWRKHAWM***

**Aizawl East District District Conference hmang : Phek hmasa lama tarlan tawh angin Aizawl East District Conference vawi 21-na chu Kawlkulh Vengthar biak inah neih a ni.
    Kumin 2015 hian District LAD ten a hrana khawmpui an neih loh avangin he khawmpuiah hian bet telin March 6, Zirtawpni khan rorelin hun an hmang a, March, 7 Inrinniah District rorelna sangber District Conference rorelin hun an hmang thung.
    Aizawl East District Statistics :   
        Bial                                       : 28
        Member                                : 2,4576
        Local Church awm zat         : 170   
        Preaching Point awm zat     : 10

** Kan Local PYD Member tangkai tak tak Bro. Lalmuanzuala, Local PYD Secretary; Bro. John Sangzuala, RT Phunga Group Leader; Bro. Vanlalringa, Lalliana Group Asst. Secretary leh Bro. Lalrinchhana Royte te chu Kawlkulh a District Conference hman mekah Sound Operator hna thawkin an cham mek.

** Local PYD Music Sub-Commitee hmasaber chu Pathianni hmasa khan neih a ni a, thu pawimawh tak tak rel niin, he meeting a an rorel pawimawh zualte chu:
    1) Member ruatbik awmin Local zaipawl neih nise. Member atan hian Bial Zaipawl a tello ni thei se.
    2) Local Executive committee in rem a tih chuan Dt.22 March 2015 hian Fellowship neih nise. Tin, Dt.19 April 2015 ah NPSS Chawhnu inkhawmpui ni bawk se.
    3) PYD Inkhawmah Hla hruaitu turte ruat ni tawh se, kartinin inruatchhuah nise.
    4) Music lama PYD ten hma kan sawn theih nan hun awl remchangah Music zirna hun buatsaih nise.

___________________________________________________________________________

 ***DAMLO***

**Bro. Lalduhawma Sailo chu in lamah  an la inenkawl chho mek zel a, ngai ala awh chho zel niin thu kan dawng.

** Upa F. Lalrova pawh inlamah an inenkawl chho zel a, chaklam a pan chho zel.

** Pu Zikpuia chu stroke avangin Civil Hospital ah an inenkawl mek a, a dinhmun erawh ngaihtuahawm a nilo niin thu kan dawng.

    Kan kohhrana damlohna leh harsatna tawk mekte Kohhran mipui ten kan tawngtaina ah i hrereng ang u.

___________________________________________________________________

 ***PYD SPECIAL PROGRAMME***

Bethlehem PYD Executive Committee thukhawm chuan ‘Tum danga la tih ngai loh deuh angin Thalai Inkhawm zanah programme danglam bik deuh hman thin ni se’, tih a lo rel tawh chu a tihhlawhtlinna hmasa ber atan Naktuk zan Dt. 9 March 2015, Thawhtan zan inkhawm hian Special Programme hman a ni ang. Hemi Zanah hian Bro. Lalfelkima’n inkhawm a kaihruai ang a, tawngtaina hun a tam thei ang ber hman  a ni ang.
    Tawngtai hona hunah hian thupui thawh theih a ni dawn a, thupui thawh tur leh thawh duh nei chuan Bro. Lalfelkima hnenah report tur a ni e.
    He Programme hi kumin atana a hmasa ber anih dawn avangin member ten ngaipawimawh ila, a hlawhtlinna chu kan kut theuhah a awm a ni tih hria in thahnemngai taka inkhawm theuh turin hruaituten min ngen a ni.

___________________________________________________________________

 *** GENERAL NEWS***

**General Superintendent Rev. V.L Dika Sailo chuan Barak District Conference vawi -7na, Kangrengdawr-hmuna March 5-8 chhunga neih tur chu a hmanpui dawn.

**Rev. Lalmalsawma Sailo, General Secretary  chuan Aizawl East District Conference-vawi 21-na, Kawlkulh Vengthar Biak Ina March 5-8.2015 chhunga neih tur chu a hmanpui. He inkhawmpui thupui-ah hian “Thlen chin atanga hmasawn” (Phil 3:16) tih chu hman a ni ang. Aizawl East District-chhungah hian Pastor bial 28-a awm a ni.

**Rev. R. Lalrinsanga, General Treasurer chuan Churachandpur District Conference chu a hmanpui.

**General Sunday School Director Rev. R. Laichhingpuia chuan March 5-8 chhunga neih tur Chandel District Conference a hmanpui ang.

**General Superintendent Rev. V.L Dika Sailo chuan Barak District Conference vawi -7na, Kangrengdawr-hmuna March 5-8 chhunga neih tur chu a hmanpui dawn.

**Rev. Lalmalsawma Sailo, General Secretary  chuan Aizawl East District Conference-vawi 21-na, Kawlkulh Vengthar Biak Ina March 5-8.2015 chhunga neih tur chu a hmanpui. He inkhawmpui thupui-ah hian “Thlen chin atanga hmasawn” (Phil 3:16) tih chu hman a ni ang. Aizawl East District-chhungah hian Pastor bial 28-a awm a ni.

**Rev. R. Lalrinsanga, General Treasurer chuan Churachandpur District Conference chu a hmanpui.

**General Sunday School Director Rev. R. Laichhingpuia chuan March 5-8 chhunga neih tur Chandel District Conference a hmanpui ang.

___________________________________________________________________